40
A Kape Ni Vakapesi
E BAKOVI DAGI i takia e Moses, “O longo, na mugana parava na keva, mu vakapesia a mailo nau. O bolea a Tava na Ngava Dagi o ru dilia o vulala karia na kala dagi. O ru dilia a dede o ru langa vona a maka mahalana. Muri o ru dilia a butuna lam o ru langa na bakona a maka lam. O bolea a dede ni rata na gol ne vona a havu mangisipa, o vakatabulia tabukoi na Tava na Ngava Dagi, polovavo na kala i naviri mule a tava. O vakatavorea a kala na matana mailo na Vure. O bolea a dede ne vona a nihabi gutu-vuro, o ru tabukoia na matana kape. O rua na koropalana Kape na Vaponga a dede na nihabi gutu-vuro, a tavila, o kiru dili a naru vona. O vonu a maka mito o tura haluia a mailo nau, o vakatavorea a kala dagi na matana.
“Muri o bolea a nibiri, o gamai a mailo nau turana a maka mahalana ga maki nau. 10 A dede ne vona a nihabi gutu-vuro tara, o gamaia turana a maka mahalana. 11 A tavila turana a dede vona, ngi ranga o gamai.
12 “O tuli lakea na matana Kape na Vaponga e Aron turane huriki e tuna a bakovi, o vahilolo ria vonga. 13 Muri o vakarodoa na bagetua na prister e Aron, o guru langa a nibiri vona, o gamaia ge ia a prister. 14 Muri o tuli valai tabukoi e huriki e tuna bakovi, o vakabagetu ria na bagetua na prister. 15 O gamai ria ge manga a hini o gamaia e tamane ria, ge ria a prister nau. Muri e huriki a hamone ria bara ri rata a leho na prister vakaroro.”
16 E Moses i rata lobo a maka leho e BAKOVI DAGI i taki vona ge rata. 17 Na mugana parava, na mugana keva, na ruana pida muri na tahuna ri mariu tala o Egipto, a mailo na Vure ni vakapesi. 18 Na tahuna i vakapesi a mailo na Vure, i bole a maka vuhu-butu, i ru na malala ne vona ni vakapesi a maka mito. I ru tavalavala a maka karona nure; i vakapesi a maka butu ne vona ni vakatavore a kala. 19 Muri i ru langea na mailo na Vure a kadis, i kavitagu tabua a kape, i manga a ngava e BAKOVI DAGI i vakukua vona.
20 I bole a kedo i rua ni here vona a Ngava Dagi, i ru dili na Tava na Ngava Dagi. I rodo dili a binole na halui na tava, i kavitagua a matana tava. Ra matana tava a murina nidodo. 21 Muri i ru pololilo na kape a tava, i vakatavorea a kala dagi i naviri mulea, i manga a ngava e BAKOVI DAGI i vakuku e Moses vona.
22 E Moses i ru dilia na Tabeke Nitaba a dede na tabeke mule sike. 23 Muri i bole a maka bret, i ru na dede na matane BAKOVI DAGI, i manga a ngava i vakukua vona. 24 Muri i ru dilia na Kape na Vaponga na hini mule puru, tabukoi na dede a butuna lam. 25 Muri i vakapesi a maka lam na bakona butu, i nami i para na matane BAKOVI DAGI, i ramaia a ngava i vakuku e Moses vona.
26 I ru dilia a dede ni rata na gol na Kape na Vaponga polovavo na kala. 27 I rungani langea na dede a havu mangisipa, i ramaia a ngava e BAKOVI DAGI i vakukua vona. 28 Muri i vakatavorea a kala na matana mailo na Vure.
29 Muri i bole a dede na nihabi gutu-vuro i ru tabukoia na matana mailo na Vure. Ra dede iea ne vona ni gutu-vuro a sipsip, a vit, i ramaia a ngava e BAKOVI DAGI i vakukua vona.
30 I ru a tavila na koropalana dede, a Kape na Vaponga, i guru dili a naru, ne vona ni hilolo. 31 Muri e Moses e Aron turane huriki e tune Aron bakovi ri vahilolo a limane ria, a vahane ria vona a naru iea. 32 Muga ne ria ri dili na kape o ri lakea na dede, bara ri vahilolo taro a limane ria a vahane ria, i ramaia a ngava e BAKOVI DAGI i vakuku e Moses vona.
33 Muri e Moses i tura halui a mailo na Vure a dede, i vakatavorea a kala na poridala na nure. Ngane i vakalobo liu a maka leho.
A Bagetua na Vure i Kavitagua a Kape
34  *A leho i lobo, muri a bubu i kavitagua a Kape na Vaponga, a parana e BAKOVI DAGI i paraia a mailo vona. 35 Pali e Moses i keri ni dili na Kape na Vaponga, a vuhuna a bubu i pesi langa vona, a parana e BAKOVI DAGI i paraia.
36 Na tahuna a bubu i pe a mailo na Vure, e huriki a Israel bara ri bole a maka galesi ne ria, ri ramaia. 37 Pali a bubu bara i tababana ni pesi langa na mailo na Vure, i uka ma ri gi vano. Na tahuna ri masia a bubu i pea a mailo, ngane bara ri pesi rike ri ramaia. 38 A bubu ne BAKOVI DAGI i pesi langa na mailo na Vure na haro, a kanono i para pololilo na bubu na rodo. Ra maki nga i maea kunana, i matai e huriki a Israel na tahuna ri havai.
* 40:34 1Ki 8:10-11; Ais 6:4; Ese 43:4-5; Kap 15:8