7
1 Oo qini qimaaku qinee qimamianna ufana iria. Qinee auqaannee qianna ainainnara sia qaunua.
2 Anee qinee qunnandee inana amiqimmasee marinaranoo. Qini aamuaqiira ufa aneenna afu rakisinnandee amiqimmasee rakisia.
3 Qini aakapara ufa aiqama kari uaqeeina ani faqa mariani. Aneenna amuqusasaa akara rumasaina mariani.
4 Oo qini qimaaku anee amiqira iriranara qini qisookifee qia. Oonumafi iriranara qifaaqa saa qiqoondi fee qia.
5 Anee miqinanoo mi irirafa moona anaaqa faqa firanasaa aitita amaqaanoo. Mi anaaseesa fadameena akira ufasaa itita amaqaannoo.
6-9 Qinee qeeqa maaqaki ooqufaqee qeeqa kooqirunna qafaunanoo dapi kumaarauqa marianakiqari moo furufarira kumaara fannoo ummuarimari anaaseena maaqa marindanai ubeekaidanoo mina kooqindanai fidanoo doo mina naambeeqandanai finoo suani keeqaifanoo sisisasa qeenoo fee eendaki fee asukunai fee doo mifinnai fidanoo.
10 Mi anaaseefa doo oonu afiqararee qimasee anidanoo. Aatata nua aanaaseesa qamunna afisusee anidanoo.
11 Mi anaaseefa kambaaramasee ufa qimarifa asaurirana siaifa maridanoo. Mifa aiqama kari fifau aatata oonuree aniree inoo nifa maridanoo.
12 Anee aanai finana miqoo qafeennaranoo. Anee maqusa qambaanai finana mina miqoo qafeennaranoo. Mifa aiqama aana kindooraki oonureenoo afu munu maqee mini maqee iannoo.
13 Mi kummaaraana paqurimandee asauku qaqusee qumaseenoo amooqa namaseenoo afuki kai qafanoo maridanoo qiannoo.
14 Doo qinee maqee amaana maqaki keeqafiqa tatufirana suqeeqee qiannoo. Doo qinee tatufirana suqaidaqa aandau ati maree mini quqasee anidaqee qiannoo.
15 Qinee qeeqa maaqakiqari raudamaki aniara randamaree doo ani paquriqa.
16 Doo qinee qeeqa qaari amiqirana ufiqiseeqa. Isipa maqanna qamunna amiqirananoo minasaa ufiqiseeqa.
17-18 Qinee minasaa fadameena afundi marina adieesee makaqa anoona faqa saadapu anoona faqa adieeseeqa doo anee aniraina maaqooqari oosana arasee nariara nariara nidira nammari neenee iaqasaa.
19-20 Qini qifaaqi sia maridanoo nianai fifinoo mifa munnimma moomoo maree finoo mifa qaara amaana minni maraannoo sia kai kaqi aniannoo.
21 Mi aanaaseefa narí naammannai mina qumaraseenoo ummooqifira ufannai mina rarisaidanoo.
22 Mi anaaseena ufa fannoo mi kumaaraana afu dapikammasaifanoo aandau miqirafa sia irirai kuqiranaki kaqi fidanoo.
23 Kaasau kuara ufaanaki arinoo marifanoo faiqí oonu qafeenoo doo amuqusa arifanoo kuqidanoo. Mifa ufiniara foora sia irirai ufini ufanaki keeqafinoo kuquannoo. Mifa narí marirafa manda marinara sia iridanoo.
24 Oo qini faiqi namu innee amiqimmasee qinee qianna ufana iriaqa.
25 Inni nimuqusa fannoo sia mi anaaseena faqa firara findifuani. Sia kambaaramasee mi anaaseefa marinnai fuaqa.
26 Mifa moomoo fasiqa mandaikamma nimaqaseenoo kuqirana niminoo. Sia amana nisaana rirana amana kuqa narimarifa maridanoo.
27 Anee mi aanaaseena maaqai finana anee kuqira aatata fimariananoo. Mi aanafa kuqirannai fimaria aanafa qusa aana maridanoo.