50
E Iakop Ni Tanu
1 Na tahuna e Iosep i masia e tamana i mate, i mahita rike vona, i ngurua i taringia.
2 Muri i taki e huriki a dokta ri gi ru a marasin vona a podane Israel, i uka ma ge mavuru malaviriri. Lakea ri rata manga a hini i taki.
3 Ra leho ni ru a marasin na podana viri mate bara i bole a parava i ravulu va. A podane Israel tara ni ru a marasin vona na parava i ravulu va. E huriki a Egipto ri taringia e Israel na parava i ravulu polorua.
4 Muri i lobo a parava na nitangi, lakea e Iosep i takia a bolekori ne Parao i ta maea, “Ioe o ngaru iau, o bolea a ngava nau o vakalongo e Parao vona, o ta maea,
5 ‘Na tahuna e tata i popote ge mate, i takia e Iosep ge ta muholi na matana, i ta maea, “Iau a tabukoi ga mate. O tanu iau na babe a keli purua na robo e Kenan.” Ngane a ngaru ni sike ga tanua e tata, muri ga hamule valai.’ ”
6 E Parao i longo vona a ngavane Iosep, lakea i ta maea, “O sike o tanua e tamamu, a vuhuna o kaba na matana pali.”
7 Lakea e Iosep i sike i tanua e tamana, turane huriki a bolekori, a bakovi dagi ne Parao, e huriki a bakovi dagi lobo na robo o Egipto.
8 E huriki a kabu ne Iosep, e huriki e turana mai, turane huriki a kabu ne tamana, ria lobo ri vano. E huriki a koma kunana ri made mule turana a maka kabu na sipsip, a bulmakau na robo e Gosen.
9 E huriki a bakovi ri rike na karis na hos, ngi ranga ri sike turana. I kupo hateka e huriki ri vano turana.
10 Na tahuna ri bele o Atad, tabukoi o Iordan, ri upu tala a nangi. E Atad a tanga na ni vilatala a vinina vit. Ri vapopo vonga na parava i polorua, ri taringia vonga e tamana.
11 E huriki a Kenan ri matai ria, ri vapopo o Atad, ri ta maea, “E huriki a Egipto ri vapopo ri rata runga na viri mate.” Lakea ni gale liu ra tanga i tabukoi na naru dagi e Iordan, e Abel-misraim.
12 E huriki e tune Iakop ri muri mai kunanea a ngava e Iakop i tarulu mule ria vona.
13 Ri bole lakea na robo e Kenan, ri tanua na babe na malala e Makpela, tabukoi o Mamare. Ra babe turana a malala, e Abraham i kona ne Epron, a bakovi o Hiti.
14 Muri ne Iosep i tanu loboa e tamana, i hamule puru o Egipto turana e huriki e turana. E huriki lobo ri do rikea, ria ranga ri hamule puru.
E Iosep i Luke e Huriki e Turana
15 Na tahuna e tamane ria i mate, lakea e huriki e turana ri ta maea, “Si gi navai ngane? E Iosep ma ge koli a naro hale si ratea vona hosi.”
16 Lakea ri talo rike a ngava ne Iosep, ri ta maea, “Na tahuna e tamane hita i popote ge mate, i tarulu mule mia, i ta maea,
17 ‘Mu takia e Iosep, ge longokaburungi a naro hale mu rata virihia vona hosi.’ Ngane, mi ngaru ni nana ioe go longokaburungi a naro hale ne huriki a vora na Vure ne tamamu.” Na tahuna e Iosep ni vakalongo vona a ngava ne turana mai, i tangi.
18 Muri ri lokovonga, e huriki e turana mai ri turume puru na matana, ri ta maea, “Mia ngane bara mia a vorakato vomu.”
19 Pali e Iosep i ta maea, “Naha ni mangenge, iau, i uka ma iau a Vure.
20 Hosi mu ngaru ni ratapile iau, a vuhuna a Vure i ngaru mua mu gu rata mavonga. Muri a valai a made koea, a kori e huriki ala kupo.
21 Pali ngane, naha ni mangenge, a vuhuna bara matakari mua, turane huriki e tune mua.” Lakea e Iosep i luke mule ria, i pasi valo puru a hatene ria.
E Iosep i Mate
22 E Iosep i made o Egipto turane huriki a kabu ne tamana. I tahoka a pida i 110 i mate.
23 Na tahuna e Iosep i mahuri, e Epraim i vakabele e huriki e tuna, e tubuna. E tune Manase, a rane Makir, i vakabele e huriki e tuna, lakea e Iosep i pau ria.
24 Muri e Iosep i taki e huriki e turana, i ta maea, “Iau a tabukoi ga mate. Pali a Vure ge matakari mua. Muri bara mu ha taroa a robo iea, mu sike lakea na robo a Vure i vakasiria, i ta muholi vona ge habia ne Abraham, e Isak, e Iakop.”
25 Muri e Iosep i taki e huriki e tune Israel bakovi ri gi kaba vona a nita muholi. A nita muholi i maea, “Na tahuna a Vure ge valai ge korimule mua, mu bole tala koea a maka tuhagu, mu kaloho sike turane mua.”
26 E Iosep i tahoka a pida i 110, muri i mate. Ni ru a marasin na podana, i uka ma ge mavuru malaviriri. Muri ni kapo, i tabuli vonga o Egipto.