18
E Ietro i Gosia e Moses
Ngane e Ietro, a prister o Midian, e lahuane Moses, i longo a nuverei na maki a Vure i rata ne Moses turane huriki a Israel, na tahuna e BAKOVI DAGI i vakamariu tala ria o Egipto. *Na parava tara, i valai i gosia e Moses. Na tahuna i lakea pali, e Moses i rudua e girihina e Sipora i lakea ne tamana. Ngane e Ietro i talo mulea e Sipora, *turane tune Moses ala rua bakovi. A tabua a rane Gersom. Muga e Moses i ta maea, “Iau a mosi, a valai a made na robo basi.” A koma bakovi tara a rana e Elieser. Muga e Moses i ta maea, “A Vure ne tata mai i tuhori iau, i korimule iau na limane Parao.”
E Ietro turane Sipora, e tune Moses ala rua ri lakea na tabeke i ngeki tabukoi na lolo na Vure, ra tabeke e Moses i rata a mada i made muga vona. E Ietro i talo rike a ngava ne Moses i ta maea, “Iau e Ietro e lahuamu. Ngane a valai turane girihimu, e tumu bakovi ala rua.
Na tahuna e Moses i longoa a ngava iea i vano i tagui e Ietro na dala. E Moses i lolu puru na ngalane Ietro, i ngurua a garena. Ru vatagui lobo, muri ru dili na kape. Lakea e Moses i vakalongo e Ietro vona a maki lobo e BAKOVI DAGI i rata ne huriki a Egipto, i tuhori e huriki a Israel. I vakalongo e Ietro vona a maka maregoa i bele ne ria na dala, na naro e BAKOVI DAGI i tuhori i matakari ria.
E Ietro i vivi na tahuna i longo a maka nuverei ne BAKOVI DAGI i rata, i korimule e huriki a Israel na limane huriki a Egipto. 10 Lakea i ta maea, “Ni gi kavurike a rane BAKOVI DAGI, i korimule mua na limane huriki a Egipto, na limane Parao. 11 Ngane a lohoka vona e BAKOVI DAGI i rangi a vure lobo, a vuhuna i matakari mua na tahuna e huriki a Egipto ri vakavora hateka mua.” 12 Ru tuverei lobo, lakea e Ietro i bole a maka nihabi gutu-vuro turana a nihabi ranga, i habi na Vure. Muri e Aron turane huriki a gare ne Israel ri valai ri kani a bret turane Ietro na matana Vure.
A Bakovi Ge Pelekado a Maregoa
(Vinara 1:9-18)
13 Na parava muri e Moses i made i talangaki a maka maregoa ne huriki a Israel. E huriki ri ngaru ni masia ri pesi haluia na hatelanga i harena na malunga. 14 E Ietro i matai a maki e Moses i rata ge tuhori e huriki, lakea i takia, “Ioe o rata hateka a leho ni tuhori e huriki. I navai ioe kunana o ratea a leho iea, na tahuna ri valai ri pesi halui ioe na hatelanga i harena na malunga?”
15 Lakea e Moses i koli, i ta maea, “Ri ngaru ni lohoka na maki a Vure i ngaru ri gi rata, lakea ri valai nau. 16 Na tahuna a bakovi ala rua ru tahoka a rongova na maki tara, bara ru valai nau, a pelekado rua, a vakalobo a rongova ne rua. Muri bara tovo rua na maka vinara na Vure.”
17 Lakea e Ietro i takia, “Ioe i uka ma o lohoka ni ratena a leho iea. 18 Ra leho iea i mava hateka vomu. Ioe kikeri i uka ma o kara ni ratena. Bara i vakamalulu a tuhamu. 19 O longo valai, ga taki ioe vona tara naro go ratea vona a leho vomu. Ioe o ramaia, a Vure bara i turamu. I kamumu hateka go vakalongo a nitana Vure ne huriki. A maka leho ranga, o habi ne ria. 20 Pali ioe, o tovo ria na maka vinara lobo na Vure. O taki ria vona a vinara ri gi ramai, a leho ri gi rata. 21 O vulaki a bakovi maratarata ri lohoka, ri ta muholi, ri ngaru a Vure, ge ria a bolekori. Ri gi matakari e huriki ge ala 1,000, ge ala 100, ge ala 10. 22 Re huriki nga, ge ria a bakovi ni pelekado a ngava. Ria kunana ri gi pelekado a maregoa kiroko. Pali a maka maregoa dagi ri gi taparaki valai vomu, o pelekado. Na naro iea kunana bara ri tuhori ioe, i uka ma go marego hateka. 23 O ramaia a ngava a taki ioe vona, a vuhuna a Vure kunana i ngaru ioe go ratea. Ioe bara o ramai a ngava nau, i uka ma ge malulu a tuhamu. Muri e huriki bara ri hamule na tanga ne ria ri vivi.”
24 E Moses i longo mai a ngava kamumu ne Ietro. 25 I vulaki e huriki a bakovi kamumu na lohokanga ne Israel, i ru ria a bolekori, ri matakari e huriki ala 1,000, ala 100, ala 10. 26 A leho ne ria ri longo a ngava na maregoa, ri pelekado. A maka maregoa kiroko ri pelekado. Pali a maka maregoa dagi ri bole lakea ne Moses i pelekado. 27 Muri e Moses i taloa e lahuana, i hamule mai a robo vona.
* 18:2 Nim 2:21-22 * 18:3 Apo 7:29