31
Yaaweefa uiqaana maqa kinaa ainaina auqifandinna fasiqausa mara quqanau.
(Raf 35:30–36:1)
1 Yaaweefa kafaa Mooseena qimaminoo qinau.
2 Moosee qinee innikinaana Beesareerana utaaqeeqa. Mifa Urina amaaku Hurana anaiqi Yudana oosanakinaafa maridanoo.
3 Qinee qeeqa maraquna afeeka aaku amaqeeqa. Qinee irirana faqa aiqama ainainirana akoofasaikira saika amiqa. Aiqama amiqira ainaina auqirana akoofasaikirana faqa amiqa.
4 Mifa koorannoo faqa siruaannoo faqa booroosannai faqa oonu mafi irisaidanoo oosana oosana ainaina akoofasauqa akara rimaria irirana faqa auquani feera amiqa.
5 Qinee firaa feefauru aqi maria oonina ateekara oosana faqa saqarinnai ainaina amana auqirana akoofasaikirana faqa Basareerana amiqa.
6 Qinee moo fasiqa Ooqooriabana Aqisamakana amaaku Dannana oosanakinaana mara quqasaananoo Beesareerana faqa ainainiannoo. Qinee akaqausa faqa firaa irirana oosana oosana ainaina auqirana akoofasaikirana nimiqa. Miqimma saanaqa misa qinee qimannimianna aiqama ainainna auquaqeera.
7 Qinee umee marunna uiqaana maaqana faqa moodaanaki kira bukisa faqa mina afu numoo taikannisarana faqa aiqama uiqaana maqakinaa ainainauqa faqa auquaqa.
8 Teeboora faqa minasaa mari ainainausa faqa ramma dirirana amiqira koorannoo auqirana faqa minasaa mari aiqama ainainausa faqa amiqira afundi mari tatufirana suqara qainda faqa auquaqa.
9 Tatufirana suqee maria qaindana faqa mina suqee maria ainainausa faqa niku nisauku nammari uqimaria difaanina faqa mina oosana faqa auquaqa.
10 Misa amiqira qamunnauqa Aaroona faqa mina faiqi namundi faqa aanaiqi kira saikaki maridaqa afisifandinnana faqa auquaqa.
11 Qinindi fee qimasee akunnimaqee fandinna fadameenna faqa adiafaa ira amiqira afundimarina naaquqara oosiranakinaana faqa auqua. Misa auqidaqa qinee qunandee kaimaseeqa auquaqa.
Sabata idooara faasaana maridanoo.
12 Yaaweefa Mooseena qimaminoo qinau.
13 Moosee anee maaqi qimasee Isaraee maqannaa qimannimia. Sabata qini idooara faasaana amiqimandee ireedakai mariaqa. Mi faasaanafa qini faqa inni faqa qambaana naaru naaru maridanoo qinee Yaaweesa inni mara qeeqa faiqí anaasee kunnanara quqannifiqaannoo.
14 Innee qini idooara faasaana naaquqarafa marinara ireeda kai mariaqa. Faiqí moo fannoo sia ireeda marirai mi faasaanna ainaininnana kuqa aruaqa.
15 Qisauku dinni taikasee dinni moodaa marasee 6 faasaana innee inneeqa ainainiaqa. Qisauku dinni ani qaara marasee 7 faasaana firaa idooara faasaana qini naaquqara faasaana maridanoo. Yafee mi faasaanna ainaininnana innee mina kuqa aruaqa.
16 Isaraee maqannaasa innee faqa qinee faqa moodaanaki kunnanara mi faasaanafa uqannifiqaani.
17 Mi faasaanafa inni Isaraee maqannaa faqa qini faqa naaru naaru aqoondikirana koorooi mari faasaanafa mariannoo. Qinee Yaaweesa dinni taikasee dinni ani moodaa marasee 6 faasaanasaa maqa faqa innaaruna faqa auqusee dinni ani qaara marasee 7 faasaana ainainirana quqasee idooaafannanara mi faasaanafa idooara faasaana mariannoo.
18 Anutufa aiqama ufa Mooseena Sinai aaqanasaa qimami taikaseenoo qaara ooni ausiriranasaa Anutufa narí asaukunnai sanda ufa akara rumaqoona aminau.