32
Faiqí anaasee koorannai burimakau akoona aanaaqi auqiqau.
(Lo 9:6-29)
Mooseefa aaqanai kisaaqasaa ooru marufaqa Isaraee maqanna faiqí anaasee Aaroonafa maruqoo suqumaree aniree Aaroona maaqi qimasee qimamiqau. Maa fasiqafa maasa Isipa maqa maaqaindari qifiqee anufa naqaafee imari faqee maasa sia iridaqa. Minara anee moo anutuna auqusainanoo maasa indaarunnikamma nimaqaani.
Aaroonafa misa ufa iriseenoo qinau. Inneeqa faiqi anaasee naaqookinaa koora faqa fidinaanu faqa tatuseeqa mini qimiaqa. Miqi qufaqa aiqama faiqí anaasee nári naaqookinaana raduku maree mini Aroona amiqau. Amisoofanoo Aaroonafa mina qumareenoo idannai tasirisiri mandeenoo maqasaa burimakau akoona aanaaqi amana auqu qoonaki adiasoofanoo burimakau amana auqinau. Auquseenoo paipanannai mina atiuqa andeeqanau. Miqimmasoofaqa faiqí anaasee qiqau. Isaraee maqannaasa maafa maasa Anutufa maridanoo. Maafa kai maasa Isipa maqannaindari nindiqee anufa maridanoo.
Aaroonafa misa ufa iriseenoo burimakau akoona amana auqirana aaqa tatufira qainda auquseenoo faiqí anaasee qimanniminoo qinau. Duna aiqama suqumaree aniraifaqa oomaqa sakasee naidaqa Yaaweena auqa uqeeraa. Miqi qimasoofaqa iaqoo kananaana faiqí anaasee akaqa aandau mara maree minisee qaindasaa tatufirana faqa Yaaweena faqa moodaanaki kira tatufirana faqa suqaqau. Suqamiseeqa ooqu marifiqa afeeka nammari faqa narana faqa namaseeqa findifiqa aanaaseeuqa faqa manda oosana maraqau.
Yaaweefa misa nindafeenoo Mooseena qimaminau. Anee kai kaqi ooqufua. Faiqí anaasee anee Isipa maqanaindari nifiqee anianausa qini minnisee aaqara oosana maraidammia. Misa doo qinee fuaqee qimasee naamuaqiafanna aana minniseea. Misa koorannai burimakau akoona aanaaqi amana auqusee mina tatufirana suqamiseeqa minara innaaru qidaqa. Misa maaqi qidaqa Isaraee maqanaasa maasa Anutufa maafa maasa Isipa maqannaindari nifiqee anufa maridanoofee qidaqa.
Minara qinee Yaaweesa Isaraee maqannaasa kaaqa ramoo ramaa imariafaqa iridaqa. 10 Doo firaaqoo qini qirana qaifaqa misa kuridi taikasaanaura. Anee sia qiniara qaoo qia. Miqimmaseeqa ani faqa anisaa ani aruakinausa faqa kai amiqi amiqimma nisaanaqa firaa maqannaa marifaranoo.
11 Mooseefa irinoo Yaaweena aanoo qiranara innaarukiqari qaoo qidanoo qinau. Oo Yaawee nanaree anee aneenna faiqí aanaaseera arana qaidanoo fee. Anee firaa afeekannai misa Isipa maqanaindari nifiqee anianafa naqaaifanee aanoo qima nimaqaidanee. 12 Anee miqinaqa Isipa maqannaasa aniara nári kai qimirisee Isaraee maqannaasa nifiqee aaqana aikunni munusee naru taikarara nifiqee fiifoo qifaara. Sia arana qaani aneenna arana qara irirana quandasee sia ummaara aneenna faiqi anaasee nimia. 13 Anee aneenna ainainira faiqiuqa Abarahammana faqa Isakeena faqa Yakooboona faqa kuqaa qima afeekaikira ufa qunnanara oonumafi iria. Anee misara fasaura foora mafifaqa qinee qima afeekaikiafanna maqa maaqana inni nimianauree qinau. Nimisaananoo mi maqa maaqafa innindikamminoo naaru naaru mariannoo fee qinau. 14 Mooseefa miqi qufanoo Yaaweefa narí aranaqara irirana quandasee sia ummaara narí faiqí anaasee niminau.
15 Yaaweefa Mooseena qaara oonisaa akara rumamufanoo mareenoo aaqanaindari afaasai narí maqannaa marunnai ooqu finau. Ausirira ooniqandasaa Anutufa sanda ufa dinni dinni akara rumaqoona uqirafa ooqu finau. 16 Anutufa narí kai mi oonina auquseenoo minasaa sanda ufa akara rinau.
17 Yoosuafa irufaqa faiqí anaasee nariqa uiqaana maqusakiqari faaqa fuisee qida qufanoo iriseenoo Mooseena qima minoo qinau. Qinee rakidaqia ufana iridaqa. 18 Miqi qufanoo Mooseefa qinau. Sia qufoona rira ufa fau maridanoo fau. Sia qiki faafau qirufa fau maridanoo. Idi rarana kai iridaqa.
