18
Yisuna qumaroo ufafa.
(Mat 26:47-56; Mak 14:43-50; Ruk 22:47-53)
1 Yisufa miqi qimasee innaaru qimaseenoo narí faiqi namu asukunai Yeerusaree maqusaindari nifiqeenoo Kidaroona noopundu fitaqeenoo dinni afainni saqamakina auqaana andanda ummaqiranaki idooararee qimasee narí faiqi namu faqa oonu marinau.
2-3 Ooqai moomoo kari Yisufa Yeerusaree maqusaindari fimaruqoo fiqau. Yudasifa minni fimarunara irimarufa maridanoo Yisuna ueeqaaninafa mi saqamanara faqa irimarufa miqoo finoo fee qimasee sundiauqa faqa amaana maqasaa rakisimaria firisuaiqauqa faqa Yudasifa eendaki nifiqee finau. Misa uriqararausa faqa, Farisai amaana ufa qimarusa faqa niqiqoofaqa saamu faaqaana indaaiqa asukuna marufaqa qooma qumaroofanoo Yudasifa mi saqamanaki Yisuna qumaraaqee qimaseenoo nifiqee finau.
4 Yisufa aiqama ainaina nariki kambiqaaninnanara irimarufa marufaqa misa oonuroofanoo Yisufa misa noorinni anireenoo iranau. Innee yafasiqanaree randaidee, qufaqa misa qiqau.
5 Yisuna Nasareetee maqannaanara randaidaqa qufanoo Yisufa qinau. Maa qinee misa maridaqa. Yudasifa Yisuna ueeqaaninafa misaki kikiqinoo marinau.
6 Yisufa miqi qimasee nariara kooroomasoonara misa tautumasee rufiaseeqa ninaaqianaindari oonurandeeqa maqasaa aqufiqau.
7 Yisufa kafaa irammirinoo qinau, innee yanaree randaidee qufaqa misa qiqau Yisuna Nasareetee maqannaanara randaidaqa.
8 Miqi qufanoo Yisufa kafaa qinau doo qinee kooroo iqa maana misa maridaqa. Innee qiniara kai randeeaafanoo, maa qini faiqi namu mariasa minnisaifaqa fuaqa.
9 Yisufa narí innaaru qimaru ufafa anoona kambiqaanifeera mi ufana qimanniminau. Mifa maaqi qimasee faasasaa innaaru qinau. Oo qipoo aiqamausa anee qimimarinausa sia misakiqari moo fannoo furufarianifeera. Faasasaa mi innaarunna qinau doo maqee mina anoona kambiqaina misa minnisee qini kai maraaqee qinau.
10 Simoona moo auqu Peetooroofa misa saamu faaqaana qafamaseenoo darifoo qimaseenoo mifa narí rakira paipana kisaaqa qumareenoo amaana maqasaa rakisirana ainainira faiqi aaqamasee asauku uqannai aaqoo aiqama atufu aqinau. Mi ainainira fasiqana auqu Marakusafa marinau.
11 Yisufa mina qafeenoo Peetooroona qimaminoo qinau. Saa, aneenna paipana narí aanaamuki upeekaa. Qini qikoofa manda nammari naannee qimaqoosa anee qiniara sia naannee fee qidanee. Qinee naanaura.
Yisufa Annasana oorini kikiqu ufafa.
12 Yisufa miqi qimasoofaqa Roomma maqannaa sundiauqa faqa misa uriqararafa faqa Yuda maqannaa firisuaiqauqa faqa anireeqa Yisuna qumareeqa sandannai asauku rumbasee afiqeeqa.
13 Kaiafasana maaqaki quqaqau. Kaiafasafa mi aukuannai amaana maqasaa Anutuna aanaiqiki marusa uriqararafa marinau. Annasafa Kaiafasana airaamaku mina maaqaki marunaki munu minaki quqasoofanoo Annasafa ufa indaaru irinau.
14 Ooqai Kaiafasafa narikai tamummaqaseenoo Yuda maqannaasa qimanniminoo qinau Yuda maqannaasa maasakina moodaa fannoo maasa aiqamausa misa nikiaqara kuqinaqa amiqianauree qinau. Mina maaqaki Yisuna quqasoofanoo Annasafa naaree mina ufa irinau.
Peetooroofa Yisunara sia qinee qafaidee qu ufafa.
(Mat 26:69-70; Mak 14:66-68; Ruk 22:55-57)
15 Misa Yisuna rumbamaree fufanoo Simoona moo auqu Peetooroofa faqa Yisuna faiqi namukiqari faiqí moo fannoo faqa misa ninaaqiana nifaqee fiqau.
