6
1-2 Oo qini qimaaku akaqausa dinnaa munnimma maraifana misa faqa qima afeekaika maseenana qinee mina akiiqra ianauree qimasee sia miqinana aneenna qima afeekaikianna ufanaki ufaana kiara foora aruananoo.
3 Oo qini qimaaku anee maaqi qimasee mi fasiqana ufaanakinaana aneenna faaqa mara kaqinni quaa. Doo anee aneenna afaaqa aneenna aqoonnana asaukuki quqaananoo kai kaqi moodaaqoo oonureenana mi ufana taikasaa.
4 Anee sia faiqaa sia kisaaqasaa adooaida maria.
5 Anee kaasau kuara miqirafa maria ufaanaki arufinoo munari minarindee dauni ratoofusee mina faqa ufa qima taikaa. Ufini ufaanaki aiku arindee ia, dauni aruratoofua.
6 Oo kudi fasiqauqa tarika mariqoo oonuree mina oosana qafaaqa. Innee mina oosana qafamaseeqa oonumafi iriseeqa irirana faqaasaikifaranoo.
7 Sia tarika rakisirafa moo maridanoo sia misa fukifaaki qimarifa moo maridanoo, sia moo fannoo misa aranaiqi qimannimifaqa ainainai fidaqa.
8 Suani aukuana misa nári kai nári narana moomoo afeedidaqa. Aaku aukuana narana taikainaqa nararee qimasee miqidaqa.
9 Oo kudi fasiqa kisaaqasaa fee innee miqoo faiqaqee ifaree. Yairee fee innee findi fifaree.
10 Innee maaqi qimariafanoo maasa qusasaa faiqaanauree qimariafanoo. Maasa qeeqa qisauku raqandaammasee kaqikaaqoo idooaanauree qimariafanoo.
11 Innee faiqaafanoo inni faiqarafa ummuara fasiqara foora inni aiqama ainaina ummuara maraanoo.
12 Mana oosana maree mariasa unnufa qiqa nidaqa.
13 Nikaru qiraree qimasee nifu quandaqaandi mariasa misa niku munuree miniree imariasa maridaqa.
14 Misa nimuqusaki nikaruqirafa qumbiqarausa maridaqa. Maqee maqee mandainainara kai ufa qimariasa maridaqa. Misa aiqamatinai nidaqa ummaara kambiqaanifeera kai andaana riqa nidaqa.
15 Miqi marianara firaa ummaara sia aaquqima nimaqarai tautummasee misa naruannoo.
16 Yaaweefa qisauku dinni taikasee dinni oonu qaara marasee ainaina auqaanara kaaqa fidiaaidanoo.
17-19 Maa ainainnara fidiaqaa idanoo. Oori uqeeraranara faqa unna qimari afaurunara faqa fifau fidika ruiqee marinara faqa manda oosanara nári iriranaki tipundaari mariana faqa mandainainaki dauni niku ree mariana faqa kootaki unnufa qimariana faqa nári nikaaqaafasaa ummaara nimimaria oosannara faqa Yaaweefa fidiaqaa idanoo.
20 Oo qini qimaaku ani akausa qimamunnandee inana aneenna anoona ufa sia qaunua.
21 Aiqama kari aneenna anaukoo ufa sia quqaa, aneenna amuqusaki quqasee atukaraa.
22 Misa qimaminna ufafa ani indaarunnikamma amaqaanoo. Eendaki anisaa itita amaqaseenoo faasaana niranaki ani aakapaannoo.
23 Ani anaukoo aakapara ufa qoomara foora kaaqaqaidanoo. Misa andeeqara ufa fannoo ani maa maqanasaa marirana andeeqa amaqaidanoo.
24 Mi ufafa dapi maraqa nua anaasee finnai firanasaa itita amaqaannoo. Akaqa fasiqauqa ninaaqmaaka fadameena akira ufasaa itito amaqaannoo.
25 Sia anee misa amiqira nifaaqara rua. Afunnai ani mareeqeenoo ufaanaki aruaneera quqainana sia minara iria.
26 Dapi maraqa nua aanaaseefinnai finana kaqikaa feefauru narana maree mariana amana kai aqinnaranoo. Faiqí moo anaaqa faqa finana firaa feefauru faqa aneenna aiqama ainaina faqa aqinnaranoo.
27 Amanee anee ida auri marina qumaree amuqusasaa uqasainanoo qamunna sia qaannoo fee. Ani qamunna faqa afaaqa faqa aiqama ida qaannoo.
28 Amanee anee ida auruki aiku reennaree sia amana reennaranoo. Aiku turuquannoo.
29 Doo miqi kai inoo faiqí moo fannoo narí aqoonnana anaaqa faqa sia faiqaannoo. Miqinafa aupurarana maraannoo.
30 Faiqí moo fannoo aararainanoo ummuara masainanoo sia minara firaaqoo ufa qifaranoo.
31 Akaqausa mifasiqana paqurimmasaifanoo moodaa ainaina ummuarinnana akiiqara dinni taikasee dinni ani qaara marasee 7 ainaina amiannoo. Mifa narí uaqeei ainaina aiqama amiannoo.
32 Narana ummuari fasiqanara miqimminoo marifanoo anaasee ummuari marinara maaqimminoo maridanoo. Moo fasia anaaqa faqa manda oosana auqee marifa narí kai narí kurididanoo.
33 Mi fasiqafa arirana faqa aqirana faqa maraidanoo. Mi fasiqafa naaruara asauriranaki mariannoo.
34 Mi anaaseena afaaqi paqurinanoo rairai qirafa idara foora atakuquannoo. Minara ufa qifanoo sia kaqi irinoo minnisaannoo, arana qarafa kisaaqasaa mariannoo. Sia kai kaqi taikaannoo.
35 Sia mifa feefauruara iriannoo munnimma ainaina oosana oosana aminanoo siamma iriannoo sia doo fee qiannoo.