4
Shaytán Issáyá chakkásit
(Markás 1:12–13; Luká 4:1–13)
Randá Pákén Ruhá Issá gyábáná bort ke Shaytán áiá bechakkásit.* Chell shap o chell róch róchag dáragá rand Issá gozhnag but. Gorhá Shaytán pa áiay ázmáesh kanagá átk o gwashti: “Agan taw Hodáay Chokk ay, é sengán begwash nagan bebant.” Issáyá passaw dát: “Pákén Ketábá nebisag butag:
‘Mardom tahná pa nán zendaga nabit,
cha Hodáay zobánay sajjahén habaráni mannagá zendaga bit.’
Padá Shaytáná Issá pákén shahr Urshalimá bort o mazanén parasteshgáhay diwálay borzterén jágahá óshtárént o gwashti: “Agan taw Hodáay Chokk ay, gorhá watá cha edá jahlá dawr beday, chéá ke nebisag butag:
Hodá tai bárawá wati préshtagán hokma kant o
á tará wati dastáni delá dárant
ke tai pád dhókéá malaggit.
Issáyá gwasht: “Haw, bale chosh ham nebisag butag: Wati Hodáwandén Hodáyá ázmáesh makan.§
Padá Shaytáná Issá sakkén borzén kóhéay sará bort o cha ódá donyáay sajjahén bádsháhi o áyáni shán o shawkati pésh dáshtant o gwashti: “Agan taw mani démá kóndhán bekapay o maná sojdah bekanay, man é sajjahénán tará dayán.” 10 Issáyá gwasht: “Oo Shaytán! Cha mani démá gom bay! Pákén Ketábá nebisag butag: Wati Hodáwandén Hodáay parasteshá bekan o tahná hamáiay hezmatá bekan.”* 11 Gorhá Shaytáná Issá yalah dát o shot. Nun préshtag átkant o Issáay hezmatesh kort.
Issáay hezmatkáriay bongéj
(Markás 1:14–15; Luká 4:14–15; Yuhanná 4:43–45)
12 Wahdé Issá sahig but ke Yahyá dazgir kanag butag, gorhá Jalilá shot. 13 Náserahay shahri yalah dát o Kaparnáhumay shahrá jahmenend but. Kaparnáhum, Jalilay Mazangwarmay kerrá, Zebulun o Naptáliay kabilaháni damagá ent. 14 É dhawlá Eshayá nabiay kortagén é habar rást o sarjam but:
15 Zebulun o Naptáliay damagá, gwarmay kashay mazanráhay sará,
Ordonay kawray á dastá, Jalilay hamá hand o damagá ke darkawm jahmenend ant,
16 hamá mardom ke taháriá neshtagant,
áyán mazanén rozhné dist o
hamá molká ke ódá mark sáhélent,
óday jahmenendáni sará rozhné tálán but.§
17 Cha hamá wahdá Issáyá é járay janag bongéj* kort. Gwashti: “Cha wati gonáhán pashómán bebét o tawbah bekanét, chéá ke ásmáni bádsháhi átkag o sar butag.”
Issáay awali chárén morid
(Markás 1:16–20; Luká 5:2–11; Yuhanná 1:35–42)
18 Wahdé Issá Jalilay Mazangwarmay lambá tarragá at, do bráti dist, Shamun ke domi námi Petros at o áiay brát Andriás. Áyáni kár máhigiri at o á wahdá pa máhigiriá wati dám o máhórán gwarmá dawr dayagá atant. 19 Issáyá gón áyán gwasht: “Byáét, mani randgiriá bekanét o man shomárá anchosha kanán ke máhig geragay badalá, mardománi delán shekára kanét.” 20 Áyán hamá damáná wati dám yalah dátant o áiay hamráh butant. 21 Wahdé kammé démá shot, dega do bráti dist, Zebdiay chokk Ákub o Yuhanná ke bójigá§ gón wati pet Zebdiá neshtagatant o wati máhórán sráchag* o sharr kanagá atant. Issáyá doén gwánk jatant. 22 Áyán ham hamá damáná wati pet gón bójigá yalah dát o áiay hamráh butant.
Jalilay damagá, Issáay kár o hezmat
(Markás 1:35–39; Luká 4:42–44)
23 Issáyá sajjahén Jalilá tarr o garda kort. Áiá kanisaháni tahá mardom tálima dátant, Hodáay bádsháhiay mestága rasént o mardom cha har paymén nájórhi o nádráhián dráha kortant. 24 Sajjahén Suriahá áiay nám o tawár sheng but o mardomán jenni o mariay nádráh§ o lang o mondh o hamá sajjahén nájórh ke warh warhén nádráhi o dard o dóráni tahá atant, Issáay kerrá áwortant o áiá dráha kortant. 25 Jalil o Dekápulis o Urshalim o Yahudiah o Ordonay kawray á dastay hand o damagáni bázén mardomé átk o Issáay hamráh but.
* 4:1 Chakkásag, bezán ázmáesh kanag, emtehán gerag. 4:4 Mussáay Wáz 8:3. 4:6 Zabur 91:11–12. § 4:7 Mussáay Wáz 6:16. * 4:10 Mussáay Wáz 6:13. 4:13 Mazangwarm, bezán daryáchah. 4:16 Sáhél, bezán sáheg kanag. § 4:16 Eshayá Nabiay Ketáb 9:1–2. * 4:17 Bongéj, bezán bendát, shoru. 4:18 Lamb, bezán dámon, kerr. 4:19 Delay shekár kanagay maksad mardomán Hodáay ráhá árag ent. § 4:21 Bójig, bezán lánch, kashti. * 4:21 Sráchag, bezán dertagén chizzéay dóchag o addh kanag. 4:23 Kanisah, bezán Yahudiáni parasteshgáh. 4:23 Mestág, bezán wasshén hál, bashárat. § 4:24 Mari anchén nádráhié ke mardomá béhósh o gajj o kapa kant. Arabi o Pársiá “sar'”.