2
ایسّائے چارگا نجومیانی آیگ
1 بادشاه هیرودیسئے اَهد و باریگا، وهدے ایسّا یَهودیَهئے دَمگئے شهر بئیت‌لَهِما پێدا بوتگ‌اَت، گڑا چه رۆدراتکا لهتێن نجومی اورْشَلیمئے شهرا آتک.
2 جُستِش گپت: «هما نُنُّک که په یَهودیانی بادشاهیا پێدا بوتگ، کجا اِنت؟ ما آییئے اِستار در آیگا دیستگ و په آییئے پرستش کنگا آتکگێن.»
3 چه اے هبرئے اِشکنگا، هیرودیس بادشاه و اورْشَلیمئے سجّهێن مردم باز پرێشان و دِلتپرکه بوتنت.
4 هیرودیسا کئومئے سجّهێن دینی پێشوا و شَریَتئے زانۆگر لۆٹت و جُست گپتنت که «مَسیهئے پێدایش کجا بئیگی اِنت؟»
5 آیان پَسّئو دات: «یَهودیَهئے شهر بئیت‌لَهِما پێدا بیت، چیا که نبیئے کتابا نبشته اِنت:
6 ‹او یَهودائے شهر بئیت‌لَهِم!
تئو یَهودائے هاکمانی نیاما کَسترێن نه‌ائے،
چیا که چه تئو یک هاکمێن سردارے پێدا بیت
که آ منی کئوم بنی اِسراییلئے شپانکیا کنت.›»
7 گڑا هیرودیسا نجومی چێراَندری لۆٹتنت و آ اِستارئے در آیگ و زاهر بئیگئے اَلّمێن وهدی جُست کرت که کدێن اَت.
8 رندا آییا نجومی په هما نُنُّکئے شۆهاز و در گێجگا بئیت‌لَهِما راه داتنت و گوَشتی: «برئوێت و اے چُکّئے بارئوا شَرّ پَٹّ و پۆل بکنێت، وهدے شما در گێتک، منا سهیگ بکنێت تان من هم په آییئے پرستش کنگا برئوان.»
9 بادشاهئے هبرانی اِشکنگا رند، نجومی سر گپتنت. راها رئوان، هما اِستار که آیان در آیگا دیستگ‌اَت، آیانی دێما پێش کپان، هما جاگهئے سَربُرا اۆشتات، که نُنُّک اۆدا اَت.
10 چه اے اِستارئے گِندگا، سکّ باز وشدِل بوتنت.
11 لۆگا شتنت و نُنُّکِش آییئے مات مَریمئے گوَران دیست. گڑا کۆنڈان کپتنت و چُکِّش پرستش کرت، وتی تُهپه و ٹێکیانی هُکّه و زباددانِش پَچ کرتنت و سُهر و سۆچگی و مُرِّش په نُنُّکا سئوگات کرتنت.
12 رندا، هُدایا وابا آ هُژّار کرتنت که هیرودیسئے کِرّا پِر مترّنت. گڑا چه دگه راهے، وتی مُلکا شتنت.
دێم په مِسرا
13 نجومیانی پِر ترّگا رند، هُداوندئے پرێشتگے ایسُّپئے وابا آتک و گوَشتی: «چُکّ و چُکّئے ماتا بزور و مِسرا بتچ، تان من ترا نگوَشان همۆدا بدار، چیا که هیرودیس چُکّئے در گێجگ و کُشگا دلمانگ اِنت.»
14 گڑا، ایسُّپ اَنچش که چه وابا آگاه بوت، چُکّ و چُکّئے ماتی زرت و شپی شپ دێم په مِسرا شت.
15 تان هیرودیسئے مَرکا همۆدا منتنت تان هُداوندئے هما هبر راست و پَدّر ببیت که چه نبیئے کئولا گوَشگ بوتگ‌اَت: من وتی بَچّ چه مِسرا لۆٹت و آورت.
هیرودیس چُکّان کۆشارێنیت
16 وهدے هیرودیس سهیگ بوت که نجومیان آ رَد داتگ، باز زهر گپت. پرمانی دات: «بئیت‌لَهِم و کِرّ و گوَرئے دو سالیگ یا کَسترێن سجّهێن مردێن‌چُکّ کُشگ ببنت.» اَنچش که آییا پێسرا نجومی جُست و پُرس کرتگ‌اتنت، هما هسابا اے وهدی گیشّێنت.
17 اے ڈئولا اِرِمیا نبیئے کتابا هُدائے هما هبر سَرجم بوتنت که گوَشتگ‌اتی:
18 چه رامَهئے شهرا کوکّارے گۆشان کپت،
مۆتک و زاریے مزنێن،
راهیلا په وتی چُکّان گِرێت،
کسێئے تسلّا‌یی نزُرت،
چیا که آ نمنتگ‌اتنت.
دێم په ناسِرَها
19 هیرودیسئے مَرکا رَند، مِسرا هُداوندئے پرێشتگے ایسُّپئے وابا آتک.
20 پرێشتگا گوَشت: «پاد آ، چُکّ و چُکّئے ماتا بزور و پدا وتی مُلک، اِسراییلا پِر بترّ. چیا که چُکّئے کُشگئے شئور بُرّۆک مُرتگ‌اَنت.»
21 نون ایسُّپ پاد آتک و چُکّ و چُکّئے ماتی زرتنت و پدا اِسراییلئے مُلکا آتک.
22 بله وهدے سهیگ بوت که هیرودیسئے جاها آییئے چُکّ اَرکِلاووسیَهودیَهئے دَمگئے بادشاه اِنت، گڑا اۆدئے رئوگی تُرست. وهدے چه وابێا ڈاهے رَستی، وتا په جَلیلئے دَمگا رسێنتی.
23 اۆدا، ناسِرَهئے شهرا جهمنند بوت تان اے پئیما نبیانی هبر راست و پَدّر ببیت که آ ناسِری گوَشگَ بیت.