3
Bosi ro Tna msya Bosi ro Tinyi
1 Ti aro-aro to, guru ro srim mama ⌞mawe mkyas watum ro Allah mam jemaat ranu.⌟ Ana ja bibi ana ai afo re anu nnaut nwe ana to raa ro mhar bo. Tna guru ro srim weto to, baro mama moo aam (surat perkenalan) mee kʼanu nmat. ⌞Aam wana weto to mbam jemaat wana ro mhau fari. Raa manes mam jemaat wana mam wono tii mkom aam weto. Mkom aam bibi guru weto. Bibi ana afo re kbe anu nhar nwe ana weto to raa ro moof.⌟ Menohe anu ro nhau mam kota ro Korintus nhar amu mbewok oh. Feto to amu nma bibi amu nesait ai fee. Tna amu nma nerif aam (surat perkenalan) kʼanu feto fee ye.
2 ⌞Tiwya anu wase Kristus. Tna amu nma nkyas Ait yasom kʼanu. Tibyo anu nashana. Au oh mi anu nhar nwe amu fo raabis ro Allah tu oh.⌟ Tna raa beta soh ana mmat anu to, mmat he mfo refo anu nhaf, srau wanu to moof. Mmat feto tibyo ana weto mhar mawe bo reto mbam bokyas ramu ro anu beta nri. Feto mi ana mhar mawe amu fo raabis ro Allah to ye. Mhar mawe tii amu nkyas watum rAit kʼanu kaket. Anu beta nhar bo ro amu ja nno oh. Feto to, amu nbo aam (surat perkenalan) aro noo nee kʼjemaat ranu nmat to fee. Amu nno mkah bawya? Tna amu nyoh nwe anu nkom aam ro bibi amu fee ye. Amu nwe nbo aam re kbe jemaat roto mmat to mkah bawya? ⌞Amu nno bo nfi guru ro anu wase fares weto fee.⌟ Amu nhar mam amu nhaf mato wamu to, nwe mfo refo anu kro Kristus.
3 Anu nrok smot Kristus. Tna raa mmat he anu nhaf, srau wanu to mrok moof. Reto mnan fi Kristus yesait ykom aam sau. Amu mbewok oh mi ro tiwya nma nkyas Ait yasom kʼanu. Reto mnan fi anu nesait oh mi 'aam' ro Ait ykom reto. Aam reto mkyas amu ye mawe amu oh mi raabis wAit. Allah tait Allah ro yaam. Tna Har rAit oh mi Kristus yoo yama ykom aam reto. Yoo bokom msya tinta ykom abyõ mam aam fee. Ykom abyõ mam fraa fee ye. Ait yse watum rAit mam anu nhaf mato. (Reto mnan fi Ait ykom yno mayir abyõ mam raa mhaf mato.)
4 ⌞Amu mbewok nhar nwe anu nrok smot Kristus tu oh. Tna Har ro Allah mama mhau mam anu nhaf mato ye.⌟ Kristus oh mi yno re amu nhar bo weto. ⌞Feto to amu nhar nwe Allah oh mi ybis amu nmo nkyas Bokyas ro Moof reto kʼanu.⌟
5 Amu nkah armato ro Tuhan mkah tak ramu ai fee. Allah oh mi yno bo aro sor ro amu nkah to, tufrok mafer ro moof.
6 Allah yno amu srau tna ntai re kbe mbetoo Bosi ro Tna kʼanu. Bosi ro Tinyi reto tii Allah ykom mam fraa. ⌞Au oh mi Watum ro Musa.⌟ Tna soh raa miwer bobis aro ro ybis tinyi weto to, misti re raa weto mhai. Menohe Bosi ro Tna reto to, Allah ykom mam fraa fee. Har rAit yesait mno re raa srau watum rAit. Har rAit matak mno afo re meen raa mhau hame wajin. Feto oh mi Allah yawe amu mbetoo Bosi ro Tna reto kʼanu. ⌞Au oh mi Bokyas Moof (Injil) ro Yesus.⌟
7 Tiwya Allah ykyas Watum ro Tinyi kʼMusa. Tna ykom yiir abyõ mam fraa. Tna Musa ymat bo yase ro Allah rAit, tibyo Musa yesait yasu ynaif mrok mawyah. Bosi ro Tinyi reto misti re raa mhai. Menohe Bosi reto to, matak tna mbetoo Allah yase rAit ye. Ti baro firwas tna Musa yasu ynaif ro mawyah reto to, kren rau mroh maku baro. Maku baro menohe raa ro Israel mtai mros sayõ ait yasu rait kaket fefares. Yasu rait kren toni fares.
