4
Mwakwal wagfuiag el elni onigigim gasaf wabufif
1 Godna lahlag Sungwag sihig autunai wa mingnag el Sisasim olug onigig wahigim afa enag el mwakwal sungwagna mom higi afa nimbasa enag wagfufenim eso enam pahluguf.
2 Afa mwakwalule el so enaig mo sihiakag afa enag elni onigig etetig afa mahim amtakwalig esigim eba mas ahwanifi.
3 Afa enaig el so enaig sihifeg nofeka angwafig fi afa nofeka ahanaig fane ahgai. Afa ena gau God ehe gafugafeg eso el Godum oniginim afa ini mom anwanafenim afa ma Godum lahlag onam eso ahgai.
4 Afa mungwali gau God so gafugafena eba lahlag masa big fatif afa big mungwali gawigim lahlag onigibi eba so big fi.
5 Afa Godna lahlag mona afa bigelni sahig ena gawig eba lahlag mungwali Godna nemug feg.
Afa Krais Sisasna lahlag gafugag el ahanaig mahim
6 Afa ne ohuna mo nilitem sihinibi eba ne Krais Sisasna lahlag gafugag el fef afa Godna lahlag mo wa neana sungwagim kifutig fafe eso ne enag onigig afa anwana lahlagim so na fanam pahluku.
7 Afa nofeka mwakwal elni mo bihigim onigi. Ena mo mang Godna bo mo afa mas nem kweagfui. So na hugna gwenaig esegofum eso neana nihe Godna minam pahluku.
8 Afa big gafugafigbi eso bigelni elig kifutig fag enag kwegfwag eba wesigfeg. Afa big gwenaig sungwagim esinigbi enagba naho hugna kweafug afa enag yawo bigim ohunanai yi kweagfui afa autunai wa bigim gwenaig fenif.
9 Afa ohuna mo eba inim eso ne kikehlinim auguiafim.
10 Afa bigelni olug so ma nofkenagag Godnai yi luwafi eso ka ohuna gafugam ehengepuseg. Ehe mungwal elni kwagani el eso aman ehem olug oniginag ehengelim piske wambuf.
11 So na ohuna mo elim sihini afa wagfuni so ma enam pahlukwi.
12 Afa ese nem enaig onigifif og neba kwablog el feg amo so nimbiafna nihe Godna elim lahlag mina wagfuni. Afa neana mo sihiagim afa gafugam afa membeg afa olug onigini afa lahlag gag so ma el enam nangunim nem pahlukwi.
13 Afa ka ikagna bog hwanigba so na enaig ese. Afa mungwali elni ang wa so na Godna mo suwiginam afa wagfufenugenam afa sihinuge.
14 Afa mahim siosna misog el nem kehlinibi afa el nem Godna mo faina eso ne Godna Sungwagni kifutig fana. Afa nofeka enam yiskose.
15 Afa numwehena nimbiafna gafugam lahla kikehlaf eso ne fag. Afa neana onigi so na ena gafuga wa luwafiba so ma el neana nihem nangunim eba so lahlag gwenaig esahufi.
16 Afa nimbefum lahla kafefiba so na elim mo sihinug fiakafum afa moba ne osihinifiba so na ini mo sihini afa ne enaig eseba eba God nem afa el eso neana mo higig ehe nem kwaganif.