23
Josaiya ivisuwona da Yawe God inakabisisireni
Wasina bi kiiwawo Josaiya, Jiuda kuburidi kadi babada da Jerusalem kwanatuna babada ghamaghamadi iwonedi na sipiika touna biidi. Da tupadi sigae sinagho Yawe God yana bareye, bi prist da peroperoveta, da kate wawaya tupadi sivikayeturanedi yawata, wawaya moyamoyakidi bi igae inagho wawaya moumouridi. Name Yawe God yana bareye, na Josaiya Wiiwaghasina Maragasina Bukana meko bagibagi damdi, Yawe God yana bareye sibananina, tupana ikabiyavi wawaya biiyadi. Josaiya, Yawe God yana bare tupogina ririne imiiri, gawara meme kiiwawo inamiiri bi sisiya ghamaghamadi inisisiya. Na name Josaiya wiiwaghasina maragasina Yawe God matane iviwuwamireni. Bi ivisuwona da Yawe God yana sisiya bagibagidi, gwara bi sira inakabisisiredi da awaki sisiyidi Wiiwaghasina Maragasina Bukana kamone na inabera. Wawaya tupadi bada mayimayiyina sivisuwona wiimaragata Yawe God biidi.
+Wasina bi kiiwawo Josaiya sisiya bagibaginama, Hilkaiya touna prist kiikiiwawona, bi kana wiiwiita pristna da kate prist mekodi Yawe God yana bare matamketana samiimiiribabari, na iwonedi da sawara mekodi wawaya sibera Baal kiiravine, Asera kiiravine, kewokewo tupadi kiiravidiye abama kamone, na Yawe God yana barema siyakawara siyakanibu maghatare. Bi kiiwawo Josaiya wawaya iwonedi na sawaridi tupadi Jerusalem kwanatuna kubune, tanawa Kidron anayina gisina ririne siyagabuna. Noko murine na yapukaredi siyakawara siyanagho Betel kwanatune.*
Wasina bi Josaiya, inagho Jiuda kubura da Isrel kubura kamodiye bi gawara tupadi meme wawaya tarabiibiisaka siyapeepetedi na ivikourikeyana da kate prist, mmkodi tarabiibiisaka siyabagibagiyedi, na ivikasunughana.
Kiikiiwawo, Josaiya murine na Yawe God gesiyakabikuwayeni na toudi tamumu sibera touna biidi.
+ 23:4 2 Ki 21:3 * 23:4 Betel kwanatuna na yana rabaraba 16 kilomitas bi Jerusalem kwanatune.