A Nimariu
Ne Huriki A Israel
A Nita Vakalohoka
E Moses i herea a puhu na hinere iea. Ni luhoi i here a puhu na hinere i lima, ni gale na nita Hibru a “Tora”. Ra puhu ne Nimariu a ruana puhu na hinere i herea.
Ni luhoi e Moses i herea tabukoi na pida e 1446 BC, i muga ne Kristo ni poda.
Ni luhoi e Moses i herea na tahuna e huriki a Israel ri laho viliha na tabeke i ngeki.
I here a nuverei ne ria a Israel na tahuna ri mariu tala o Egipto.
A puhu na hinere iea i tuverei a maki i bele na kabu ne Israel na tahuna ri mariu tala o Egipto. I tahoka a tabekena i tolu:
1) Sapta 1–18. I tuverei e huriki a Israel ri mariu o Egipto, ri laho na tabeke i ngeki, ri bele na lolo e Sinai.
2) Sapta 19–24. I tuverei e huriki a Israel ri laho viliha na tabeke i ngeki, lakea a Vure i taki ria na ngava dagi, muri i habi a vinara ne ria, ge matakari a nilaho ne ria, a narone ria.
3) Sapta 25–40. I tuverei e huriki a Israel ri hae a kape na Vure. Ra tabeke iea i tahoka a ngava na vinara ni matakari a lotu ne ria, a leho ne huriki a prister.
A nita lobo ne Moses i tabuli vona a puhu iea. A Vure kunana i vulakia e Moses ge ia a matakari, ge tuli tala o Egipto e huriki a Israel, ra ni vakavora ria vonga.
E huriki ala kupo, ri lohoka vona a vinara na Vure i ravulu. A nita na vinara nga i tabuli ne sapta 20.
A ngava dagi i taki a puhu iea, a maka maki a Vure i rata. A Vure kunana i korimule e huriki a Israel na limane huriki a pile. Ia kunana i vulaki ria, i kalipopo ria, ri tahoka a rane ria. Ia kunana i matakari, i vakatora ria, ri rata a maka leho dagi i ngaru ria ri gi rata.
YHWH: BAKOVI DAGI
A rana Vure na hinere, ni here na nita Hibru i manga e YHWH, o Iave. A pelegona nita Hibru iea, i manga, “Iau ra Iau.” Na tahuna o matai a ngava e BAKOVI DAGI, a leta lobo ri dagi, i vakasiri manga na nita Hibru a ngava e YHWH i tabuli.
1
E Huriki a Israel Ri Lakea o Egipto
1 E huriki e tune Israel turana a kabu ne ria ri puru o Egipto turane Iakop ra nga,
2 e Reuben, e Simion, e Levi, e Iuda,
3 e Isikar, e Sebulun, e Bensamin,
4 e Dan, e Naptali, e Gad, e Aser.
5 E Iosep i lokovonga muga. Na tahuna iea e huriki a hamone Iakop ri ala ravulu polorua.
6 Muri e Iosep, e turana mai, e huriki a hulu turana ri mate.
7 Pali e huriki a hamone Israel ri bele kupo, ri gao hateka, ri bele kupo o Egipto.
8 Muri na pida i kupo a hariki karaba i matakari o Egipto. Ra hariki iea i uka ma i lohoka ne Iosep.
9 Lakea i taki e huriki a viri vona, “E huriki a Israel ri bele kupo, ri rangi hita.
10 A vabinga tara bara i bele, bara ri taga turane huriki a pile, ri vaubi turane hita. Muri bara ri ha taroa a robo ne hita, ri vano. Si gi matakanea tara dala si gi rata ria nahea ri gi ala kupo hateka.”
11 Lakea e huriki a Egipto ri taki e huriki a matakari ri gi vakuku e huriki a Israel ri gi leho hateka. Ri rata a tanga dagi i rua e Pitom, e Rameses ne vona ni ru kadolu a maki ni kani ne Parao.
12 E huriki a Egipto ri ratapile e huriki a Israel. Pali e huriki a Israel ri tababana ni bele kupo, lakea e huriki a Egipto ri mangenge ne ria,
13 ri rata ria ri leho hateka.
14 A nimade ne ria ngane i hale liu, a vuhuna i uka ma ri malo. Ri vakuku ria ri gi rata a brik ne vona a ruma. Ri vakataki ria, ri gi leho hateka na hania, i uka ma ri dodo ria.
15 Na parava tara a hariki ne Egipto, e Parao, i taki a ngatavine o Hibru, e Sipra e Pua, a leho ne rua ni tuhori e huriki a ngatavine ni poda, i ta maea,
16 “Na tahuna muru tuhoria tara ngatavine o Hibru ge poda a koma bakovi, muru rabalakia a koma. A ngatavine ge poda a koma ngatavine, naha ni rabalakia a koma.”
17 Pali ra ngatavine nga ru mangenge na Vure, i uka ma ru ramaia a nitana hariki, i uka ma ru rabalaki e huriki a koma bakovi.
18 Lakea a hariki i gale valai tabu a ngatavine nga, i nana rua, “I navai i uka ma muru ramaia a ngava a taki marua vona, muru gu rabalaki a koma bakovi?”
19 Ru koli ru ta maea, “E huriki a ngatavine o Hibru i uka ma ri manga e huriki a ngatavine o Egipto. Ri gao hateka ri poda malaviriri kunana. Maria i uka ma miri bele malaviriri, bara ri poda muga pali.”
20-21 Lakea a Vure i rata kamumu a ngatavine nga, ru tahoka koma, a vuhuna ru togoa. Muri e huriki a Israel ri bele kupo, ri gao hateka.
22 Lakea e Parao i vakuku e huriki a Egipto, i ta maea, “Mu bole e huriki a koma bakovi na Hibru, mu voro puru na naru dagi e Nail, ri gi pasiri. Pali naha ni rabalaki a koma ngatavine.”