20
Yisufa findimaqee fifufaqa fifau madikakai qafoo ufafa.
(Mat 28:1-8; Mak 16:1-8; Ruk 24:1-12)
1 Akundamasoofaqa mariiqa amaanasaa kananaana eendai Mariana amarafa Makadara maqusaindaraafa Yisuna ooni aamaraki akundamaqoona qafaanee qimasee finau. Oonuree qafoofanoo mina aamaraki ititaqoo oonina firaana mareeqee kaqinni quqaqoofanoo marida qafanau.
2 Mariafa mina qafamaseenoo anirandeenoo sandeenoo oonureenoo Simoona moo auqu Peetooroona faqa Yisuna afaaqasaa aqoondi qini faqa qimanniminoo qinau. Misa Karaambaiqa iri ooni aamarakinaana mara maree moosaa fifia. Sia maasa qafeeqa.
3 Yisuna faiqi namukiqari Peetooroofa faqa qinee Yoohaneesa faqa mina iriseeqa qafaanee qimasee sandaqiafana.
4 Maaqanda sandaidaqa qinee Yoohaneesa kaaqa sandeeqa Yisuna madika kooqinni oonuraqiafana.
5 Qinee sia keeqaqiafana kaqi oonu maridaqa aamaraki qafeemariafana. Miqoo maridaqa Yisuna kukuqamaqoo qamunnana mina kai qafee mariqafana.
6 Simoona moo auqu Peetooroofa aidaaqareenoo kaqi oonaamarai keeqanau. Mifa Yisuna kukuqamaqoo qamunna miqoo quqaqoona qafamaseenoo.
7 Mina akiaqa rumbaqoo qamunnana uturuqeeqeenoo aaduma kukuameeqee quqaqoofanoo marinau.
8 Qinee Yoohaneesa Peetooroona aanaaqiana keeqafi qafamaseeqa doo kuqaa findifiifoo qiqiafana. [
9 Yisufa kuqiranakiqari findifuaninna akaranara sia amiqimandee iriqiafana. Mana manammimariqiafana.]
10 Maaqanda qafamasee doo nimaaqa anirandee fiqiafana.
Yisufa Makadara maqannaa anaasee kooroomamaqoo ufafa.
(Mat 28:9-10; Mak 16:9-11)
11-12 Mariana amarafa Makadara maqusaindaraafa ninaaqiana kafaa ooni aamara kooqinni oonu kikiqinoo marida ikiraqee marinau. Miqidanoo ooni aamaraki kummaramafi qafoofanoo qaara qangirooqara eekara qamunna afisiraqanda moo fannoo Yisuna akiaqa maruqoo ooqufaaqee marufanoo moo fannoo Yisuna aiku maruqoo ooqufaaqee marufanoo nindafanau.
13 Nindafoofaqa miqanda qiqau. Oo maa anaasee anee nanaree ikiraqaidanee. Mariana amarafa qinau. Misa qini karaambaiqa mara maraafaqa sia misa quqaqoona iridaqa ikiraqaidaqa.
14 Mariana amarafa miqi qimaseenoo quandaki qafoofanoo Yisufa mina aanaaqiannai kikiqinoo marufanoo mifa sia Yisunee qinau.
15 Yisufa maaqi qimasee Mariana amarana qimaminoo qinau, Oo maa anaasee anee nanaree ikiraqaidanee, yanaree randaidanee. Mariana amarafa Yisunara maa saqamanasaa rakisirafammifoo qimasee qimaminoo qinau, Oo maa fasiqa anee yai fee iri maanakinaana mara quqeenee. Anee qimaqiminaqa qinee mina maramaree fua.
16 Yisufa mina iriseenoo mina auqu ramaseenoo qinau, Maria, qufanoo Mariana amarafa tautumma quandaki qafeenoo Oo ufasaa rakisirafee qinau. Eeburu maqannaasa ufakiqari qinau, Rabooni, maasa ufakiqari ufasaa rakisira fee qinau.
17 Miqi qimasoofanoo Yisufa qinau, sia qeeqa qikoofinnai ooru fiqa minara anee sia qini qifaaqa qumaraa. Anee oonuree qini qikaqaafasaauqa qimannimia. Qinee qeeqa qikoofinnai faqa inni nikoofinnai faqa qeeqa Anutufinnai faqa inni Anutufinnai faqa ooru fidaqa.