19 Mooseefa uiqaana maqusa adeedi ooqureenoo nindafoofaqa burimakau aanaaqi amana auqirana faiqí anaasee fusakidaqa idi ree mariqau. Miqi marufanoo Mooseefa nindafoofanoo aranaqoofanoo akara rira ooniqara aaqana aikunni maqasaa aqusoofaqa miqanda rukamiqau. 20 Mooseefa aranaqoofanoo burimakau aanaaqi amana auqirana qumareeqeenoo idaki aqusoofanoo tasiris irinau. Tasirisiri maseenoo andaana rumeeqee nammariki aqusee naaqee qufaqa Isaraee maqannaasa mi nammarina naqau.
21 Miqimandeenoo Mooseefa quandakufanoo Aaroona qimaminau. Maa fasiqa anaaseesa ani naqi fee mamaqaafanee anee maa manda firaa aaqarana misa nifaaqai quqeenee.
22 Miqi qufanoo Aaroonafa Mooseena qimaminau. Oo qini uriqararafa anee sia qiniara aanoo qia. Anee maa fasiqa anaaseesa oosana irimariananoo. Misa kaaqa mandoosana auqarara sandanainai qimariasa maridaqa. 23 Misa qiniara maaqi qia. Maasa maa fasiqafa Mooseefa maasa Isipa maqa maaqaindaraana qifiqee anunaki kambiqai ainainnara sia iridaqa. Anee moo anutuna auqu sainanoo maasa indaarunnikamma qimaqaani. 24 Miqi qiafaqa qinee qimannimiqa koora faqaasa qimiaqee qunaqa uaqee iasa akaqana qimia. Qimiafaqa idaki aqusaunanoo burimakau aanaaqi kambiqeenoo.
25 Mooseefa qafoofaqa Aroonafa eedoo qufaqa faiqí anaasee nariqa namuqaa nifusaa oosana oosana manda oosana maroofaqa namuqaa misara uteetiqiqau. 26 Minara Mooseefa arana qoofanoo uiqaana maqusa kooqiki kikiqamma fufanoo maaqi qimasee nammeera qinau. Aiqamausa yafee Yaaweenaindi kiani qinafa maaqoo aniaqa. Miqi qufaqa aiqama Reefina aiku asauku kai suqumaree miqoo ani mina fiqu fiqumma fiqau.
27 Aniroofanoo Mooseefa maaqi qimasee qimanniminau. Isaraeerana Anutufa Yaaweefa maaqi qimasee aiqamausa inni naakapaidanoo mifa inneeqa rakira paipana mara maree innee uiqaana maqusa dinni kooqindari dinni kooqinni oonuree aniree idaqa unna anutuna amana auqi mariana akiiqara inneeqa nikaqaafasaauqa faqa inneeqa niqoondiuqa faqa inni naaqa mariasa faqa aiqama kuqa naru taikaaqa. 28 Miqi qufaqa Reefina aiku asauku eedoo qimasee mi faasaanna 3,000 fasiqa nariqau. 29 Narusoofanoo Mooseefa kafaa qimanniminau. Innee inneeqa faiqi namufaqa inneeqa nikaqaa fasaauqa faqa naruanara innee Yaaweena aanaiqikirausai kiqa mariafanoo. Miqi mariafanoo Yaaweefa narí amiqi amiqirana inni niminoo.
30 Iaqoofanoo kananaana Mooseefa faiqí anaasee qima niminau. Innee firaa manda aaqarana marasaafaqa aqbee qinee aaqanai kaifaa ooruree inniara Yaaweena iramiriananoo inni aaqarana akiiqara minninisaannoo fee. 31 Miqi qimaseenoo Mooseefa Yaawee funnai aaqanai ooruree qimaminoo qinau. Maa fasiqa anaaseesa firaa manda aaqarara marasee unna qira anutuna koorannai auqusee minara innaaru qiqiiaafanoo. 32 Amanee misa aaqarana akiiqara minninnisaa. Sia minninniseenana qini duqu ani faiqí anaasee faqa ani bukaki akararinoo marina kai rukaa.
33 Yaaweefa iriseenoo qinau. Sia kaiqeesa nuqu qeeqa bukakinaana rukaanaura. Qini ufa rukiee mariasa nuqukai rukaanaura. 34 Doo oonuree faiqí anaasee nifiqamaree qinee qimamiafanna maqa maaqanai fua. Anee iria, qini qangiroo fannoo inni indaarunni kamma nimaqaannoo. Mi fasiqa anaaseesa aaqarana akiiqara ummaara nimianna aukuanafa anidanoo. 35 Miqi qimaseenoo Yaaweefa manda aurirana mi fasiqa anaaseesa niminau. Misa Aaroonara qufanoo koorannai burimakau akoona aanaaqi auqunara miqinau.