Bafut 2 Jɔn 1

Àŋwàꞌànə̀

JƆN

yi ayòŋtə̀

ǸJIꞌÌNNǓ AŊWÀꞌÀNƏ̀ YÛ

A aŋwàꞌànə̀ yû aa a lɛ ŋŋwàꞌànə Jɔn Ŋ̀gàŋntoò Kristo, mə twoŋə nii nɨ “Ǹdɨ̀ɨ̂ ǹdânwì” aa, ŋghɛɛ nɨ a mbo “ǹdè yìi mə Nwì à tsɔ̀ꞌɔ̀” bo bɨ̀ bɔɔ̀ bì.

À lɛ ŋŋwàꞌànə̀ aa a nswoŋ mə àkɔ̀ŋnə̀ à nɨ̂ mâ ànnù yìi mə à tswe a tɨtɨ̀ɨ bə̀ a mûm ŋ̀ghòtə̂ bɔɔ bɨ Kristo aà. Bə̀ bìi mə bɨ tswe nɨ̂ àkɔ̀ŋnə̀ aa bɨ yuꞌunə ndɨꞌɨ Nwî ŋ̀kɨɨ ŋkɔŋnə waa bo nɨ bo (5,6). Jɔn à lɛ ŋkɨ ŋwaꞌanə aa a ŋwàꞌàsə bə̀ ǹloŋ ŋ̀gǎŋndɨ̀ꞌɨnnǔ mbweꞌesə̀ jìi mə ɨ lɛ sɨ dɨ̀ꞌɨ̀ nɨ̂ ɨbaŋnənnù ǹloŋ Kristo aà. Ma buù bə̀ ŋkɨ mbə aa ŋgǎŋnto Kristo jya mə bɨ twoŋə nɨ bɨ̀Gnostics aà. Bɨ swoŋə̀ nɨ mə kaa Kristo à lɛ ŋwaꞌà aa a mûm ǹjyǎnù zì. (Yə annù yìi mə bɨ swoŋ nloŋ bɨ̂Gnostics a nɨ Ǹjiꞌìnnǔ Mɨ̀ghàà, bo nɨ Ǹjiꞌìnnǔ 1 Jɔn aà.) Jɔn à lɛ ntɨgə nswoŋ mə tâ ŋù tsù à tsuu ŋgǎŋndɨ̀ꞌɨnnǔ mbweꞌesə̀ ma jû a nda yu lǒ kwɛrə, ǹtsuu waa burə tsàꞌàtə tsàꞌàtə̀ tǎ waꞌǎ ɨbɨ̂ waa lô m̀beꞌe (9,10).

Bɨ yatə̂ àŋwàꞌànə̀ yû aa laà:

1. Ǹjiꞌìnnǔ aŋwàꞌànə̀ yuà 1-3

2. Àkɔ̀ŋnə̀ a nɨ mâ ànnù a tɨtɨ̀ɨ bɨ̀Krisèn 4-6

3. Àwàꞌàsə̀ ǹloŋ ŋ̀gǎŋndɨ̀ꞌɨnnǔ mbweꞌesə̀ 7-11

4. Ɨ̀nnù jìi mə Jɔn à lɛ nswoŋ a nlwìꞌìsə aà 12-13

Àtsàꞌàtə̀

1 Àŋwàꞌànə̀ yû a lo aa a mbo mə̀ ǹdɨ̀ɨ̂ ǹdânwì, ŋ̀ghɛɛ nɨ a mbo wǒ Ndè yìi mə Nwì à tsɔꞌɔ aa bo bɨ̀ a mbo bɔɔ̀ bo bìi mə mə̀ kɔ̌ŋ tsiꞌǐ annù nɨ̂ŋkoŋ aa, kaa a ghuu aa a sɨ̀ tsiꞌì mə̀ kɔ̂ŋ, a kɔ̀ŋ bìꞌi bɨ̀ bə̀ bɨ̀tsɨ̀m bìi bɨ zi annù nɨ̂ŋkoŋ aà, 2 ǹloŋ mə annù nɨ̂ŋkoŋ ma ya a lwiꞌi a mûm ǹtɨɨ bìꞌi ɨ kɨɨ tswe biꞌi bo nɨ̂ŋkoŋ aà.

3 Tâ ɨ̀bɔ̀ŋ, nɨ̂ ŋ̀ko mɨ̀lɨ̀ŋnə̀, nɨ̂ m̀bɔɔnə yìi mə ɨ lǒ a mbo Nwìŋgɔ̀ŋ Tà, bo bɨ̀ a mbo Yesu Kristo Mû Tà aa, ɨ̀ ka tswe a mbo bìꞌinə̀ a mûm annù nɨ̂ŋkoŋ nɨ̂ àkɔ̀ŋnə̀.

