17
Yisufa narí faiqi namuara Anutunara rakisinnimaqaannee qu ufafa.
Yisufa mi ufausa narí faiqi namu qimanniminau. Qimannimiseenoo oori innaarunai uqeeraseenoo narí akoona Anutuna innaaruqinoo qinau. Oo qipoo doo qini kuqira aukuana adeedi ranoo maridanoo. Anee aneenna amaaku qini qifaaqa areenarana qimia. Qinee kafaa quandaki kaifaa aninna amianeera qimia. Oo Anutu, anee aiqamausa rakisianneera afeeka eeraarira maraquna qiniki quqaqaananoo. Anee faiqí anaasee qumee rarisameeqaidana qimimariannana qinee misa naaru naaru marirana nimianeera mi afeekana qimiqaananoo maridanoo. Naaru naaru marirafa maaqimminoo maridanoo. Maqasaa fasiqa anaasee misa ani moodaa kuqaa Anutunara irisee mi iriranamau firafa kafaa qini Yisusa ani asauku mundirausara anee diqiqoonausara miqikaimasee irisee mi iriranamau firafa, mifa kai naaru naaru marirafa maridanoo. Qinee maa maqanasaaqaraasa doo ani afaaqa areenarana uqannifiqeeqa. Anee ainainirana qimiannana doo qinee taikaseeqa. Oo qipoo qini mareeqeenana aneenna marianaqoo mara quqaqisee qifaaqa areenarana qimia. Ooqai oosana aroo aukuanna maa maqa maaqafa sia marunaki qifaaqa areenarana qimunnana mina kai kafaa qimia.
Anee maa fasiqausa qini faiqi namu maqasaaqaraa sakinaana qimimarianaqa aniara kooroomannimiqa. Misa anindi maridaqa. Anee misa qimimarianafa mariananoo. Misa ani ufa irisee eedoo qimariasa maridaqa. Doo maqee misa qini aiqama ainaina anisaaqaraana doo iriqa. Anee qimunna ufana qimannimunaqa irisee doo mareea. Qinee anikiqari qumuafannanara faqa misa kuqaa fee qidaqa. Anee qini diqiqoonnanara faqa anoonee qidaqa.
Qinee anee ianannai misara dadaaqianeera innaaru qidaqa, sia kaqiqeesa maqasaaqaraasarau innaaru qidaqau. Anee qimianausara kai anindi maridaqara innaaru qidaqa. 10 Oo qipoo qini aiqama ainaina anindi maridanoo. Kafaa ani aiqama ainaina qinindi maridanoo. Qini qifaaqa areenarafa qini faiqi namusaaqari kooroo idanoo. 11 Doo maqee qinee anee mariannaqoo ooru firaridaqa doo qinee maa maqanasaa taikasee minni ooru fuanauranoo. Misa kaqi maa maqanasaa marifaranoo. Oo naaquqara qikoofa. Ani auqu afeeka eeraarirana misasaa ititannimaqaani. Anee mi auquna afeeka eeraarirana qini qimunafa mifa misasaa ititaani. Ititannimaqasaanaqa maaqanda daanna ramasee moodaanakikiqa mariaqeera. 12 Ani auqu afeeka eeraarirana qimiannana minannai maa kamuqoo misa faqa maridaqa amiqimandee qeeqa faiqi namu rakisidaqa marunaqa maridaqa. Qinee misa ititannimaqeeqa, sia moo fannoo dapikiaqeera. Maaniki fimari fasiqafa Yudasifa mifa kai dapikinoo maridanoo. Sia kaqi dapikinoo, ani ooqeenaa akara anoona kooroo ianifeera dapikinoo. 13 Doo qinee anee ianannai ooru firaridaqa. Qinee maaqoo kaqi marunnaqoo ufa oosana oosana qimannimidaqa qimannimianaqa misa nimuqusakina asasirafa qumbiqanoo marianifeera qimannimidaqa. 14 Qinee ani aufakiana qeeqa faiqi namu qimannimunaqa qimannimiafaqa maa maqanasaaqaraasa akaqausa sia qini ufa irimariasa misa iriseeqa qini faiqi namu fidiaqaamma nimaqaidaqa. Qini faiqi namu ani ufa irisee maqasaaqaraasakinaa iriranara nikooqaidanoo innaarunaindaraa irirana marasaafaqa maqasaaqaraasa minara misa fidiaqaamma nimaqaidanoo. Misa qini daanna raidaqa sia maaqooqaraasau maridau. 15 Oo qipoo qinee aniara sia qini faiqinamu mareeqee moosaa quqaanneera qidaqa. Maaqoo maqasaa mariaqoo kai rakisianeera qimamidaqa, aakaaqaindaraa fasiqa fannoo misa qumaraandoora qimamidaqa. 16 Qinee sia maa maqanasaaqaraasaindi maridaqa, misa faqa qini daanna reeqa sia maa maqanasaa qaraasaindiara foora maridaqa. 17 Oo qipoo aneenna anoona ufannai misa mareeqee aneenaindikia. Ani ufa fannoo andeeqara ufa anoona maridanoo. 18 Anee qini maqasaa diqiqoonnana qinee faqa miqikai iqa quandaki misa maaqanna maaqanna niqiqaidaqa. 19 Qinee misaroo qiqa qeeqa qifaaqa ani amidaqa. Misa faqa nári marirana nirana kuqaa anindi fee qiaqeera miqidaqa anindi mariaqeera miqidaqa.
20 Sia qinee qeeqa faiqi namu maa mariasara kaifau innaaru qidau, maaqanna maaqanna aiqamai misa ufa irisee qiniara irifandinausa misara faqa innaaru qidaqa. 21 Anee faqa qinee faqa moodaanaki marunandee misa faqa maaqanda faqa moodaanaki mariaqeera innaaru qidaqa. 22 Maa maqanasaaqaraasa mina qafamaseeqa qiniara oo kuqaa innaarunaindaraa fee qiaqeera. Anee qifaaqa areenara eeraarirana qimiannana qinee mina maramaree misa faqa nimunaqa misa anindiri qisakoosa daanna reeqa moodaanaki mariaqeera. 23 Qinee misaki marianneera anee qiniki maria, miqimasainaqa kuqaa uqanna moodaanaki mariaqa. Miqimasaanaqa maa maqanasaaqaraasa niqafamasee Oo kuqaa Anutufa Yisuna aqiqanau foo qiaqeera, narí amaaku Yisunara faqa mina faiqi namuara faqa amanamana kai amuqusinoo aididanoommifoo qiaqeera.
24 Yisufa kaqi narí akoonara innaaru qidanoo qinau. Oo qipoo, maa qini faiqi namu anee qimunausa kasooqaqee qini faqa mariaqoo kai mariaqeera didifaqa innaaru qidaqa. Ooqai maa maqa maaqana sia maru aukuanna anee qiniara aidunara anee qifaaqa areenara eeraarirana qimunnana qini faiqi namu kasooqaqee mari iqa oorureeqa qafaaqeera innaaru qidaqa. 25 Oo andeeqara qikoofa maa maqanasaaqaraasa ani ufa sia irimariasa sia aniara iridaqa. Qinee kai aniara iridaqa maa qini faiqi namu anee qini diqiqamaqoonnanara misa iridaqa. 26 Anee qiniara amuqusidana aidimarina qini faiqi namu naundurai faqa marianifeera qimasee aniara maqee kooroo qimasaida qimannimiaafanausa maqee kafaa kafaa qimannimianaura. Maqee qinee faqa misa naundurai marianinnanara innaaru qidaqa.