23
Jesus-el Pharisee-rnem-then Moses-kenh angkakert-rnem akalty-antheyel
(Mark 12:38-40; Luke 11:37-52; Luke 20:45-47)
1 Jesus-anem ingkerrenh-warl angkek kwertengerl ikwerenh-rnem-warl-then,
2 “Pharisee-rnem-then Moses-kenh-rnem-then akalty innga aneyel, angka Moses-kenh-angkwarran.
3 Rernem Moses-kenh angka arraty akalty-antherl-anenty, arrantherr ikwer-rnem awelh-ayntetyek, Pharisee-kenh-angkwarr apentey-angenh. Rernem ingwer-rnem akalty-anthem, rernem Akngey-kenh-angkwarr arraty apentey-angenh.
4 Rernem ingwer-rnem akalty-anthem, rernem renh-rnem aleth arntarnt-arey-angenh-anemarl.
5 Rernem tnakelheyel. Mwantyel arntarnt-arelhenherr-arey yanh-rnem-kety kwet arlpenty-akert-kety! Akngey-kenh pip-rnem rernem rlwewarl arertnelhem iyterlarr-apeny akwewarl-then, ingkerrenhel renh-rnem arayntetyek.
6 Warl ikwer-warl rernem anyentirrem, angkerr-ayntetyek. Rernem arrwekel-warl arrernelheyel arrkngelemel ingwer-rnem-kety, rernemant tnakelhetyek. Ingkerrenhel inkwerelhemel amern arlkwetyek, rernemant arrwekel-warl arrernelhetyek arrkngelemel ingwer-rnem-kety, rernemant tnakelhetyek.
7 Akngerr akarrirrenty-warl, akngerrel renh-rnem tnakelh-ayntetyek, ingkart ilkwarrpantey.
8 Arrekantherr akalty-anthey-angker anyentant. Akngey anyent irrwerl-areny rant ingkerrenhek aneyel. Ingkerrenh arrantherr aneyel, awayenheng-apeny, angkwerenheng-apeny.
9 Ingkart ahern-areny ntwa tnakey-angenh, Akngey-arrpantey. Akngey alker-arenyekant anwantherr awelhetyek.
10 Nthakenh ingkart rltwa tnakelhey-angenh. Artwa itethiley-angker rant atyetyart arrekantherrenh aneyel.
11 Ingwerenty apek atyetyart ilkwa anenty, rap warrkenh ingwer-rnemek.
12 Artwa anyent ilkwarrpantey ilelhenty, Akngeyel renh areyel arrangkwarl. Artwa ra apmwamwam ilelhenty, Akngeyel renh areyel mwerrarl.
13 Yaw-yaw! Pharisee-rnem-then angka Moses-kenh akalty-anthey-angker-rnem-then! Akngeyelan arrenhantherr artewentyel innga irrwampenh-antheyenh! Arrantherr angka Akngey-kenh arraty akalty-anthey-angenh, akngerr ingwer-rnem akaltyirretyek, ikwerenh-angkwarr anayntetyek. Arrangkwaw! Rerneman angka ikwerenh iterl-arey-angenh, arrantherr-apeny! Rernem irrtywerremel angkeyel Akngey-warl-athek arleng-alenty. Akngeyelarl ingkerrenh court-emileyenh, rap renh-rnem irrwampenh-antheyenh, irrtywalth renh-rnem. Ingwer-rneman ra alyepel irrwampenh-antheyenh.
15 Artwa Pharisee-rnemay, Moses-kenh-rnem-then arrantherr apmwangkwarr akaltyileyel. Arrantherr apmer arleng-warl alheyel, artwa anyent angkepiletyek, renh Ingkart-angkwarr akaltyiletyek. Arraty-wenyarl arrantherr apmwangkwarr akalty-antheyelarl, apmwangkwarr apenterl-ayntetyek, arrantherr apenteyel-apeny!
16-17 Rernem irrtywerremel ilelheyel tyaty ilkwangkwarr. Alakenh ingwer-rnem irrtywerremel ilelheyel, ‘Gold innga aynteyel-apeny tyaty ilkwitwel, arraty ayeng angkeyel wenh.’ Tyaty ilkwa impen, gold-an arrangkwarl.
18 Apwert ilperr-ilperr impen ikwer tyenkerr ampernetyek. Ingwer-rnemel irrtywerremel ilelheyel alakenh, ‘Apwert ilperr-ilperr tyaty ilkwitwek innga aynteyel-apeny, innga atha ileyel.’
19-20 Ingwer-rnem alakenh irrtywerremel ilelheyel, ‘Gold tyaty ilkwel innga aynteyel-apeny, arraty innga atha ileyel.’ Ingwer-rnem alakenh angkeyel, ‘Tyaty ilkwa alakenh aynteyel-apeny, innga arraty atha ileyel.’
21 Akngey-kenh warl ilkwa nhel anwantherr iterretyek, arraty apentetyek Akngey-kenh-angkwarr. Inngant nga ilelhetyek, irrtywerremel ilelhey-angenh.
22 Ingwer-rnem irrtywerremel ilelheyel alakenh, ‘Alkenhel arem’. Arrkent iley-angenh, arrantherr iterretyek Akngey anyent ikwer. Anwantherr iterretyek ra irrwerl-itwel anwekantherr mpwelheyel, irrtywerremel ilelhey-angenh.
