3
Job yana sisiya dagudaguna
1 Noko taparorone raghanine getana iiyabo iyisisiya bi murine, na Job ikararupama da ere ghakighakina sinananaki ivitubuyina gabudarina ivisisiya beroveni.
2 Iwona bo,
3 “O God, sinagunaki ivitubuyigu na gabudarina kasunaghataveni
da kate nubabasune siwona bo,
‘Tomogha itubugha.’
4 Noko gabudarina na inididibari!
God kiidamove kate geininoyenina,
da yeghana kate geinarukarata debanena.
5 Wiididibara ghamana noko gabudarina inibonuvi;
Uwa wowonagha inasowo mumu,
bi mmko wiididibarina inabera
da sinagunaki ivitubuyiguna gabudarina inanaghara kirakii.
6 Wiididibara ghamana noko nubabasuna inakabitawani!
Noko nubabasuna kate geininuwamiise
ware gabudara mududi naboni bodu tana kamone;
genoko boduna kamone sinakabiyawa wiikapuna.
7 Noko nubabasuna na inigagara,
getana nuwamiise rukwatudi sinawaiyana.
8 Imapu damdi iiyawogha sakovi da metagha yegii motana ghamanakina sinakasiwiimatakina,
na toudi damdi mmko gabudarina sinawona imimagi.
9 Rubana raghani boribori kewokewona inididibari,
rubana da raghani yeghanina inakoyagha kawakawa
da raghani didigubana na geinakitana,
10 kiiravine noko wiididibarina sinagunaki raparapana matamketana geiyagudu bodenina,
getana piropiro gwabiguma iyikowoyidina.
11 Iyamiise da sinagunaki kamokamone ayarabobo,
bo ayatubutubugha na raghanine ayarabobo.
12 Awaki kiiravine sinagunaki manonone ivikenegu?
Bi awaki kiiravine susunama ivisusugu?
13 Memeda yagu tubugha raghanine ayarabobo, na tagu ayakenayowogha, ayiraborabobo;
Augunai da tagu ayakenakena, bi nuwaruririye ayiiyawiitaveyana.”