111
Hodáwanday kár rást o pa adl ant
 
Hodáwandá benázénét, Halléluyá.
Cha delay johlánkiá Hodáwanday shográ gerán,
nékdeláni diwáná, mocchiay nyámá.
Hodáwanday kár mazan ant,
harkasay delá ke neshtagant,
áyáni sará pa sharri pegra kanant.
Áiay kár shándár o porshawkat ant o
áiay adl tán abad barjama mánit.
Áiá wati bákamálén kár yádgár kortagant,
Hodáwand mehrabán o rahm kanók ent.
Á hamáyán waráka dant ke áiay torsesh delá ent,
wati ahd o karárá tán abad yáta kant.
Wati káráni zóri wati kawmárá pésh dáshtag,
darkawmáni mirási wati kawmárá dátagant.
Áiay dastáni kár rást o pa adl ant o
sajjahén rahbandi porehtebár.
Abad tán abad mohr o mohkam ant,
pa rásti o tachki kanag butagant.
Áiá wati kawm móketag,
tán abad wati ahd o karári barjam dáshtag.
Áiay nám pák o bákamál ent.
10 Hodáwanday tors dánáiay bendát ent.
Hamá ke áiay rahbandáni randgiriá kanant,
áyán sharrén zántkária rasit.
Tán abad satá hamáiayg ent.