18
Babilon i subu saban arixe
1 Io, melamu xö ina na, e xo pere a önga angelo xabise ixo önan su meriso xö watmaep. Ma ixo kip a kinis ne warkurai taxin. Ma a sisiek möxö mariris se ine ixo ömaras a öxöno lagunon.
2 Ma ixo kup lömö saxit bira,
“Iri subu. Iri subu, ina Babilon taxin.
Abo tano saban ma abo tadak saban te kisisik im pingan.
Mabo mangana pun saban nang tobo mimixenin, idi tobo xisixis bölök ee.
3 Iri subu bira, möxösa, abo kantri xirip tere inim a wain lölös se ine bara rue idi ra wewet abo tatalien ne ilawa re ine.
Ma abo sisila raxin möxö öxöno lagunon toxo pet a tatalien ne ilawa me ine.
Me idi ewe nang tobo misik mabo lalaa, toxo kip abo kinis ne orong meringan te ine, möxösa, ixobo xukun abo lalaa deek saxit.”
4 Io, e xo ölangen öbaling önga kinup kabise meriso xö watmaep ma ixo tengen,
“Mum moro wan kalik ine, abo nangadi re e! Moro miang!
Mum bele laxa xöbo magingin saban te ine.
Me mum bele oxe lo abo kinadik ke ine.
5 Abo magingin saban te ine iri wöwö kaa im uruso lömö xö watmaep.
Me God iri döxömen lo öbaling abo sasaban te ine.
6 Mum morobo pet tö ine xarnang ine ixo pet tö mum.
Mum morobo balu wuxus öraxin urungan te ine a lasa ixo pet tö mum.
Ixo tabaa e mum ma önga tubon ne kinadik.
Io nang, mum morobo tabaa ine ma ninöng ne tubon ne kinadik.
7 Mum morobo balu wuxus sö ine mabo kinadik ma a tapunuk eöt mabo mangana lalaa deek saxit nang ixo tabaa öbaling iat ine min.
Ma ixo tengen öbaling ke ine iat bara,
‘E a önga kwin.
Ma kaim bara e a möxösö.
Me e kebeöt ta tapunuk.’
8 Io nang, inabo mangana eler irabo wanot pösöt pasaxirin ine.
Irabo meset, irabo tapunuk, ma irabo örasen a irilöng taxin.
Ma irabo söt kabobo xö ia sösöt, möxösa, God, a Orong, ewe i kure sik ine bie, a lak lölös ine.
9 “Abo tene sisila raxin möxö öxöno lagunon toxobo ilawa me ine. Ma toxobo arixe me ine rua xikip lo abo lalaa deek saxit. Ma nang bara idi tabo pere a taba möxö ia sösöt i söngöt ökabobo ine, idi tabo gee, ma tabo tapunuk lamun ine.
10 Idi tabo tuu rewe xalik ine me idi tabo gee, möxösa, idi te burin abo kinadik ke ine. Io nang, tabo tengen bira:
‘Maris, maris sö nöngön, Babilon,
nöngön ina lagunon taxin
ma ina lagunon lölös!
A ömokorot te nöngön iri wanot pasaxit iat mon!’
11 “Inabo tene misik möxö öxöno lagunon tabo gee ma tabo tapunuk kö Babilon, möxösa, kaim im pe öng kua xukun öbaling abo lalaa re idi möxö misik.
12 Kaim pe öng kua xukun abo gol te idi, abo siliwa re idi, abo wat mamaran te idi, ma abo karalo ne kalang ke idi. Ma re öng i karabo kun bölök abo mangana sisige deek, abo sisige nang a marana i kakaa, abo sisige nang a lak dadan, abo mangana lalaa deek te pet ma ngisine wawaguai, bara a iaa nang a marana i kakaa, bara a baras, bara xönö aen, bara wat deek.
