4
Elipas ivisisiya Job biidi
Wasina bi Teman tomogha Elipas iwonabodeyana bo,
“Meboda animatipo da wiisisiya biidi,
na nuwanuwam inapughu bo gegha?
Basuna gerubana da mmko raghanine anikawapotapota makena.
Wasina tam raghani katamanidiye wawaya korotodi kuviyevevedi,
bi wawaya noganogadi kuviwiitedi da sivimaragata.
Yam sisiya na wawaya bekubekudi ikabiwiigeghomiiridi;
bi wawaya utukirokirorodi kuberadi da sivimaragata.
Bi katana piropiro ipiika tam biidi,
na tam gekuyitumaghanana;
piropirona ikabitowoyim,
na parapa kwanaghanaghara.
Metagha, God kabepepina yam noghota yimaragasi bo gegha?
Bi yam makamake yawana noghota yavereverem da tam wasina bo?
Mmko kunuwagiureni!
Da wawaya iiyawogha bera berodi gesiyaberaberana sarabobo?
Bo wawaya yadi makamake yawana rotomanidi,
God iviberodi bo gegha? Gegha!
Bi yagu wiikitakitayena, wawaya iiyawogha berona sarove bi piropiro sawavi,
na damone mayimayiyina sinakabipura.”
Job turaturana patana siyawonewoneni da touna bera berodi peyaridi ibera kiiravine na kata piropiro ghamadi iyouna bi gegha da Job iyawonawona da getana bera berodi iyaberana.