Pip James-wenh
James-el pip nhenh ingkwernew, Akngey-wenh-rnem-warl-anem thwenew apmer arrpanenh-warl
Angka nhenhan alakenh aynteyel
Artwa anyent James ra ingkwernew angka nhenh pip-warl. Ranap Jesus-wenh ayteyikwarl apek, ingwer apek. Iterl-arey-angenh-antey. Jesus-wenh ayteyikw ra amentewarl-tangkwel anenh. Jesus-arl ipmethey itetherrew, Aynikw ikwerenh-warl alpew irrwerl-warl, James rap Christian-anem irrew. Ikwer-penhan James tyatyew-artey anenh tawen Jerusalem-itwew. Jew ingwer-rneman apmer arrpanenh-areny Christian irrew arrpemarl. Ra apek thwenew pip nhenh ikwer-rnem-warl.
James-el rap akalty-anthenh alakenh renh-rnem pip-angkwarr: “Nga Christian anem, ntwap Akngeyant-anem apentemer, ingwer-rnemel areyew. Nga apek apwert-weny, artewenty iterrey-angenh. Ingwerentyel apek rlterrk mpwarem ngkweng, ipmelhey-angenh. Anamerl-antey ahelerrey-angenh. Mwerr mpwaraynta ingwer-rnemew. Ingwer-rnemew tyel-angkey-angenh. Akngeyan ayerna, ngenh akalty-anthaynteyew, arraty iterr-aynteyew. Angkeperra arrenty ilkwewenh iwerr-wety. Nakelhey-angenh. Akngeyant ayern-aynta ingwer-rnemew.”
Alakenh-anyem James-el akalty-anthenh.
1
1 Atha James-el pip nhenh ingkwerneyel. Ayengan Akngeyew warrkerreyel Jesus Christ-ew-then. Atha pip nhenhan thweneyel arrewantherr ingkerr-warl Akngey-wenh-rnem-warl, apmer arleng-areny-rnem-warl-then.
Rlterrk ayntentyeng-arey, inkwerelhemelant intem anenheyew
2-3 Atyenh-rnem Christian-rnem, angka nhew iterr-ayntenh-arey. Arrantherran inkwerelhemelant anemer, apmwarl ayntemeng-arey. Ingwer-rnemel arrkernemeng-arey arrenhantherrenh, Akngeyewantap anyentew iterr-ayntenh-areyan. Alakenh-angkwarr arrantherr rlterrkerrem, ipmelhey-angenh-anemarl.
4 Ya, intem renh apententy arrantherr, arrantherrap inngarl arratyerrem, rlterrkerrem Jesus-apeny.
5 Christian anyent apatemel iterrem apek, “Akngey-wenh-angkwarran atha iterl-arey-angenharl. Nthakenh irrem ayeng?” Ra Akngey ayernemer, renh akalty-antheyew. Akngeyel mwerr-angker anthey-angker, nthakenh menty awey-angenh.
6 Anyentel renh ayerneyew arraty-angkwarr, irrpeltherrey-angenhel. Raw alakenh iterreyew, “Ya, Akngeyelan inngarl ayenh alpemeley-angker.” Nthakenh ra atherr-angkwarr iterremel ayerney-angenh, “Akngey atyeng awelhey-angenh apek.” Ra iterrenty atherr-angkwarr, ranap kwatyel alperr irrwerlap-anenty-apenyarl, arwarl irrwerlap-aneyelarl.
7-8 Alakenhanap ra rlterrk-weny-anteyarl. Akngeyelanap nthakenh anthey-angenharl, alakenh-anyem ayernentyan. Nthakenh renh akalty-anthey-angenh, arrangkw.
Apwert akngerr angwarey-angenh
9 Christian anyent arrangkw apek apwert-weny anem. Ra iterl-aremer, Akngeyarl ikwer artewentyel ilkelheyel. Alakenh iterl-aremel ra inkwerelhemel anem.
10 Christian ingwerelan apwert akngerr apek atnyenem. Nthakenh ra tangkemel apwert-akert aney-angenh. Ra iterl-aremer arrpemarl, Akngeyarl ikwer-then artewentyel ilkelheyel. Alakenh iterl-aremel ra inkwerelhemel anemer arrpemarl. Artwa apwert akngerr-akert ra pretty-apeny, ahernelarl rtneyel-apeny.
11 Aherretyelan ingkeny tyerrelhenhey-alhem, rwenp-anem irrem. Ingkenyel ampernem pretty renh, rap arleny-anem irrem, aytnem-anem. Alakenh-anyem artwa apwert akngerr-akert rap atnengkanerrem-anem, apal-antey apwertewant inkwerelherl-anenty. Ilek-ilek mwerr-angker ikwerenh arrangkwerreyelpem pretty yanh-apeny.
