5
Sia moona anaaqa ummuaria.
1 Oo qini qimaaku qini aakapara ufa amiqimmandee aaqoo uqasee iria. Qinee amiqira irirana faqa aakapara ufa faqa ani qimamidaqa.
2 Anee andeeqara oosana mau finanoo ani aiqama ufaqirafa irirana faqaasa ufara foora mariannoo.
3 Moo fasiqa anaaqa ufa fannoo kaaqa adiafaa iannoo. Ookasaasa anoona adiafaa imarina faqa uriaaqaranoo mariannoo. Mina ookinaa ufa fannoo fadameena miqirafa maridanoo.
4 Mifa taikainanoo mifa ani quqasee finanoo qisaaqa suka miqirafa faqa aidafirafa faqa mariannoo. Aseema miqirafa afai raiqarafa ani afaaqa ateekaanoo.
5 Mi anaaseefa ani afiqeenoo kuqira maqa maaqaki fidanoo. Mina nira aana kuqirafa maridanoo.
6 Mifa sia kaqi marira aatatau fidanoo fau. Mifa fimari aanafa eendaandirafa maridanoo sia minara irimarifa kaqi mi aatata fimarifa maridanoo.
7 Qini faiqi namu qini ufa iria sia qinee qimannimianna ufana qaunuaqa.
8 Anee mi anaaseefa mariqooqari nianai maria. Sia mina kooqi aaqa faqa fua.
9 Anee mina kooqi aaqa finana aneenna andeeqaree auqu aiqamausa nifusaa maqasaa uqaminanoo aqufuannoo. Anee nimudaoo qirana siaisa nisaukuki oonu rainaqa kuqa arifaranoo.
10 Anaamuru anireeqa ani ainaina kaqi mareefaranoo. Ani kadaapi rirafa moosaindika miannoo.
11 Anee aneenna faiqara qaarisaa annadannadidana kuqina marinaqa ani amaqi faqa aununu faqa fifau ainainauqa namaseefaranoo.
12 Miqidana annadannadidana maaqi qinnaranoo. Oo qinee nanaree aaquqira ufasa fidiaqaa iqiafanee. Qini qimuqusa fannoo aamuaqira ufara fidiaqaa imariafanausa maridaqa.
13 Qinee sia ufa qima qimusa ufa iriafanausa maridaqa. Qinee aaqafana andeeqa qimaqoosa ufa sia iriafanausa maridaqa.
14 Qinee maqee aiqamausa nifusaa tautummasee qisauriranaki firaridaqa.
15 Anneenna nammari kai naa. Aneenna taquki kai sakasee naa.
16 Moomoo aanaaseesaa faiqi maqasainausa sia ani andeeqa amaqeefaranoo.
17 Anee moo aanaaseesa maqasainna faiqifa mi anaaseena oosanaki mariannoo. Sia ani faqa mariannoo.
18 Aneenna anaaqa kumaaraasaa maroonnana mina faqa amiqidana asasammasee maria.
19 Mina afaaqa amiqirafa eeqaku miqirafa ummooqukirafa maridanoo. Mina faqa maqee maqee maria. Anee maqee maqee mina naammara kai aidiani. Mina aidirafa maqee maqee ani qumaraani.
20 Oo qini qimaaku nanaree anee moo aanaaseera ridanee. Anee nanaree moo fasiqa anaaqa naammara ridanee.
21 Anee aiqama ainaina auqaannana Yaaweefa qafaidanoo. Anee yaifee fuananoo Yaaaweefa anisaa rakisidanoo.
22 Manda oosana maree mariasa nári mandainaina fannoo ufaanara foora nári ninuka qumaraidanoo.
23 Mi fasiqausa sia nariqa nirana mariranasaa rakisira irirafa marinara kuqidaqa.