8 Bosi ro Tinyi reto mbetoo Allah yatak rAit. ⌞Menohe Bosi reto to, matak misoh raa mhaf, srau wana to fee.⌟ Tna misti re raa mhai. Menohe mfo refo Allah yno bo wAit mkah Har rAit. Reto mbetoo bo yase ro Allah rAit to moof miwer.
9 Bosi ro Tinyi reto to, moo safo mana mmit kʼraa. Menohe Bosi reto mbetoo bo yase ro Allah rAit ye. Mfo refo Har rAit mbetoo Iso ro Tna. Iso ro Tna reto to, Allah ⌞ymat mees ro Yesus tibyo⌟ yawe raa mhaf moof ati oh. Tibyo Allah ymit safo kʼraa ro mhaf moof weto fee. Iso ro tna refo fo, mbetoo bo yase ro Allah rAit reto moof miwer Bosi ro Tinyi reto.
10 Jõ tmat Bosi ro Tinyi reto tna Iso ro Tna refo to, tnaut tawe ro Tinyi to, merif bo yase ro Allah rAit to, kaket fee. Tna Iso ro Tna refo merif bo yase ro Allah rAit reto kaket.
11 Tii Musa yasu ynaif mrok kren toni. Ti baro firwas tna kek reto mawyah maku sai baro. ⌞Au oh mi anu bhar bwe Watum ro Tinyi matak rau to mroh kebet-kebet.⌟ Menohe Iso ro Tna reto merif bo yase ro Allah rAit mamo snok mam hame wajin. Tibyo mase rau to moof tna matak toni.
12 Amu mbewok ninaut nwe Iso ro Tna refo meen mhau mamo snok mam hame wajin. Amu nhar bo reto, tibyo amu nkyas Iso refo yoyo. Amu shait fee. Amu waa fee.
13 Tii Musa yoo hawee mabuf tna burut wa yasu ynaif. Ait yhar yawe kek reto mroh mroh tibyo burut wa yasu ynaif. Ait ksoh raa ro Israel mnaut mawe kek reto mhau fares. Ait hawe ana mmat bo kek reto mroh mamo marak. Menohe amu nno feto fee.
14 ⌞Amu nhar nwe Bosi ro Tna, matak rau reto meen mhau tibyo hame wajin. Kbe mroh marak fee.⌟ Menohe tiwya raa ro Israel weto to srau bokyas ro Allah fee. Ana makit mbin. Tna mamo snok mam mfo refo ye, raa ro Israel mmat Bokom ro Musa fares ye menohe srau Bosi ro Tinyi reto fefares. Bo sau burut wa ana makit wana. Tibyo ana wase Allah. Bo reto mnan fi hawee ro mno wa. Tibyo raa mahni bo yase ro Allah rAit. Kristus yesait aran oh mi Raa ro ytai matak yrus hawee reto afo re raa srau Bokyas ro Allah.
15 Mamo snok mfo refo, ati ro raa ro agama Yahudi mmat Bokom ro Musa reto, bo burut wa ana makit wana, afo re ana srau bokom reto fee.
16 Menohe soh raa haberek tna mamo mo kʼTuhan to, kbe Ait yrus hawee reto.
17 Tuhan tait Har. Soh Har rAit reto mjin mam raa mhaf wana to, kbe ana mamo mo kʼAllah to, bo aro burut iso reto wa u fee.
18 ⌞Amu nfi Musa fee. Tii Musa yoo hawee mabuf tna burut wa yasu rait.⌟ Menohe anu bmat bo yase ro Tuhan rAit. Anu bmat Iso ro Tna mase rAu. Tna Har rAit moo bo yase rAit baro mse kʼanu ye. Tibyo ati ro raa mmat anu to, ana mmat bo yase ro Tuhan rAit oh meto. Anu bfi bowane oh meto. Tuhan tait Har. Har rAit ja mhau misoh anu. Misoh, misoh anu fo, mno anu haberek bmo bfi Yesus. Reto oh mi Har rAit reto mno bo yase ro Tuhan rAit ro mse kʼanu oh to, mawyah rau maut, maut mase renti.