138
Hodáwanday shográ gerén
Dáuday zabur.
1 Oo Hodáwand! Cha delay johlánkiá tai shográ gerán,
hodáyáni bárgáhá tará pa sawta názénán.
2 Dém pa tai pákén parasteshgáhá kóndhána kapán o tai námá názénán
pa tai mehr o wapádáriá
ke taw wati nám o wati mohrén ahd o karár
cha sajjahén chizán géshter mazani bakshátag.
3 Har wahdá ke tará gwánkon jatag taw maná passaw dátag,
mani del mazan kortag o maná zór o wák bakshátag.
4 Hodáwand! Jahánay sajjahén bádsháh tai shográ begerátant,
hamá wahdá ke tai habará eshkonant.
5 Tai káráni satáyá sawt bejanátant,
ke Hodáwanday shán mazan ent.
6 Harchont ke Hodáwand mazanshán ent,
bale békebrán pa rahma chárit o
gorunákán cha durá pajjáha kárit.
7 Harchont ke sakki o sóriáni tahá gardán,
bale taw maná zendaga dáray.
Taw mani dozhmenáni hezhmay helápá wati dastá shaháray o
gón wati rástén dastá maná rakkénay.
8 Hodáwand maná rakkénit.
Hodáwand! Tai mehr abadmán ent,
wati dastáni kárán band makan.