17
A Naru i Tua Tala na Kedo
1 E huriki a Israel ri ramai a nitane BAKOVI DAGI, ri pea a tabeke i ngeki e Sin. Na tahuna e Bakovi Dagi i taki ria ri gi vano, bara ri malaga ri vano. Ri vano ri bele na tanga e Repidim, ri rata a mada, pali ra tanga iea i uka naru.
2 Lakea ri tahatea e Moses ri ta maea, “O matakanea ngane a naru mi gi nua!”
E Moses i koli, i ta maea, “I navai mu tahate iau? Mu ngaru ni toni a nitora ne BAKOVI DAGI?”
3 Pali e huriki ri mate na marohua, ri deke lakea ne Moses, ri ta maea, “Ge ra o tuli tala mia o Egipto? O ngaru mi gi mate turane huriki e tune mia, a sipsip a bulmakau ne mia?”
4 Muri e Moses i vasileki ne BAKOVI DAGI i ta maea, “A ra ga rata virihi ria vona e huriki nga? Ri tahate hateka, ri ngaru ni padimate iau na kedo.”
5 Lakea e BAKOVI DAGI i takia e Moses, “O laho muga o taki e huriki a gare ne Israel ri gi laho turamu. O bolea a kodo, ra o lagu e Nail vona, o vano.
6 Iau ga pesi langa na kedo na lolo e Horeb, ga dava mua vonga. Na tahuna o valai tabukoi, o bolea a kodo vomu o ubia a kedo dagi, ge bele a naru ge ninu e huriki a viri vomu.” E huriki a gare ri masia e Moses, i ubia a kedo dagi i bele a naru.
7 Ri galea a hini nga e Masa e Meriba, a vuhuna e huriki a Israel ri tahate, ri ta maea, “E BAKOVI DAGI i made turane hita, o i uka?” Na naro iea kunana ri ngaru ni tonia e BAKOVI DAGI.
E Huriki a Israel Ri Vaubi Turane Huriki a Amalek
8 Muri e huriki a Amalek ri valai ri vaubi turane huriki a Israel o Repidim.
9 Lakea e Moses i takia e Iosua, i ta maea, “O vulaki ranga bakovi ne hita. Kuduvi mu vano mu vaubi turane huriki a Amalek. Iau ga pesi langa na lolo, ga nugua a kodo na Vure.”
10 Lakea e Iosua i bole ranga bakovi, ri vano ri vaubi turane huriki a Amalek. E Moses turana e Aron e Hur to sike na lolo.
11 Na tahuna e Moses i toto rike a limana, e huriki a Israel ri vaubi kinigao. Pali na tahuna i totopuru a limana e huriki a Amalek ri vaubi kinigao.
12 Muri e Moses i malulu a limana, i uka ma i toto rike tabu. Lakea e Aron e Hur ru vakamade rikea na kedo. I pesi na dahana koea tara, i pesi na dahana lake tara, ru nugu rike a limana, i harena na haro i rolo.
13 Lakea e Iosua turane huriki a tara vona ri rangi, ri ratapile e huriki a tara ne Amalek.
14 Muri e BAKOVI DAGI i takia e Moses, “O herea na puhu a ngava iea ge luhoia e huriki, e Iosua tara ge longoa a ngava. A ngava i maea: iau ga vakalobo liu e huriki a Amalek, i uka ma ni gi luhoi mule tabu.”
15 E BAKOVI DAGI i ta lobo, lakea e Moses i ratea tara dede i galea, “E BAKOVI DAGI ia a Nivakasiri nau.”
16 Lakea e Moses i ta maea, “E huriki a Amalek ri gege a nitora ne Bakovi Dagi. I mavonga e BAKOVI DAGI bara i vaubi turane huriki a hamone ria vakaroro.”