18 Mariana amarafa mina iriseenoo sandee oonureenoo mina faiqi namu maaqi qimisee qimanniminau. Doo qinee karaambaiqa qafaunanoo mifa mi ufana qini qimaqiminoo.
Yisufa narí faiqi namu kooroomannimaqoo ufafa.
(Mat 28:16-20; Mak 16:14-18; Ruk 24:36-49)
19 Mi faasaanna mi eendanaki Yisuna faiqi namu maasa moo maaqaki keeqafufaqa Yuda maqannaasa doo Yisuna ariqa maasa faqa darifoo qimasee maasa misara rufiasee kooqi amiqimasee ititasee marufanoo Yisufa tautumannimaqeenoo maasa qambaanai kooroomafinoo qimanniminoo qinau. Sia rufiaaqa asooarafa inniki mariani.
20-21 Miqi qimaseenoo Yisufa narí asauku aqumusaa pirimma aruna kai fidika reemaruna uqannifiqeenoo aqaasanasaa faaqaana raquru amuna afaaqa ateekaqoona faqa uqannifiqoofaqa maasa qafamasee doo kuqiranakiqari findifuananoo fee qimasee kaaqamma asasiqiafana Yisufa kafaa qimanniminoo qinau, inni sia maparaa iaqa asooarafa inniki mariani. Qini qikoofa maa maqanasaa qini diqiqamaqoosa qinee miqikai iqa innee maaqanna maaqanna qini ufa qimannimiaqeera inni faqa niqiqaidaqa.
22 Miqi qimaseenoo Yisufa aidoo maasa fuaqaqimaqaseenoo qinau doo innee naaquqara Anutuna maraquna maraaqa.
23 Innee faiqí mandainaina numoo mininnisaifanoo Anutufa faqa mininnisaannoo. Sia mininnisaifanoo Anutufa faqa sia mininnisaannoo.
Yisufa Toomasina kooroomamaqoo ufafa.
24 Yisuna faiqi namukiqari Toomasifa mifa qaara qapirafa maqaqoofa marufa moosaa mi eendanaki maridanoo sia Yisufa tautumasee maasaki kooroo una sia mifa qafanau.
25 Maasa Yisuna qafaafanausa Toomasina qimamiqaqiafana maasa Karaambaiqa qafaunausa maridaqa. Miqi qufanoo Toomasifa qinau, innee unna qimariafanoo qinee mina asaukusaaqaraa pirimma aamaraki fidika reemarinaki auqama qafeeqa mina aqaasanasaaqaraana faqa auqama qafeeqa kuqaa fee qianaura sia auqama qafeeqa unna fee qianaura.
26 Mi amaanafa aiqaroofanoo moo amaana eendaki maasa Yisuna faiqi namu faqa Toomasina faqa maaqaki keeqafi kooqi mundusee ititasee Yuda maqannaasa maasa dari maqi qimasee mariqiafana. Marufanoo Yisufa kafaa maasaki kambiqanau. Anireenoo qinau, sia rufiaaqa asooarafa inniki mariani.
27 Miqi qimaseenoo quandaki Toomasina qimaminoo qinau, aneenna asauku qini qisauku aqumusaa maaqoo quqasee pirimma aamara auqamma qafa. Aneenna asauku qini qiqaasanasaa faqa quqasee auqama qafa, aneenna maparaairana taikaa, kuqaa fee kai qia.
28 Toomasifa mina qafamaseenoo qinau. Qini karaambaiqa qini Anutufa.
29 Yisufa kafaa Toomasina qimaminoo qinau. Anee qini qiqafamaseenana kai qiniara kuqaa fee qidanee. Akaqausa sia qini qiqafaidaqa qini ufara kuqaa fee qifanoo Anutuna asasirafa misasaa mariannoo.
Maapapiqanaki akara oosana kooroo qu ufafa.
30 Yisufa moomoo firaa ainaina narí faiqi namu nifusaa kooroomasoofaqa sia maa papiqanasaa akara riqa. Akaqana kai akara riqa.
31 Maa ainainnausara akara rumaseeqa inneeqa Yisunara kuqaa asauku mundira fee qimasee Anutuna amaaku fee qimasee mi iriranannai mina auqunnai innee naaru naaru marirana maraaqeera akara rumannimaqeeqa.