A Leho Na Kabu Ne
Levi
A Nita Vakalohoka
E Moses i herea a puhu na hinere iea. Ni luhoi i here a puhu na hinere i lima, ni gale na nita Hibru a “Tora”. Ra puhu ne Levi, a toluna puhu na hinere i herea.
Ni luhoi e Moses i herea tabukoi na pida e 1,400 BC, ra muga ne Kristo ni poda.
Ni luhoi e Moses i herea na tahuna e huriki a Israel ri laho viliha na tabeke i ngeki.
I here lakea ne huriki a Israel ne vona ni tuhori e huriki a prister, re huriki na kabu ne Levi, ri gi matakari kamumu a maki na lotu ne huriki a Israel.
A puhu na hinere iea i taki a leho na kabu ne Levi. Ra kabu a Vure i vulakia ge rata a leho na prister, ge matakari a lotu ne huriki a Israel. Ra puhu iea i tahoka a maka vinara legelege, i taki a maka naro ge rata e huriki a prister ri gi matakari kamumu e huriki a Israel na lotu ne ria. I tahoka tabu ranga ngava ne vona ni vakasiri a nimade ne huriki a Israel, ge tuhori ria, ri gi ramai kamumu a maka habu dagi na lotu.
A pelegona a maka vinara i maea: A Vure i kiripiripi, i rata a naro kamumu i malamala, i vakasiri e huriki a Israel ri gi matakari kamumu ria, ri gi made tabukoi vona. A Vure i rata a naro kamumu, a naro malamala, si gi rihia, si gi rata a maka naro i ngaru.
Na tahuna e huriki a koma ne Israel ri ngaru ni lohoka na nitana Vure, bara ri vakatubu ne sapta 16-27 na puhu ne Levi. Ra maka septa nga i tahoka a maka ngava i kupo, ne vona ni vakasiri e huriki ri gi ramai a vilo kamumu. Muri e Isu i vakalongo tabu a tabeke tara na ngava iea. I tabuli ne sapta 19:18, i ta maea, “O ngaru e huriki a turamu i manga a hini o ngaru mule ioe.”
YHWH: BAKOVI DAGI
A rana Vure na hinere, ni here na nita Hibru i manga e YHWH, o Iave. A pelegona nita Hibru iea, i manga, “Iau ra Iau.” Na tahuna o matai a ngava e BAKOVI DAGI, a leta lobo ri dagi, i vakasiri manga na nita Hibru a ngava e YHWH i tabuli.
1
A Vinara na Nihabi Gutu-Vuro
E Levi E BAKOVI DAGI i gale pololilo na Kape na Vaponga, i takia e Moses i ta maea, E Levi “O taki e huriki a Israel, a viri i ngaru ni habi a nihabi nau, ge bolea tara bulmakau, a sipsip, o a meme ge habia.
“Bara a viri i ngaru ni habi a nihabi gutu-vuro nau, ge bolea a bulmakau a toga ge gavutuvutu. Ge ratea a nihabi iea, ge taparaki lakea tabukoi na matana Kape na Vaponga, lakea iau, e BAKOVI DAGI, bara ngarua. Ge ru langea na gina bulmakau iea a limana, lakea iau bara ngarua a nihabi vona, bara i kavitagua a naro hale vona. Muri ge rabalakia a bulmakau iea na matane BAKOVI DAGI, lakea e huriki a prister, e tune Aron bakovi, ri gi bole a darana, ri gi lakea na dede i tabuli tabukoi na matana Kape na Vaponga, ri gi voro tamali na tabeke lobo na dede. Muri ra bakovi iea ge riri talea a kulina bulmakau, ra nihabi gutu-vuro, ge poka kesikesia. E huriki a prister, e tune Aron, ri gi tunua na dede a kanono, ri gi ru langa na kanono a kai. Muri ri gi bole a maka bobona, a gina, a maka vina ri gi ru langa na kanono na dede. Pali a mahalana, a vahana, ge loi kamumu na naru. Muri ge habi na prister ge gutu lobo na dede, ge a nihabi gutu-vuro, ge a nihabi ni gutu na kanono. Na tahuna e BAKOVI DAGI i burongi a mangina kinani, bara i vivi.
10 “Bara a viri i habi a sipsip o a meme ne vona ni habi gutu-vuro, ge bolea a toga ge gavutuvutu. 11 Ge rabalakia na matane BAKOVI DAGI na tabeke mule sike na dede. E huriki a prister ri gi bole a darana, ri gi voro tamali lakea na tabeke lobo na dede. 12 Ge poka kesikesia, ge bole a mapana, a vina, ge habi na prister, ge ru langa na kanono na dede. 13 Pali a maka mahalana, a pakana ge vahilolo na naru. Muri ge habi na prister ge gutu lobo na dede, ge a nihabi gutu-vuro, ge a nihabi ni gutu na kanono. Na tahuna e BAKOVI DAGI i burongi a mangina kinani, bara i vivi.
14 “Bara a viri i ngaru ni habi a kadirovo ge a nihabi gutu-vuro ne BAKOVI DAGI, ge bolea tara balu, ge habia na prister. 15 Muri a prister ge bolea a balu ge lakea na dede, ge horia a lohona ge mate. Ge rakudu talea a gina balu, ge gutua na kanono na dede, ge guru tala na gagana dede a darana. 16 Ge pasi vuroki a vuna balu, ge kini talea a guruna ra i tabuli vona a maki i kani, ge vuroki lakea na tabeke ni ru kadolu a habulo vona, na tabeke na nirikena haro na dede. 17 A prister ge nugua na karapana balu ge tua tala, pali nahea ge tuarape kesikesia. Muri ge habi na prister ge gutu langa na kanono na dede, ge a nihabi gutu-vuro, ge a nihabi ni gutu na kanono. Na tahuna e BAKOVI DAGI i burongia a mangina kinani, bara i vivi.”