108
Hodá ke gón ent, sóbéna bén
Sawté. Dáuday Zabur.
1 Mani del jam ent, oo Hodá!
Cha delay johlánkiá sawta janán o tará názénán.
2 Oo soróz o changán! Ágah bét.
Man bámgwáhárá ham cha wábá páda kanán.
3 Kawmáni nyámá tai shográ gerán, oo Hodáwand!
Darkawmáni nyámá tará názénán,
4 ke tai mehr báz ent,
cha ásmánán borzter,
tai wapádári tán jambarán ent.
5 Oo Hodá! Ásmánáni sarborá tai mazansháni názénag bát o
sajjahén zeminá tai shán o shawkat sar bát.
6 Gón wati rástén dastá berakkén o maná passaw beday
tánke hamá mardom berakkant ke tará dóst ant.
7 Hodáyá cha wati pákiá habar kortag:
“Sóbéna bán o Shekémá bahra kanán o
Sukkótay daragá pa wat kadd o kesása kanán.
8 Galyád manig ent o Manassi manig,
Epráim mani jangi koláh ent,
Yahudá, bádsháhiay asá o
9 Muáb dasshódi trasht,
Edumay sará wati swásá chagala dayán o
Pilistiahay sará wati péróziay gwánká janán.”
10 Kay maná pasilbandén shahrá kárit?
Kay tán Edumá mani rahshóna bit?
11 Oo Hodá! Taw hamá naay ke márá yalahet kortag?
Nun gón may lashkarán hamráha nabay?
12 May dozhmenáni démá márá madat kan,
ke ensánay komakk náhudag ent.
13 Hodá ke gón ent, sóbéna bén,
hamá ent ke may dozhmenán pádmála kant.