14
1 Amiqira irirana faqaa aanaaseeuqa maaqa usakaseenoo amiqimmasee rakisidanoo. Furufari maria anaaseesa mi maaqana rapeepamma aqidaqa.
2 Andeeqara aatata fimariasa Yaaweenara qeerairidaqa miqidaqa. Manda aatata fimariasa Yaaweenara nikooqeemari faqa miqidaqa.
3 Narí amoo aanoo qida kaaqa ufa qimarina ufa fannoo saamu kamambi narí aridanoo. Irirana faqaana afauru fannoo narí itita amaqaidanoo.
4 Tarakasaa siai fasiqana narana oodaa mariannoo. Taraka faqaasa narana moomoo maridanoo.
5 Ainaina qafamasai fasiqafa kuqaa anoona ufa qimari fasiqafa kootaki sia nikaru qiannoo. Ainainara unna qimari fasiqafa unna ufa kai mina ookiqari ururaidanoo.
6 Kaukaata qimaria fasiqausa iriranara randaasia sia paquridaqa. Irirana faqaasa sia kadaapiridaqa dauni paquriqa irifaranoo.
7 Anee sia furufarira fasiqauqa naaqa maria qeerairamandee nianai maria. Misa sia amiqira irirana ani qimamifaranoo.
8 Nanaree aiqama ainaina akoofasa fannoo irirana faqaafaikidanoo fee. Mifa ainaina auqarana iri marinara miqidanoo. Nanaree irirana siai fasiqafa furufarira fasiqaikinoo fee. Mifa iridamunoo qinara miqidanoo.
9 Furufarirausa sia aaqaranara qeerairidaqa. Andeeqarausa aaqamaseeqa mi aaqarafa kai kaqi taikaanifeera oonu mafi iridanoo.
10 Ani asasirafa anindi kai maridanoo. Ani sukaqarafa anindi kai maridanoo. Sia moo fannoo mina maraannoo.
11 Manda oosana maree mariasa maaqa rapeemma fuannoo. Andeeqarausa maaqa sia rapeeiannoio kaqi mariannoo.
12 Faiqí moo aana qafamaseeqa amiqira aanee qimariana aaqaidaqa sia qafaranaki kuqira aana marifaqa miqi qidaqa.
13 Akaqausa naanaidara qimariafanoo misa naunduraki kaqi rumbanoo maridanoo. Asasirafa taikaifanoo noori runirafa kambiqaidanoo.
14 Manda aatata fimariasa miqi mariana akiiqara mareefaranoo. Andeeqara oosana maree mariasa miqianannai nári feefauru mareefaranoo.
15 Furufari mari fasiqafa unnufara faqa anoona ufara faqa kuqaa fee kai qidanoo. Irirana faqaafa sia miqidanoo mifa narí aiku amaarususee reemarifa maridanoo.
16 Irirana faqaafa mandainaina ummaaraki marirara qeerairidanoo. Irirana siaifa mifa furufarinoo aanoommasee kaqi pasoosammasee fidanoo.
17 Qusa ufa qimaseea kai kaqi aanoo qimarifa furufarira ainaina kai auqaidanoo. Irirana faqaasa qireeda kai maridaqa.
18 Irirana siaisa misa aiqama ainainirafa furufarirafa kai maridanoo. Irirana akoofasauqa mariana akiiqara feefauru amiqira irirafa maridanoo.
19 Mandoosana maree mariasa andeeqarausa noorinni kumma ramafi nári mara maree qumuree qimudaoo qima nimaqaaqeera iraidaqa.
20 Kudi fasiqa sia aqoondi faifa maridanoo, mina aqoonausa faqa miqi mariasara nikooqaidanoo. Ainaina faqaafa moomoo aqoondi faqaafa maridanoo.
21 Faiqí moo fannoo moonara akooqainafa aaqaidanoo. Anee asasiraree qimaseenana kudi fasiqa idaaqamma amaqaa.
22 Manda oosanara randee marifa aaqaidanoo. Anee amiqiranara randeenana ufa qaindusiranara faqa saqarikirana faqa paqurinnaranoo.
23 Kadaapi rinana amiqira marirana mareennaranoo. Ufa kai qina nidana fifau ooqumarindundina nidana kudi marinnaranoo.
24 Irirana faqaasa mariana akiiqara moomoo qumiasa maraidaqa. Irirana siaisa furufarira oosanara aiqamausa iridaqa.
25 Kootaki narí afu qafai ainainara andeeqasee quqaa kai qimarifa faiqí mariranasaa itita nimaqaidanoo. Unna ufa qimarifa faiqí ueeqaidanoo.
26 Yaaweena ufara rufiarafa ququsa kiara foora maridaqa. Miqira fasiqa fannoo narí faiqi anaasee faqa ququsaki maridanoo.
27 Anee kuqirana aiaaqarareefee fee qidanee. Yaaweenara rufiarafa kaqi marirana nimi marifa maridanoo.
28 Karaambaiqa uriqararafa mina aiku asauku moomoo mariafanoo raikisi nimaqee marinara miqidanoo. Mina aiku asauku sia marifanoo mina karaambaiqa auqu fifau mariannoo.
29 Anee sia dauni aanoo qinana reedeeni marinafa firaa irirana faqaafa marinnaranoo. Qusa ufa qimari fasiqafa narí furufarirana kai uqeera uqannifiqee marifa maridanoo.
30 Asooara irirafa mina afaaqa amiqirana amidanoo. Rairai qira oosana fannoo manda auriranara foora maridanoo.
31 Kudi fasiqara kaukaata qinana mina auqu fasiqana Anutunara faqa kaukaata qimariananoo. Kudi fasiqara amuqusinana dadaaqinna anee Anutuna amooqidana mina auqu uqeeree mariananoo.
32 Manda ainaina kambiqaifaqa mandoosana maree mariasa kuridiranaki fidaqa. Andeeqara fasiqauqa nariqa andeeqarafa misa itita nimaqaidanoo.
33 Irirana fannoo irirana faqaasa iriranaki maridanoo. Furufarirausa irirafa sia kaifaafa faqa maridanoo.
34 Andeeqara oosana fannoo mi maqannaasa nuqu uqeera firaanaikidanoo. Nári eendaandira mandoosana fannoo mi maqannaasa mareeqee nári nisauriranaki aqidanoo.
35 Kaiqee fasiqa irirana faqaa fasiqa maridanoo. Karaambaiqa minara aidiannoo. Mi kaiqee fasiqafa asaurirana karaambaiqa amimari fasiqafa aanoo qirana kai maraanoo.