112
Hodádóstáni bahtáwari
1 Hodáwandá benázénét, Halléluyá.
Bahtáwar ent hamá ke Hodáwanday tors áiay delá ent,
hamá ke áiay hokmi sakk báz dósta bant.
2 Áiay nasl o óbádag zeminay sará porzóra bant,
barkat nékdeláni padréchá rasit.
3 Áiay lóg cha mál o melkatá porra bit o
áiay pahrézkári tán abad barjama mánit.
4 Pa nékdelán mán tahárókiá ham rozhna drapshénit,
á mehrabán, rahm kanók o ádel ent.
5 Bakshendah o wámdehén mardomay ásar sharra bit,
hamá ke wati kárán pa ensápa kant.
6 Chéá ke á hechbar larzénaga nabit,
pahrézkárén mardomé tán abad yát kanaga bit.
7 Á cha badén hálána natorsit,
deli jam ent, tawkali Hodáwanday sará ent.
8 Áiay del mohr ent, natorsit,
néth wati dozhmenáni shekastá gendit.
9 Gón garib o nézgárán béhesáb bakshendah ent,
áiay pahrézkári tán abad barjam ent.
Áiay kánth pa sháné borz kanaga bit.
10 Badkára gendit o hezhmnáka bit,
cha zahrá dantána droshit o ápa bit,
badkáray wáhag námoráda bant.