Rlterrkarl ayntemeng-arey
12 Ingwer-rnemel arrenhantherrenh irrwernem, awelhey-angenh ikwer-rnem. Rlterrkel-antey Akngeyan apent-aynteyew, rap inkwerelhemarl arrewantherr. Rap akngeynem, ikwer-itwel aney-alpeyew intem-antey. Rap alakenh-anyemarl aynteyel ikwerarl ilkelheyel-rnemewan.
13 Anyent apek iterrem apmwel-ayeth-angkwarr. Nthakenh ra alakenh angkey-angenh, “Akngeyan ilkelheyel, ayeng apmwel-ayeth iterreyew.” Arrangkw alakenhan! Akngeyan alakenh ilkelhey-angenharl. Anyentel Akngey renh nthakenh arrkerney-angenh, apmwel-ayeth mpwareyew.
14 Anyent iterrenty, ikwerenharrp-angkwarr alheyew, rap apmwelhelemarl. Ament-antey ra ilkelhem, apmwangkwarr alheyew. Alakenh iterremel-antey ra angkeperrem Akngey-wety, rap irrwernelhem ament-antey.
15 Ra iterrem, ikwerenharrp-angkwarr alheyew, rap anamerl-antey apmwa mpwarem. Rap apmwelhelem innganem, nthakenh ipmelhey-angenh-anem. Akngeyelap renh ilteyenh arlta anyent ikwerel, ingkerrarl ra ayerneyenheng-arey. Rap renh irrenteyenh intem-antey.
Akngeyel anthem mwerr-angker
16 Atyenh-rnem, mwanty awelhenh-arey angka nhenhew, arrantherr apmwangkwarr-anem alhewerr.
17 Ilek-ilek mwerr-angker anantherr arem ahern nhenh-itwew. Akngeyel rarl anyentel mpwarew, rarl anthew anewantherr. Ra mpwarew ingkeny, alkent, antyarr-akerr. Rernemap ingwer-anem irrem itwernew-then kwenyel-then. Akngey ran nthakenh ingwererrey-angenh, arrangkw. Irrkaty intem ra aneyel.
18 Angka arraty ikwerenh ilew anewantherr, anenhantherrenh-tangkwel ayerrpelemel, ikwerenh-anem aneyew. Angka nhenhel iteth atnyenem intem-antey. Anantherran impen ikwerenharl. Ilek-ilek ingwer-rneman ra mpwarew anantherr-apeny-wenyarl.
Angka Akngey-wenhew awelh-aynteyew
19 Atyenh-rnem, mwanty awelhenh-arey, atharl akalty-antheyel-angkwarr. Ingwerarl angkeyelew, arternp-tangkwel awelheyew ikwer. Anamerl-antey rwenperremel angkey-angenh. Alakenh-weny.
20 Artwa ahelengkwan nthakenh arraty aney-angenh Akngey-warl-ilwengk.
21 Rap ipmelhemer apmwewety-tangkwel, raw Akngeyew-anem warrkerreyew. Arrantherr apmwel-ayeth-tangkwel anenh. Aleyan arrantherr ingwer-rnem-apeny-weny anemarl, Akngey apentey-angenh-rnem-apeny-weny. Angkarl ra arrewantherr anthew, intem-antey itetheleyew. Nthakenh arrantherr apmwel-ayeth iterrey-angenh, arrangkw-anem.
22 Arrantherran angka Akngey-wenhew awelh-aynteyew. Arrkentant iylpelant awey-angenh. Intem-antey mpwaraynteyew, rarl akalty-antheyel-angkwarr.
23-24 Ingwerel apek awem angka ikwerenh, arwarlap ra aweman. Ranap glass-itwewarl inngerr arelheyel-apeny, rap iylpelerremel-anem anperl-alhem inngerr ikwerenhew. Alakenh arrantherr nthakenh arrkentant angka awey-angenh, iylpelerrewerr angka ikwer.
25 Angka yanh mwerr-angker inngarl! Ra akalty-antheyel, Akngeyel rarl apmwewety irrarlkew. Anantherr inkwerelhemel ikwer awelhem inteman iylpelerrey-angenh, Akngeyelanap inngarl anenhantherrenh irrngerney-anthem.
26 Anyentan alakenh iterrem, “Ayengan Christian inngarl, Akngeyantarl apenteyelarl.” Angka apmwel apek ra iltem. Apmwel-ayeth apek ra angkem ingwer-rnemew. Ranap mwerr-arrpantey nakelhem ament-antey. Akngeyarl ra apenteyel-arrpantey.
27 Christian inngan ingwer-rnemew athamerrem. Ampa alhamp-rnem ra arntarnt-arem arelh inpert-rnem-then, rlterrkarl ayntemeng-arey. Ingwerentyel renh arrkernem, apmwangkwarr alheyew, rap mentyarl rlterrkel awem, angkeperrey-angenhel.