16 Misa Yisuna afiqee amaana maqasaa aanaiqikirana maaqaki keeqoofanoo nifaqee anu fasiqafa amaana maqasaa aanaiqikirana aqoondi maridanoo kaqi mi maaqanaki keeqanau. Misa Yisuna afiqee mi maqanaki munuseeqa mi sandana idukuseeqa kaqi quqasoofanoo marinau. Peetooroofa maqusai kooqi afainni aqoosai marinau. Nifaqee anu fasiqafa kafaa raudamakinoo kooqisaa rakisimaru manaaqana qimamufanoo kooqi atuasoofanoo Peetooroofa faqa keeqanau. Keeqafufanoo maaqa kooqi adeedi ooru maridanoo qafeemarinau.
17 Maqusa kooqisaa rakisiu manaaqafa Peetooroona qafamaseenoo irammirinoo qinau. Anee Yisuna aqoondi fee qufanoo Peetooroofa qaoo qimasee sia fee qinau.
18 Suara narufaqa ainainimaru fasiqausa faqa firisuaiqauqa faqa Kaiafasana maaqa kooqinni maqusa saqanna idarasee fiqu fiqumma ida tookusiqa marufanoo Peetooroofa misaki oonu keeqafinoo ida qaani marinau.
Annasafa Yisuna irammiru ufafa.
(Mat 26:59-66; Mak 14:55-64; Ruk 22:66-71)
19 Amaana maqasaa Anutuna aanaiqiki marusa uriqararafa Annasafa mifa Yisuna faiqi namuara faqa Yisufa faiqí anaasee qimannimira ufausara faqa mi ufanaramma Annasafa maaqaki Yisuna iree marinau.
20 Yisufa mina ufa iriseenoo maaqi qimasee Annasana qimaminau. Qinee faiqí anaasee moomoo suqimaruqoo kai ufa qimannimimariqia. Suqira maaqaki fee naaquqara amaana maqaki fee faiqí anaasee moodaaqoo suqiraqoo fee miqoo kai qinee naamuaqira ufa aiqama ufa qimannimimariqia. Sia qinee moo ufa kukeeqaranaki qimannimiqiafana. (Innee aaqamasee qini kukeeqaranaki irama qimaqee mariafanoo.)
21 Annasa anee nanaree qini iraidanee. Qini ufa irimariasa irammirinaqa qimamiaqa. Misa qini ufa oosana iridaqa.
22 Miqi qimasoofanoo poorisa moo fannoo asaukusamu Yisuna oori arinoo qinau. Anee nanaree amaana maqasaa rakisirana miqi qimasee qimamidanee.
23-24 Miqi qimasoofanoo Yisufa qimaminoo qinau. Qinee aaqara ufa moo qianana maaqoo mariasa aiqama kooroomasee qimannimia. Qinee andeeqara ufa qunnanara nanaree qini daridanee. Miqi qimasoofanoo Annasafa qinau, innee maana kafaa rumbamaree Kaiafasafinnai afiqee fuaqa. Kaiafasafa amaana maqasaa Anutuna aanaiqikirafa marufaqa mifa maruqoo moo maaqaki minni Yisuna afiqee fiqau.
Peetooroofa kaifaa Yisunara sia qinee qafaidee qu ufafa.
(Mat 26:71-75; Mak 14:69-72; Ruk 22:58-62)
25 Peetooroofa naambeeqai kaqi ida qaanimarufanoo faiqí moo fannoo mina iramirinau. Anee Yisuna faiqi namukiqari marianafee kuqaa fee. Miqi qufanoo Peetooroofa sia fee qinau.
26 Amaana maqasaa aanaiqikirana ainainira faiqi Peetooroofa Marakusana aaqoo ateekoona mina ati fannoo Peetooroona qafamaseenoo qimaminau. Faasai anee saqamai Yisuna faqa marianaqa ani qafaunausa.
27 Peetooroofa mina iriseenoo kafaa qaoo kai qinau. Qaoo qimasoofanoo kookooraana ufa qinau.
Yisufa Piratoona oorinni kikiqu ufafa.
(Mat 27:1-2, 11-14; Mak 15:1-5; Ruk 23:1-5)
28 Kananaana iqaqoofanoo saarisufa namufaqa misa Yisuna Kaiafasana maaqakinaana afiqee Roomma maqannaa kiapana maaqaki munu quqaqau. Yuda maqannaasaa sia kiapana maaqaki keeqaqau. Duna iqaqainaqa maasa Anutuna qangiroo ainnaaqarara qoomaqa naannaqoo fee qimasee kiapafa moo maqannaafa marufaqa afaaqasaaqaraa aisoora maasa qifaaqasaa aqufinaqa qifaaqa mandaikinaqa sia naannoo qimasee rufiee sia mina maaqaki keeqaqau, kaqi naambeeqai madaanai kai mariqau.
