3
Pákshódi dayókén Yahyáay kolaw
(Markás 1:1–8; Luká 3:1–17)
Á róchán, pákshódi* dayókén Yahyá átk o Yahudiahay gyábáná jári perrént: “Tawbah bekanét, chéá ke ásmáni bádsháhi átkag o sar butag.” Yahyá hamá ent ke Eshayá nabi áiay bárawá gwashit:
Gyábáná kasé gwánka jant:
“Hodáwanday ráhá tayár bekanét,
Hodáwanday keshkán rást o tachk bekanét.”
Yahyáyá cha oshteray mudán gwaptagén póshák gwará at o póstén kamarbandé lánká at. Áiay ward o warák madag o gyábáni bénag§ at. Urshalimay nendók, Yahudiahay sarjamén damagay mardom o Ordonay kawray kerr o gwaray sajjahén jahmenend áiay kerrá shotant. Wati gonáhesh mannetant o Yahyáyá Ordonay kawrá á pákshódi dátant.
Wahdé Yahyáyá dist ke bázén Parisi o Sadukié pákshódi geragá mani kerrá áyagá ent, gón áyán gwashti: “Oo syahmárzádagán! Kayá shomárá gwashtag ke cha áyókén kahr o gazabá tatka kanét? Anchén kár bekanét ke cha áyán záher bebit ke shomá tawbah kortag. Cha wati delá é hayálá dar bekanét ke Ebráhém may pet ent. Man shomárá gwashán ke Hodá cha é sengán ham pa Ebráhémá chokk o awlád pédá korta kant. 10 Nun tapar tayár ent ke drachkán cha boná begoddhit* o har drachké ke sharrén bara nayárit, goddhag o ásá dawr dayaga bit.
11 Man pa shomay gonáháni pashómániá, shomárá gón ápá pákshódia dayán, bale hamá ke cha man o randa kayt, cha man zórmandter ent o man áiay kawsháni chest kanagay láhek ham naán. Á shomárá gón Pákén Ruh o ásá pákshódia dant. 12 Áiá hanshóné dastá ent o jóháná sapá kant. Dánán ambárá éra kant o pog o palárán§ anchén áséá sóchit ke hechbara namerit.”
Issáay pákshódi
(Markás 1:9–11; Luká 3:21–22; Yuhanná 1:31–34)
13 Gorhá Issá cha Jalilay damagá dar átk o Ordonay kawrá shot ke Yahyá áiá pákshódi bedant. 14 Bale Yahyáyá johd kort ke áiá pa é kárá maylit. Gwashti: “Báyad ent man cha taw pákshódi begerán, bale taw pákshódi geragá mani gwará káay?” 15 Issáyá gwasht: “Annun bell ke anchosh bebit, é paymá Hodáay wáhag o razáyá sarjama kanén.” Gorhá áiá mannet o Issái pákshódi dát. 16 Wahdé Issáyá pákshódi gept o cha ápá dar átk, anágat* ásmánay dap pach but o Hodáay Pákén Ruhi dist ke kapótéay shekl o dróshomá ér átk o mani sará nesht. 17 Cha ásmáná tawáré átk: “É mani dóstigén Bacch ent o man cha eshiá sakk wassh o razá án.”
* 3:1 Pákshódiay labz, Yunáni zobáná “baptismah” gwashaga bit o eshiay máná “ápá bokk dayag” yá “gón ápá shódag” ent. 3:3 Gwánk janag, bezán tawár kanag, lótháénag. 3:3 Eshayá Nabiay Ketáb 40:3. § 3:4 Bénag, bezán shahd, asal. * 3:10 Goddhag, bezán sendag, borrag, dur kanag. 3:12 Hanshón dáré ke pa dán o pogáni jetá kanagá kármarza bit. 3:12 Jóhán, bezán kesháráni moshag o dánáni mocch kanagay jágah. § 3:12 Pog o palár, bezán dánay póst o hoshk butagén káh o sabzag. * 3:16 Anágat, bezán yabbará, achának, nágahán. 3:16 Dróshom, bezán shekl, surat.