Zaburay Panchomi ketáb
107
Zabur 107—150
Hodáwanday mehr abadmán ent
1 Hodáwanday shográ begerét
ke nék ent o mehri abadmán.
2 Hodáwanday rakkéntagén habar bekanátant,
hamá ke cha dozhmenáni dastá rakkéntaganti,
3 hamá ke cha bázén sardhagárán zortag o yakjáhi kortagant,
cha shagreb o magreb, cha shomál o jonubá.
4 Lahtén, jangal o gyábánán sargardán but o
pa choshén shahréá ráhé nadistesh ke jahmenend bebant.
5 Gozhnag o tonnig mantant,
markig butant.
6 Nun sakkiáni tahá Hodáwanday gwará peryátesh kort o
áiá cha sakkián rakkéntant.
7 Áiá cha tachkén ráhéá rahshóni kortant,
dém pa shahréá ke ódá jahmenend bebant.
8 Hodáwanday shográ begerátant, áiay mehr o
pa baniádamá áiay bákamálén káráni sawabá.
9 Hamá ent ke tonnigán sérápa kant o
gozhnagán cha sharrén waráká sérláp.
10 Tahárterén tahárián neshtagatant,
ásenén zamziláni bandig o azáb atant
11 ke Hodáay habaráni helápá sarkasshiesh kortagat o
borzén arshay Hodáay sar o sójesh kalág bastagatant.
12 Gorhá zahmatkasshiay sará dát o áyáni goruri prósht,
thagalesh wárt o madat kanókesh néstat.
13 Nun sakki o sóriáni tahá gón Hodáwandá peryátesh kort o
áiá cha janjálán rakkéntant.
14 Cha tahárterén tahárián dari kortant o
áyáni zamzili próshtant.
15 Hodáwanday shográ begerátant,
áiay mehr o
pa baniádamá áiay bákamálén káráni sawabá
16 ke brenjén darwázagi próshtant o
ásenén bandi goddhetant.
17 Cha wati sarkasshiá ahmak butant o
wati gonáháni sawabá sakki o sórián kaptant.
18 Warákesh gotthá éra nashot o
markay darwázagá rasetant.
19 Nun sakki o sóriáni tahá gón Hodáwandá peryátesh kort o
áiá cha janjálán rakkéntant.
20 Wati hokmi ráh dát o dráhi kortant o
cha kall o kaddhá rakkéntanti.
21 Hodáwanday shográ begerátant, áiay mehr o
pa baniádamá áiay bákamálén káráni sawabá.
22 Shogrgozáriay korbánig bekanátant o
gón shádmániay sawtán áiay káráni kessahá byárátant.
23 Hamá ke gón bójigán daryáyá shotant,
hamá ke ápáni sará sawdágeriesh kort,
24 Hodáwanday káresh distant,
mán johlánkián áiay hayrán kanókén kár.
25 Áiá habar kort o tuppánén gwáté átk o
daryáay chawli chest kortant.
26 Bójig borzád tán arshá shotant o
jahlád tán johlánkián kaptant o
cha janjálá áyáni arwáh áp but.
27 Sharábiáni paymá tattarag o thagal waragá laggetant o
áyáni sajjahén ezm o honar gár but.
28 Nun sakki o sóriáni tahá gón Hodáwandá peryátesh kort o
áiá cha janjálán rakkéntant.
29 Tuppáni érmósh kort o
daryáay chawl neshtant.
30 Tuppán ke ér nesht, gal butant,
dém pa hamá tayábá rashónii kortant ke wat rawagesh lóthet.
31 Hodáwanday shográ begerátant, áiay mehr o
pa baniádamá áiay bákamálén káráni sawabá.
32 Mardománi mocchiá áiá satá bekanátant o
kamásháni majlesá tawsip.
33 Á kawrán gyábána kant,
tachókén chammagán, hoshkáwagén zemin o
34 kesht o keshári zeminán sorága kant,
óday jahmenendáni badkáriay sawabá.
35 Gyábánán gwarma kant o
hoshkén zeminán, tachókén chammag.
36 Shodigi áwort o hamódá jahmenend kortant o
áyán shahré ábád kort o neshtant.
37 Áyán dhagár kesht o anguri bág ábád kort
ke báz bar o samaresh dát.
38 Áiá barkat dátant o á sakk báz géshter butant,
naeshti ke dalwatesh kamm bebant.
39 Nun á kamm tarrán o wár o zár butant,
cha ázár o janjál o gamá.
40 Hamá ke sharapdárán bésharapa kant,
ái zort o béráhén gyábánán darpadar kortant.
41 Bale hájatmandi cha sakkián dar kortant,
áyáni kahóli ramagáni paymá báz kortant.
42 Nékdelesha gendant o shádmánia kanant o
har badkár wati dapá banda kant.
43 Harkas ke dáná ent, é kárán bechárit o
Hodáwanday pormehrén káráni sará sharriá pegr bekant.