29 Roomma maqannaa kiapafa Piratoofa misa nindafeenoo rauda mafufanoo Yisunara irammirinau. Innee nanaree fee qimasaidee maa fasiqanara ufa qidee.
30 Yuda maqannaasa iriseeqa qiqau, mifa sia manda oosana marainaqau sia maree mini ani amiaqini.
31 Miqi qufanoo Piratoofa qimanniminoo qinau, innee inneeqa kai inneeqa sandufamau mina maramaree fuaqa. Yuda maqannaasa mina iriseeqa qiqau, maasa sandufa fannoo maaqinna fasiqausa kuqannaruaqee qinoo maridanoo. Aunirira saqarisaa faiqí nariranara innee Roomma maqannaasa maasara qaoo qimasaidaqa inneeqa kai miqi mariafanoo. Minara maasa Yisuna Piratoo anisaa quqaidaqa.
32 Indaaru Yisufa narí kuqiranara narí faiqi namu qimannimuna mina anoona maqee kambiqeenoo.
33 Piratoofa misa ufa iriseenoo narí koota maqaki kaifaa keeqeenoo Yisunara mai uruannee qimasoofanoo Yisufa Piratoona koota maqaki keeqafufanoo Piratoofa Yisuna irammirinau. Kuqaa fee anee Yuda maqannaasa Karaambaiqee maridanee.
34 Yisufa iriseenoo qimaminoo qinau. Anee aneenna kai fee mi ufana qidanee moo fannoo ani qimamifanee qidanee.
35 Piratoofa minara Yisuna qimaminoo qinau. Anee qiniara Yuda maqannaa fee qimaqimidanee. Sia qinee inni oosana iridaqa. Ani maqannaasa Anutuna aanaiqikirausa uriqararausa misa kai qini maaqaki quqasaafana mariananoo. Anee nana mandoosana maraanaqee miqi fee.
36 Yisufa qinau, qini ququsa sia maa maqa maaqanasaaqaraa ququsa maridanoo. Qini ququsa maa maqanasaa marinaqau qini faiqinamu rakifaqau qini mareeqeefau idukuqisani. Sia qini ququsa maa maqanasaaqaraafa maridanoo.
37 Piratoofa mina iriseenoo kafaa Yisuna irammirinoo qinau, Kuqaa fee anee karaambaiqa moo maridanee. Yisufa mina irisee maaqi qinau. Anee qianandee kuqaa qinee Karaambaiqa maridaqa. Kuqaa anoona ufa kai qimannimirara qinee maa maqanasaa kambiqafi maridaqa. Kuqaa anoona ufara randeemaria fasiqa anaaseesa misa qini ufa iridaqa.
38 Piratoofa mina iriseenoo maaqi qinau, kuqaa anoona ufa qirafa mifa nanee maridanoo. Miqi qimaseenoo Piraatoofa raudamakufanoo Yuda maqannaasa naaramasee maaqi qimasee qimanniminau. Maa fasiqanaki sia arira ainaina moo marifaqa iridaqa.
Piratoofa Yisuna arifandinna ufana eedoo qu ufafa.
(Mat 27:15-31; Mak 15:6-20; Ruk 23:13-25)
39-40 Piratoofa kaqi qimannimidanoo qinau. Aukuana aukuana Anutuna qangiroo ainnaaqarara qoomaqa faasaana qini rumbaranaki mariasa aukuana aukuana moodaakai moodaakai karabusakinaana iduku nimimarunausa maridaqa. Maa aukuanna Yuda maqannaa karaambaiqa idukunnimianauree qufaqa firaa kari faaqarumasee qimamiqa qiqau, sia maana idukua. Barabasina kai idukua. Barabasifa faiqí narinoo rakinoo imarifa karabusaki maridanoo. Mina kai idukua.
(Roomma maqannaasa faiqí narirana oosana maaqimminoo marinau. Sanda moomoo saamu atisaa qusi iqoona marufanoo mi sandana atinni arooqa aandau amudaani rukamirana raiqaranauqa qususee rumbaqoosamuna mi samunannai aiqamausa rumboosa narimaruna. Misamuna naaree Yisuna ari isoofanoo inaaqianna Piratoofa narí maaqaki mara quqasee mina ufara iranau.)18|39-40|YOOHANEE