137
Hodáwanday sawtán chón jata kanén?
 
Bábelay kawráni kashá,
má nesht o grét,
wahdé má Sahyun yát kort.
Má drachkáni sará
wati soróz o chang dratkant,
ke may bandig kanókán márá gwasht: “Sawt bejanét,”
ke may ázár dayókán cha má shádehiay sawt lóthet.
Gwashtesh: “Pa má cha Sahyunay sawtán yakké bejanét.”
 
Má ke darándhéh én,
Hodáwanday sawtán chón jata kanén?
Oo Urshalim! Agan man tará shamosht,
mani rástén dast wati honará beshamóshát.
Mani zobán nokká belecchát
agan tará yát makanán o
agan Urshalimá wati masterén shádehi sarpad mabán.
 
Oo Hodáwand! Yátá bedár
ke Urshalimay kapagay róchá Edumián ché kort.
“Próshéti” áyán gwasht,
“cha boná próshéti.”
 
Oo Bábelay jenekk!* Taw zutt dém pa tabáhiá raway,
bahtáwar hamá ent ke tará sezá dant,
hamá chizzáni sezáyá ke taw gón má kortagant.
Bahtáwar hamá ent ke tai chokkána zurit o
taláráni sará jant.
* 137:8 Bábelay jenekk, bezán Bábelay nendók.