19
A Orong i ömokorot e Babilon
1 Io, melamu xö ina na, e xo ölangen a ginee eöt ma börbörön möxö marakörö raxin tuso xö watmaep. Me idi toxo xukup bira,
“Ire ta ölet a Orong!
I maras bere God te ire a tene Aöro ine, ma i uruoxe a mariris ma a lölös,
2 möxösa, nang irabo kure a öng, a warkurai te ine i turunon ma i töxödös.
Ta ölet ine bira, möxösa, iri ömokorot a tene ilawa raxin nang ixo silien ögarin a öxöno lagunon ma a tatalien ne ilawa re ine.
God iri balu wuxus ina ilawa, möxösa, ixo tee ömet abo tultul te ine.”
3 Me idi toxo kup baling bira:
“Ire ta ölet a Orong!
Iri söngöt ökabobo a ilawa ma a taba möxö ia sösöt i önan kaa ma i karabo kawam.”
4 Io, a nine sangaun ma nit ne duöng taxin ma nit ne laa to toxo subu su ma toxo lotu wösöt e God ewe i kisisik kö kinis ne king. Me idi toxo tengen bira,
“I turunon! Ta ölet a Orong.”
5 Io, a inöno a öng ixo wanot meriso xö kinis ne king ma ixo tengen,
“Mum abo tultul kö God,
ewe nang mo ii ine,
mum kirip abo maris mabo orong,
mum morobo mana ölet ine.”
6 Io, e xo ölangen a ginee xarnang a marakörö raxin, ixo börön xarnang a tawirne dalun taxin ma barawagas taxin, me idi toxo xukup bira:
“Ta ölet a Orong,
möxösa, e God, a Orong ke ire, nang ine mabo lölös kirip, iri kip a kinis ne king.
7 Ire tabo mana axanan ma tabo söwöng,
ma tabo ii öraxin ine,
möxösa, a bung ne inalolo möxö Bak kö Sipsip iri wanot im,
ma a une re ine iri tagure öbaling ine iat tua inalolo.
8 Me idi tere isik abo sisige deek kö une.
Inabo sisige i madakdak ma i sisiek.”
(Ma i osen a töxödösine tatalien möxöbo madakdak ne nangadi runon te God.)
9 Io, a angelo ixo tengen te e bara, “Örö geet bira, ‘Irabo deek kö idi ewe nang te pixe idi rua nuanot kö nien möxö inalolo xö Bak kö Sipsip.’ ” Ma ixo tengen bölök bara, “Ina na abo tinenge runon te God.”
10 Io, e xo subu su xö pu xö nine xexene bara arabo lotu wösöt ine. Inexalik ixo tengen tö e, “U bele pet biringan! Iraa xirip mon a nine tultul te God arixe ma abo töm mabo saxam ewe nang tobo mumuu a turunon nang Jisas ixo osen. Örö lotu wösöt e God, möxösa, a turunon nang e Jisas ixo osen a unine möxöbo tinenge ne propet.”
Jisas irabo wanot baling
11 Io, e xo pere a watmaep ixo tamasawang sik ma ringan ee a önga os pidien, ma önga tödi ixo xisin sik ine. Me idi toxo tengen ina tödi bara, “A Öng ibo Wewet Eörin abo Tinenge re Ine” ma “Öng i Turunon.” Ma ina tödi ibo mumuu a tatalien töxödös nang i erese ma i pet warkurai.
12 A nine marna i eöt ma kamene ia sösöt, ma oleleng ne bubuan ne king kö öxöno. Ma öng a ese toxoro geet lömö re ine ma kaim pe öng i ösöxö sik ina ese, ma lamun ine xalik mon.
13 Ixo sige sik a sisige ma i wöwö ma dee. Ma esene bara, Tinenge xö God.
14 Abo umri meriso xö watmaep toxo mumuu ine, me idi toxo xisin sik abo os pidien me idi toxo sige sik abo sisige pidien i madakdak.
15 Ma önga sele aan ixo wan su möxö ngalna ma ina sele rua ögarin abo kantri. Ma öng nang ixo xisin ina os irabo kis ne king ma irabo kure ölölös idi. Irabo pas gigise idi ma laie raxin te God nang ine ma lölös kirip, xarnang a öng i pas gigise abo pasuno wain.
16 Ma toxoro geet a esene xö sisige re ine ma xö lawana xexene ma i bira,
A King Taxin möxöbo king kirip
ma a Orong Taxin möxöbo orong kirip.
17 Io, e xo pere önga angelo ixo tuu sik kö marana xaken, ma ixo kup lömö saxit urungan köbo pun kirip nang idi tobo wawawaa ruso lömö xö mango ma i tengen bira, “Moro miang, moro kis etok kö pet nien taxin te God,
18 rue mum pa enen abo pinesine idi abo king, abo umri raxin, abo duöng lölös, abo os me idi nang tobo xisxisin idi, ma abo pinesine nangadi xirip, idi abo tultul me idi ewe nang tokobo kis kö ene a lölös möxö önga orong, ma abo orong ma abo maris.”
19 Io, e xo pere a mawak ma abo king möxö öxöno lagunon arixe ma abo umri re idi toxo wanot etok arixe rua inarse ma öng ewe nang ixo xisin sik a os arixe ma abo umri re ine.
20 Ma öng ewe ixo xisin a os ixo töndik a mawak, arixe ma propet töxö ewe nang ixobo wewet abo uxileng ne auwuwus sua gene a mawak. Ina propet töxö ixoro rörörön arixe minabo uxileng kua ömamang lo abo nangadi nang idi toxo kip lo a uxileng kö mawak ma toxo lotu wösöt a petpuo re ine. Ma öng ewe ixo xisin a os ixo tewe toin idu urungan kö mara möxö ia sösöt, a solam ma kamene ia angen könan.
21 Ma öng ewe ixo xisin sik a os ixo sexomet idi xabise arixe ma sele re ine nang ixo wan su möxö ngalna. Ma abo pun idi toxo an masii xöbo pinesine idi a nangadi.