Basef Amama Mafeꞌma Esis Hibru
Basef bandami mafeꞌma esis Hibru
1:1-3 Basef Godi mataga mandawalap alihima Jisas Krais, Nogalomana Ananinai atona, Anan nape naꞌama etin siꞌi God
1:4–2:18 Jisas nikilaꞌ amam ensel hiami
3:1–4:13 Jisas nikilaꞌ Moses
4:14–6:20 Jisas Anan Dembinai apeꞌinai nandaꞌ maol nondolalima God
7:1-28 Jisas Anan Dembinai nandaꞌ maol nondolalima God nikilaꞌ Melkisedek
8:1–9:28 Jisas anan Dembinai nandaꞌ maol nondolalima God nape laꞌafena God naloma epes numafi basef dambaimi God naꞌi endilisimi atom. Eaꞌ esimbel Ananimi malo mandaꞌ basef amama mataga laꞌifim.
11:1–12:29 Epes hiesi fowaꞌisi sombaleꞌefa Godi sihiꞌambapa waf buꞌunai ma milana
13:1-25 Waf buꞌunai apeꞌ milana ma mondaꞌ okom Godi boꞌona ma apeꞌ
1
Deiꞌ malogel Nogalomana Godi naꞌipapa basef
Fowaꞌ gani God naꞌipa akusapa bafasapa apeꞌisi naꞌama, naꞌipasa basef ananimi nimeguf atona etin naꞌipa amam profeta eaf hianai mawalipas maꞌipasam. Eaꞌ deiꞌ nogota anaeꞌ siꞌi nogota anama anona nemaf nigiꞌ neatagai endilisi, nawalapa basef naꞌipapa malogel Nogalomana Ananinai. God nandandepana ma nemaf akutainai Anan nope Dembinaima amamaga hiami ma etap anaeꞌ moloma esis amam nematawa wapotiꞌ. Anan atona nofaꞌam numafiam. Fowaꞌ gani God naꞌi Nogalomana Ananinai nandaꞌ amamaga hiami ambagof mapaimi maloma ambagof aꞌami mape ilif etapi hiꞌalam mataga mape. Nogalomana atona nafifili luꞌunai Godi nafifimapa endilisi. Anan naꞌama etin siꞌi God endilisinai. Anan naꞌi basef Ananimi laꞌifimi atom eaꞌ deiꞌ amamaga amama hiami maloma amam nematawa hiesi sataga laꞌifis. Anan atona nasaꞌopapa ma waf aonai apeꞌ mandaꞌanai mataga boꞌwepa andeande. Nandaꞌam eaꞌ, deiꞌ nape lagel daꞌisinai Godi gani ilif heven God laꞌifinai numafi amamaga hiami.
Amama atom deiꞌ nataga Dembinai endilisi nikilaꞌ amam ensel hiami. Deiꞌ main, agel anama nofaꞌana Ahalomana nikilaꞌ agof amam enseli boꞌona endilisi. Deiꞌ main, fowaꞌ God ina naꞌipa anona ensel Ananinai naꞌi,
“Ineꞌ nogalome aeꞌinai, aeꞌ deiꞌ ataga Ahalomena ineꞌiwei endilisi,” owaꞌ.
Basef amama fowaꞌ God naꞌipa Nogalomana Ananinai atona.
Eaꞌ God naꞌiam wapotiꞌ naꞌi,
“Aeꞌ nambimb etaga Ahalomana Ananiwei, Anan nope Nogalome Aeꞌanai.”
God ina naꞌipa anona ensela basef amama, owaꞌ. Naꞌipa Nogalomana Ananinai atona.
God naꞌipa Nogalomana Ananinai nape naliꞌma amamaga hiami. Eaꞌ nemaf anama God naꞌi Nogalomana Ananinai nataga etap anaeꞌ naꞌiam wapotiꞌ naꞌi,
“Amam ensel Aeꞌami hiami mondaꞌ lotu ma Anan atona.”
Eaꞌ basef amama God naꞌipa amam ensel naꞌama naꞌi,
“Anan nandaꞌ amam ensel mataga siꞌi uf, nandaꞌam mandaꞌ maol Ananinai mataga siꞌi nif fandom ilelowa mataga.”
Eaꞌ God naꞌipa Nogalomana Ananinai naꞌipana naꞌi,
“God, ineꞌ nape laꞌifinai Dembinai numafi amamaga hiami, eaꞌ anona nemaf nepe naꞌama etin laꞌelaꞌef hihif.
Waf buꞌunai atotona ineꞌ deiꞌ nape Dembinai ma wambel ineꞌinai. Ineꞌ okom naila waf buꞌunai nandafaꞌma waf aonai sosambala basefanai. Eaꞌ deiꞌ God, Anan God ineꞌinai, nandandepena naseꞌena danifel luꞌunai endilisi. Eaꞌ epes hiesi ina sandanifel siꞌi ineꞌ, owaꞌ.”
10 Eaꞌ God naꞌiam wapotiꞌ naꞌi,
“Dembinai, fowaꞌ dambadamba Ineꞌ etina nandaꞌ etap nataga lagel ineꞌinai atona nandaꞌ ilif otaga wapotiꞌ nataga nape. 11 Amama anona nemaf higililam, eaꞌ ineꞌ nepe laꞌelaꞌef. Amama mope mefeꞌ mefeꞌ anona nemaf motaga apim siꞌi luwaguf apimi. 12 Anona nemaf ineꞌ nimbomefam siꞌi sumagwia luwaguf, eaꞌ amam mohoꞌofam siꞌi luwaguf. Eaꞌ ineꞌ laꞌelaꞌef nepe naꞌama etin, ina anona nemaf hagena nogota ineꞌinai, owaꞌ.”
13 God ina naꞌipa anona ensel Anaꞌi,
“Ineꞌ nepe naꞌae lagel daꞌisinai Aeꞌanai waꞌol.
Ineꞌ nepe laꞌelaꞌef nefeꞌ nefeꞌ nemaf anama aeꞌ endaꞌ naumbih ineꞌisi sefeꞌ owina boꞌwagah ineꞌimi.”
God ina naꞌipa anona ensela basef amama, owaꞌ. Naꞌipa Nogalomana Ananinai atona. 14 Deiꞌ amam ensel emi egafum? Amam ambagof buꞌwami Godi. Anan nasapaꞌam mafiꞌi ma migiambama epes isima deiꞌ God nofaꞌas sotanimani ma anona nemaf sofaꞌ pe buꞌunai.