3
Siosna misog el ahanaig el eso fef
1 Afa el membeg siosna misog el ofefiba afa enag gafugagba ehe membeg eba lahlag. Ohuna mo eba inim.
2 Afa siosna misog el masa ahanaig ahanaig amtakwalig esef. Ehe so ma mungo angwafigni fei, afa heafna onigig masa ese fabihiafef, so ma afoahlanam fei, afa amunaina onigifei, afa afwambanai elim lala gam wankai afa Godna mo mingnagim wagfunugum eba ma esef.
3 Afa ehe bu gina negim hwoiyug mas fei afa mas ikagna ninimui afa afahlagna gagim afa nengigim sihiageg afa kig fagim mas hugna onigi.
4 Afa siosna misog el so heafna luwal angwafigim lahlafi afa heafna luwalig so ma ehem ahnai skaugfinim afa ningmagini.
5 Afa enag el heafna luwal angwafigim lahlafig hwanigba eba ehe mas anwanafeg mo Godna elim numwehenugegim.
6 El eso Sisasim yawo olug oniginig ese enag el siosna misog el go fe. Masa heafna unehlagim fingi fef eba God ehem tautig faif eso Satan enaig esenaba eso God ehem tautig faina.
7 Afa el Sisasim olug onigi hwainig so enag elim sihini og, “Eba lahlag el.” Masa enag elim amtakwalig mo sihinif eso ehem Satanna mime wa pef.
Siosna kwegfwag el ahanaig el eso fef
8 Afa siosna kwegfwag el ehe gaba so ma amunaina onigig lofug fi ese eba mang sambaga mengigna el fef afa mo ehe so sihi eba inim mo Afa ehe bu gina negim hwaiyui afa kig fagim mas hugna onigi.
9 Afa inim mo God ehe opuguna enag el so kikehlanam og ka Godna nof wa heafna mom pahluku.
10 Afa yuwana mo so na ehengelni gafugag i nihe i fahigenugenam eso yuhwafeba so ma ehengel siosna kwegfwag elni gafugag esei.
11 Afa ehengelni angwafigni nihe gaba so ma lahlafi afa esi elim mo sumifinif afa esi mina wa wahgi gofif afa enaig angwafig so sihig eba naho inim mo sihig.
12 Afa siosna kwegfwag el so mungo angwafigni fei afa heafna luwal angwafigim lahlafi.
13 Afa enag kwegfwag el eso lahlag gafugafeg eba lahlag unehlag fag. Afa ehe kifutigni enaig esog ka Krais Sisasim olug onigina.
14-15 Afa ka onigig ka mwakwalig fenam so nem bo nangufe afa ka ikagna bo hwanigba ohuna mo ka nem ginofenag so na anwanafe afa big Godna lala nuwaginam afa big ahanaig esif. Afa big Godna el afa God nofkikenafeg bigel heafna sios. Afa enag sios soma ofenaiba kifutig sumil lofug so Godna inim mo gofeg.
16 Afa big anwanafig inim mo God ehe opuguna afa enag hugna nalig feg. Afa enag inim mo enaig esog;
Ehe ohunaig el lofug gohna
eso bitenai el heafna mom higinim
ehem olug onigini.
Afa Godna Sungwag wagfuna ehe lahlag
afa ofwanai el ehem nanguni
afa ehe heven gam fukukagim God i ahagag.