13 Ma kaim pe öng bölök kua xukun abo mangana laie ibo önamnamienin a nien, abo mangana lalaa i sixine deek, abo wain, abo wel ne olip, abo irine wit, abo bulmakau, abo sipsip, abo os, abo karis, ma abo nangadi rua tultul.
14 “Me idi tabo tengen te ine, ‘Abo lalaa deek u xo mamaa bara örobo kip lo, idi tere kawam kalik nöngön. Abo tuluwok ke nöngön ma abo maririsine lalaa idi tere kawam esexere bölök. Nöngön ökorobo pere lo öbaling inabo lalaa.’
15 Ma abo tene misik möxö inabo lalaa ewe nang toxo kip a oleleng ne tuluwok kalik ina lagunon taxin, idi tabo tuu rewe, möxösa, idi te burin abo kinadik ke ine. Me idi tabo gee ma tabo tapunuk.
16 Me idi tabo xukup bara,
‘Maris, maris se nöngön, nöngön a lagunon taxin.
Nöngön u xobo sige abo mangana sisige deek nang a marna a lak kakaa.
U xobo usige öbaling nöngön ma gol ma abo wat mariris ma abo karalo ne kalang.
17 A kinis taxin ne orong ke nöngön biringan iri kawam esexere pasaxit iat mon!’
“Ma abo sisila möxö mön, ma abo nangadi ewe nang tobo önan kö rasi, ma abo tene tinörön möxöbo mön, me idi xirip ewe nang idi tobo misik mabo lalaa möxö rasi, tabo tuu rewe.
18 Ma nang idi tabo pere a taba kong möxö ia sösöt nang i söngsöngöt ine, idi tabo tengen, ‘Kaim im pe lagunon taxin kabise i eöt ma ina lagunon taxin na.’
19 Idi tabo tewe öxaa a kabus köbo öxöno idi rua osen a tapunuk ke idi, ma tabo gee ne tapunuk, ma tabo kup lömö saxit bira,
‘Maris, maris sö nöngön, a lagunon taxin!
Idi xirip nang toxobo önan eli xöbo mön te idi xö rasi, toxo kip abo kinis ne orong ke idi meringan kö kinis ne orong ke ine.
Iri kawam esexere pasaxit iat mon!
20 Mum puso lömö xö watmaep, morobo mana axanan ulamun ina nang i wan pösöt ine.
Mum abo madakdak ne nangadi runon te God ma abo aposol, ma abo propet, morobo axanan bölök.
God iri kure ine eöt ma abo tatalien saban te ine nang ixo pet tö mum.’ ”
21 Io, a önga angelo lölös ixo rarik öxaa önga wat taxin saxit ma ixo tewe ösu uruo xö rasi. Ma ixo tengen,
“Idi tabo tewe ögarin ösu ina lagunon taxin Babilon bira.
Ma tekarabo pere öbaling ine.
22 Idi toxobo ölangen abo sinö mariris köbo tene sinö ma abo tene se ap ma abo tene mas tulat ma abo tene mas tauu.
Ma lamun idi tekarabo ölangen öbaling idi meringan kaluluonin nöngön.
Ma tekarabo pere öbaling abo tene tinörön köbo mangana tinörön kirip pingan kaluluonin nöngön.
Me idi tekarabo ölangen öbaling bölök idi nang tobo gigise abo irine wit tingan kaluluonin nöngön.
23 A bibio möxö laam i karabo mararang baling kingan kaluluonin nöngön.
Ma a inöno abo alolo maxat, takarabo ölangen öbaling idi ringan kaluluonin nöngön.
Abo tene misik ke nöngön toxo abo duöng taxin saxit möxö öxöno lagunon.
Nöngön u xo lamus öröxröxö lo abo kantri xö axana bung u xo piörin idi.
24 God ixo ömokorot e Babilon, möxösa, toxo pere lo abo dee möxöbo propet ma möxöbo madakdak ne nangadi runon te God tingan kölöme xö ina lagunon.
Masa! Idi toxo pere lo abo dee re idi xirip pingan nang toxo sexomet kö öxöno lagunon.”