Ànnù nɨ̂ŋkoŋ bo bɨ̀ àkɔ̀ŋnə̀

4 Mə̀ lɛ naŋsə ndorɨtə a nyə mə bɔɔ̀ bo bǐ mɔꞌɔ bɨ yòŋə annù nɨ̂ŋkoŋ ya, tsiꞌì wa ajàŋ mə Taà à lɛ ndɨꞌɨ a mbo bìꞌinə̀ aà. 5 Tsɨ̂tsɔ̀ŋ, mə buꞌu nɨ̂ m̀bo a mbo wǒ ndè, mə bìꞌinə̌ aa ŋkɔŋnə biꞌinə̀ nɨ bìꞌinə̀; kaa mə̀ sɨ aa ndɨ̀ꞌɨ yì m̀fii ŋwàꞌànə̀, mə kwatə ya yìi mə̀ lɛɛ̀ m̀foo mfa a mbo bìꞌinə̀ a mbìì aà. 6 Àkɔ̀ŋnə̀ a bə aa mə, bìꞌinə̀ ka nyuꞌu ndɨꞌɨ Nwî; àa ǹdɨꞌɨ ya mə nɨ̀ lɛ mfòò ǹuꞌu a nlɔ̀gɨ̀nə, ɨ bə aa mə nɨ̀ ka ntswe a mûm àkɔ̀ŋnə̀.

7 Wa ŋgǎŋmbweꞌesə̀ jî ghàꞌàtə̀ ɨ fɛ̀ꞌɛ̀ mə a mbi, mbə bə̂ bìi mə kaa bɨ sɨ̀ bii mə Yesu Krito à lɛ mfɛ̀ꞌɛ a mbi aa nɨ̂ ǹjyǎnu ŋù mɨ̀sɔ̀ŋə̀; wa àjàŋə̀ ŋû ma yû à bə̀ aa ŋù m̀bweꞌesə̀ ŋ̀kɨ mbə ŋgàŋnto Kristo wâ. 8 Nɨ̀ ka ntsyɛsə ghu ta tsùu lǒ bwɛ annù yìi nɨ̀ fàꞌà mə̂ ǹtswe nɨ yu aà, tǎ yǐ bàŋnə kwɛrə mɨtsɔꞌɔnə̀ mɨ afàꞌà a nɨ lunə. 9 Nɨ̀ zi mə ŋù yìi mə à ghɛ̀ɛ nɨ̂ m̀bìì kaa waꞌà nɨ̀ ɨ̀nnù jya mə Kristo à lɛ ndɨ̀ꞌɨ̀ aa yòŋə̀ aa kaa à sɨ̀ nɨ Nwì tswê. Ŋù yìi mə à lwiꞌi a mum ɨ̀nnù jya jìi mə Kristo à lɛ ndɨ̀ꞌɨ̀ aa, ma waà ŋû à tswe nɨ̀ Nwìŋgɔ̀ŋ Tà bo Mû yì. 10 Maa ajàŋ mbə ŋù tsù a zi a mbo bù ŋ̀kaa waꞌa aa ma yû ànnù ka ndɨꞌɨ nɨ̀ tsee lǒ bii tâ à kuu a nda bù, kə̌ bii tsàꞌàtə̀ yi; 11 ǹloŋ mə ŋù yìi mə à tsàꞌàtə yi aa a tɨgə mboonsə aa yi mə tâ bo yu ka ŋghɨrə ɨnnù jî bɨ jya mə a ghɨ̀rə̀ aà.

Nɨ̀ghàà ni nlwìꞌì ǹjɨ̀m

12 Mə̀ tswe nɨ̀ ɨ̀nnù jî ghàꞌàtə̀ a nswoŋ a mbo bù, la kaa mə̀ aa waꞌà ŋ̀wàꞌànə a nɨ paper nɨ ink, mə̀ wàꞌàtə mə boŋ mə̀ yǐ mbàŋnə̀ ǹzi nyə ghuu bìꞌinə̀ ghaànə̀ nɨ̂ ǹtsù. Ma mùu ajàŋ tâ nɨ̀dorə̀ niꞌinə̀ tâ nɨ̀ luu.

13 Bɔɔ bɨ mumaà ghùù yî màŋgyɛ̀ wa yìi mə Nwì à tsɔ̀ꞌɔ̀ aa, bɨ too àtsàꞌàtə̀ a mbo bù.