23 Artwa Pharisee-rnemay! Akngeyelan arrenhantherrenh artewentyel irrwampenh-antheyenh! Arrantherrarl amern atherrk akep-akalthem, akely anthem Akngeyekan, Moses-elarl akalty-anthenh-angkwarr. Angkan ikwerenh arrangkwarl. Angka akely nhan, arrangkwarl. Arrantherr arratyilerrey-angenh, ingwer-rnem arntarnt-arey-angenh, arrantherr Akngey-angkwarr arraty apentey-angenh. Arrantherr angka apenterl-anem angka ingkerr!
24 Arrantherr angka anyent impen ikweretyan iylpelirrekarl. Arrantherr angka apmwel-aretharl apenteyel, angka mwerr-angkwarr apentey-angenh.
25 Arrantherr Pharisee-rnem apmwel-areth iterreyel. Arrantherr mwerr-arrpantey inngelheyel, kwenan apmwarl. Arrantherr apmwernemarl rnter-rnem.
26 Arrantherr artwa aparrng-apeny. Arrantherr apmwekety angkepirretyek Ingkart-warl. Ikwer-penh arrantherr Akngey-angkwarr arraty aneman.
27-28 Arrantherr iterl-arelheyel arraty-angkwarr-arrpanteyarl. Arrantherr arlka kwenan apmwakert-anteyarl! Warl mwerrarl intelheyel-arrpantey ntwa arem, warl apmwarl kwenan. Arrantherr apmwakert-antey aneyel, warl mwerr-arrpantey intelheyel-apeny.
29 Akngeyelan arrenhantherrenh inngarl artewentyel irrwampenh-antheyenh! Awank-akerr artwa angkakert Akngey-kenh-rnem rernem akwernek awenng-warl. Arrantherr awenng-rnem ayterlkwel aperneyel mwerr-angker ilemel, angkakert-rnem iylpangk-ayntetyek.
30-31 Arrwekelenyel-rnem angkakert-rnem atwenh. Rernemap awelhey-angenh angka Akngey-kenhek, arrangkw. Alakenh-anyem arrantherr awelhey-angenh arrpemarl.
32 Arrantherran irrtywerremel ilelheyel arraty-angkwarr-arrpantey, rernemarl angkakert-rnem atwenh-apeny.
33 Arrantherr Ingkart-kety amentirrek. Rwa ilkwa arrwekel arrekantherr mpwelheyel.
34 Arrwekel-antey Akngey angkek, ‘Atha angkakert-rnem artwa akalty ingwer-rnem-then arrekantherr Jew-rnem-warl thwenetyek. Arrantherrarl ingwer-rnem ipmek atwem, ingwer-rnem arwerl iylpeyl-atherr-warl arrernem, ingwer-rnem whip-el atwem Jew-rnem-kenh tyaty akely-rnem-itwek, ingwer-rnem arntety anthemarl apmer arrpanenhel.’
35-36 Awank-akerr Cain-el ayteyikw Abel-tangkwel atwek. Ingwer-rnemel-anem atwenh angkakert Akngey-kenh-rnem. Artwa anyent Zechariah Barachiah-kenh alerikw rernem atwek arrpemarl, rarl rtnenh tyaty ilkwa Jew-rnem-kenh kwen-itwel, ampwal rwek-arelh arrerenty. Yaw-yaw, atha arrenhantherrenh arraty ileyel. Akngeyan ahelirreyel arrekantherr. Arrwekeleny-rnemel angkakert Akngey-kenh-rnem awank-akerr atwenh-they, Akngeyel arrenhantherr atweyenh arrpemarl.”
Jesus amperrngirreyel tawen Jerusalem-areny-rnemek
(Luke 13:34-35)
37 Jesus-an amperrngirreyelpek Jerusalem-areny-rnemek. “Ayengan ikwer-rnem amperrngirreyel Jerusalem-areny-rnemek! Rernem Akngey-kenh angkakert-rnem atwek, Akngeyelarl ikwer-rnem thwenek. Rernem apwertel wemel, ipmew-antey atwek renh-rnem. Ayenganap ilkelhenh, renh-rnem ingkerrenh-antey arntarnt-arayntetyek. Ayengan ilkelhenh, renh-rnem ingkerrenh akarriletyek, tywek-tywekelarl akely-rnem akarrilem-apeny, aympelhel artemel. Alakenh-anyem. Arrangkwarl! Rernem ingkerrenhel ayenh artepelant arek!
38 Alakenh-anyem Akngeyelan apmer Jerusalem arntarnt-arey-angenh. Apmer yanhan ampeny arrangkw aynteyenh, alkey-anem. Tyaty ilkwa renhanap atep-atakeyenh ahernel-anem arlperrty-anem ayntey-ayntey-alheyenh.
39 Rernem ayenh arey-angenh arleng-alenty apmer yanh-itwek. Ingwer-inger ayeng angkep apetyeyenh. Rernemap ayenh areyenh-anem, alakenh-anem angkemel, ‘Artwa nhanyem mwerr-angker! Akngeyelan renh thwenek rlterrk-akertel!’ ” Angka nhanyeman Jesus-elan ilenh Jerusalem-areny-rnem-akert.