13
1 Irirana faqaa faiqiuqa nári ninausa nikausa ufa amiqimmasee iridaqa. Ufa rukiee mariasa sia moo fannoo qaoo qinnana iriannoo.
2 Amiqira fasiqa fannoo amiqira ufa qinnana akiiqara maraannoo. Kaqi runna fimariasa nariranara kai naararaidanoo.
3 Aneenna ufasaa rakisinana aneenna mariranasaa faqa rakisinna anoo. Fifau faafau ufa qimarifa narí kai narí aridanoo.
4 Kudiki maria fasiqausa ainainara firaaqoo amuqusi marifanoo sia maraannoo. Amudaanai qimasee ainaini marifa aiqama ainaina narí aidi ari ainainausa maraannoo.
5 Andeeqara fasiqauqa unna ufara fidiaqaa midaqa. Mandoosana maree mariasa marirafa nisaurirana faqa manduqarana faqa nimidanoo.
6 Andeeqara oosana fannoo aaqarana siasa itita nimaqaidanoo. Manda oosana fannoo mandoosana maree mariasa mandaikamma nimaqaidanoo.
7 Akaqausa ainaina siaisa ainaina faqaasa naanna raidaqa sia ainaina marifaqa fifau miqidaqa. Akaqausa ainaina siaisa naanna raidaqa noori kandamasee nidaqa misa moomoo ainaina faqaasa maridaqa.
8 Ainaina faqaafa arirariafanoo narí ainaina moomoo nimifaqa sai aridaqa. Ainaina siaisa sia minara rufiaidaqa manoo manaa idaqa.
9 Amiqira oosana maree mariasa qoomara foora kaaqa qaidaqa. Manda oosana maree mariasa qimbarari mari qoomafara foora maridaqa.
10 Narí amoo kai qidanoo mandufa kai uqeeree marifa sia moo ainaina auqaidanoo ummaara kai uqeeraidanoo. Reedeeni mariasa misa irirana nimiaqeera kai iraidaqa.
11 Unna iriranannai maree maria ainainafa kai kaqi taikaannoo. Kadaapi rumasee marainafa moomooka miannoo.
12 Faiqí mo fannoo moo ainainara kisaaqasaa afeesida marifanoo sia anifanoo amuqusa mandaikifanoo akooqaidanoo. Aidi mari ainainnara afeesida mariifanoo aniraifanoo asasidanoo.
13 Faiqí moo fannoo naamuaqira ufara fidiaqaa imarifa mandainaina ummaara aaraidanoo. Naamuaqira ufa reendeena mandee irimari fasiqa anaaseefa asasirana maraidanoo.
14 Irirana faqassa naamuaqira ufa fannoo kaqi marirana nimira nammariara foora maridanoo. Ani kuqiranakinaana dadaaqifana kaqinni ubeekeennaranoo.
15 Irirana faqaana aqoonausa mina ufa qaindusidaqa minara ridaqa. Unna ufa qida mandaiki mariasa kuridira aatata fidaqa.
16 Amiqira irirana faqaa fasiqa anaasee andeeqara irirana iriseeqa mimau kai fidaqa. Furufarira fasiqa anaasee faiqí nifusaa nári furufarirana uqeera uqannifiqaidaqa.
17 Aanaiqi fannoo unna ufa aatata qinoo nifa faiqí anaasee manda ummaaraki mara quqaidanoo. Kuqaa ufa qimarina ufa fannoo asooama nimaqaidanoo.
18 Aakapara ufa sia irimarifa kudikinoo asauruannoo. Aakapara ufa irimari fasiqafa uriqaraidanoo.
19 Moo ainainara kisaaqasaa rakisiinanoo anirainanoo amuqusa amiqiannoo. Irirana siai fasiqa anaaseesa manda ainaina minnisee amiqira ainaina auqarara nikooqaidanoo.
20 Anee irirana faqaasa faqa finana irirana mareennaranoo. Anee furufarirausa aqoondikinana kuridinnaranoo.
21 Manda oosana maree mariasa fimariafanoo ummaara fannoo misa nifaqanoo nidanoo. Andeeqara oosana maree mariasa mi andeeqarana akiiqara amiqira ainaina mareefaranoo.
22 Andeeqara fasiqauqa kuqifaqa misa faiqi namu ninaiqi mara misa qumiasana mareefaranoo. Mandoosana maree mariasa qumiasana andeeqarausa iannai kai fuannoo.
23 Fuka maqaki kudi fasiqauqa narana ummaqusaafanoo moomoo marifa sia andeeqee mari siaasafa mi kudi fasiqausa ufa sia irinoo sia mina narana andeeqaisaifaqa fifau dapi mara taikaidaqa.
24 Anee sai aneenna faiqi aaqarana akiiqara arinana sia aneenna faiqiara aidinnaranoo. Anee aneenna faiqiara aidinana saamu qumasee arusee andeeqaa.
25 Andeeqarausa narana moomoo marifaqa naidaqa. Manda oosana maree mariasa aiqama kari naararaidanoo.