39
A Nirodo na Prister Ni Rata
(Nimariu 28:1-14)
1 E Besalel turane huriki a mari ri bole a maka vuna sipsip i gomagoma, i kuakua, i vururu ni rata a bagetua kamumu na prister, ge rodo na tahuna ri leho na Tabeke Nitaba. A maka bagetua kamumu ne Aron, ni rata ramai a nitane BAKOVI DAGI i taki e Moses vona.
2 A bagetua nga ni vakabagetu na hotu ni rata na gol, na hotu ni rata na maka vuna sipsip gomagoma, i kuakua, i vururu.
3 A gol ni ubi na ama i lili kiroko liu, ne vona ni rahi dili na bagetua turana a hotu gomagoma, i kuakua, i vururu.
4 Muri ni rata a palabele na loho i rua, ne vona ni huraki a bagetua, bara i tavore na lohona prister.
5 A palabele ni rata na lilina kala ne vona ni tango tata a bagetua iea. A maka bagetua ni rata na hotu ni rata na gol, na hotu ni rata na maka vuna sipsip gomagoma, i kuakua, i vururu, i ramaia a nitane BAKOVI DAGI i vakuku e Moses vona.
6 Ri here a rane huriki e tune Israel bakovi na kedo oniks i rua, ni vakabagetu na gol.
7 Muri ni kolotata a kedo nga na palabele ra i nugutata a kala na lohona prister, i ramaia a ngava e BAKOVI DAGI i vakuku e Moses vona. Ra kedo nga ne vona ni luhoi mule e huriki e tune Israel bakovi.
A Kala Kiroko na Ngalana Prister
(Nimariu 28:15-30)
8 Ri rata a kala na ngalana prister manga a bagetua ranga na prister. Ni vakabagetu na hotu ni rata na gol, na hotu ni rata na maka vuna sipsip gomagoma, i kuakua, i vururu.
9 A kala na ngala ni pilu kamumu na kurukuruna, a niolana, a nibolana i palupulupu, i 22 sentimita.
10 A maka kedo ni kolo na tete i va. Na tete muga ni kolo dili a sardius, a topas, a karbanakel.
11 Na ruana tete ni kolo dili a kedo a emeral, a sapaia, a daiman.
12 Na toluna tete ni kolo dili a iasin, a aget, a ametis.
13 Na vana tete ni kolo dili a beril, a oniks, a iaspa. A kedo i taku ni vakabagetu na gol, muri ri varomu dili na bagetua.
14 A rane huriki e tune Israel ni here takutaku na kedo i ravulu a polona i rua, ge a kilakila na kabu takutaku ne Israel.
15 A sen i rua ni rata na gol kabakaba ne vona ni tangotata a kala na ngala,
16 a bagetua na gol i rua, a halui ni rata na gol i rua. Ni varomu a halui nga, polomeli na nimodona kala na ngala.
17 Muri ni ru a sen i rua ni rata na gol, a halui i rua na harena kala na ngala.
18 A bagetua na gol ni varomu dili na harena sen, ni kolo dili na palabele i nugutata a kala.
19 Ni rata na gol a halui i rua, ni kolo polotano na nimodona kala na ngala tabukoi na kala dagi.
20 A halui gol i rua ni rata tabu ni varomu na palabele i rua i nugutata a bagetua, polomeli na palabele ni rea halui a kakai.
21 Ni bole a mota gomagoma, ni varomu a halui i rua na kala na ngala i lakea na halui i rua na bagetua dagi. A kala na ngala i madoko tata na palabele, i uka ma ge mavuka, i ramaia a ngava e BAKOVI DAGI i vakuku e Moses vona.
A Nirodo Ranga ne Huriki a Prister
(Nimariu 28:31-43)
22 E Besalel turane huriki a mari ri bole a hotu gomagoma ri rahi a nirodo ola ola ne vona ni kolo turana a bagetua.
23 Ni rahi halui a murina hini ni rodo dili a gina viri vona, lakea i uka ma ge marape.
24-26 A hotu legelege ni bole ni rahi dili a maki i manga a kanena kai a pomigranet. A maka belo ni rata na gol kabakaba. A pomigranet a belo ni rahi na harena bagetua polotano. A maka belo ni ru na maka kurukuruna pomigranet ri tavore, i ramaia a ngava e BAKOVI DAGI i vakuku e Moses vona.
27-29 A maka maki ne Aron turane huriki e tuna ri rodo, ni rata na kala kamumu, a nirodo ola ola, a hoi, a poho, a palabele, a paga. Ri bole a maka hotu legelege ni rahi dili a bagetua kamumu, ri ramai a ngava e BAKOVI DAGI i taki.
30 A hulongi na prister ni rata na gol kabakaba, ge vakasiria i leho ne BAKOVI DAGI kunana. A nita ni here vona i maea, “Ne vona e BAKOVI DAGI.”
31 Ni bole a mota gomagoma ni kolo na hoi a hulongi, i ramaia a ngava e BAKOVI DAGI i vakuku e Moses vona.
A Leho i Lobo
(Nimariu 35:10-19)
32 E huriki a Israel ri ru palupu lobo a maka mahalana kape, e BAKOVI DAGI i vakuku e Moses vona ge bole.
33 Muri ri habi ne Moses a kape turana a maka mahalana, a maka kinau, a maka mito, a maka karo, a maka butu, a maka vuhu-butu ne vona ni vakapesi a maka butu,
34 a kadis na kape ni rata na kulina sipsip a toga, a kadis tara ni rata na kulina lui, a kala dagi ne vona ni naviri mule a Tabeke Nitaba Hateka,
35 a Tava na Ngava Dagi turana a binolena i rua. Ra hini polomeli na tava a murina nidodo.
36 Ri bole valai a dede turana a maka mahalana, a maka bret ne vona ni ru na dede,
37 a butu na lam ni rata na gol kabakaba, a maka lam turana a namona oliv.
38 Ri bole valai a dede ni rata na gol, a nibiri ne vona ni gamai a maki na nivasileki, a havu mangisipa, a kala ne vona a matana kape.
39 Ri bole valai a dede ni rata na bras turana a tabekena bras ni vakamadoko na vahana dede, a binole ni kaloho a dede, a maka mahalana dede, a tavila ni hilolo turana a dede vona;
40 a maka kala na nure, a maka mito, a maka butu, a maka vuhu ni vakapesi a butu vona, a kala dagi na logo na kape, a maka mota ne vona ni kolotata a maki, a maka niroka ne vona ni tua a mota, a maka maki ne vona ni rata a leho pololilo na kape,
41 a maka bagetua kamumu ni gi rodo, ni gi rata a leho pololilo na Tabeke Nitaba, a maka bagetua ne Aron, ne huriki e tuna.
42 E huriki a Israel ri rata lobo a maka maki e BAKOVI DAGI i vakuku e Moses vona.
43 E Moses i lei kamumu a maki ri rata, i vivi, a vuhuna ri rata lobo a maki e BAKOVI DAGI i vakukua vona. Muri e Moses i gamai ria.