110
Mani rástén némagá benend
Dáuday Zabur.
1 É Hodáwanday paygám ent pa mani Hodáwandá:
“Mani rástén némagá benend
tán hamá wahdá ke tai dozhmenán
tai pádáni chéray padag o chárchóbahé bekanán.”
2 Hodáwand cha Sahyuná tai zóráwarén asáyá shahára dant o gwashit:
“Wati dozhmenáni nyámá hákemi kan.”
3 Á róchá ke taw wati lashkará moccha kanay,
tai mardom pa shawké góna bant.
Gón pákiay shán o zébáiá
tai warná tai gwará káyant,
chó ke nód cha bámgwáhay bátená.
4 Hodáwandá sawgend wártag o
pashómana nabit, ke:
“Taw tán abad dini péshwáé ay,
Malkisedikay hesábá.”
5 Hodáwand tai rástén dastá ent,
wati gazabay róchá bádsháhána droshit.
6 Kawmán sezá dant,
zeminá cha láshá porra kant o
sajjahén zeminay hákemána droshit.
7 Ráhá, cha kawréá ápa wárt o
sóbéna o sarbolanda bit.