14
Kumbra uge ti nanari kumbra ti
1 Nanari tamo naŋgi naŋgo segi are miligi getentoqnsib mareqnub, “Qotei saiqoji.” Tamo naŋgi di tamo uge. Naŋgi kalil kumbra tulaŋ ugedamu yeqnub. Bei a yala kumbra bole yosaieqnu.
2 Tamo Koba Qotei a laŋ qureq di sosiqa tiroqnsiq tamo naŋgi unjreqnu. A tamo qudei powo ti unub qaji naŋgi qa ŋameqnu. Od, a tamo qudei aqa kumbra dauryeqnub qaji naŋgi qa ŋameqnu.
3 Ariya a tamo deqaji bei itosai. Tamo kalil naŋgi gam bole uratekriteqnub. Naŋgi kalil tamo uge. Bei a yala kumbra bole yosaieqnu. Sai bole sai.
4 Tamo Koba Qotei a endegsi mareqnu, “Tamo kumbra uge yeqnub qaji naŋgi powo ti unub e? Sai. Naŋgo kumbra agiende. Naŋgi na ijo segi tamo uŋgasari naŋgi ñumoqnsib padaltnjreqnub. Tamo a bem uysim kobotqas dego kere. Naŋgi e pailbosaieqnub.” Qotei a degsi mareqnu.
5 Qotei a tamo uŋgasari kumbra bole tiŋtiŋ dauryeqnub qaji naŋgi ombla unub. A tamo uge naŋgi ombla sosai deqa naŋgi ulaugetoqnsib ginda gindaŋeqnub.
6 Tamo uge naŋgi dena tamo uŋgasari iŋgi iŋgi saiqoji unub qaji naŋgo wau ugeugeiyetnjreqnub. Ariya di uŋgum. Tamo uŋgasari naŋgi di Tamo Koba Qotei aqa areq di ulieqnub deqa naŋgi bole unub.
7 Ijo areqalo kobaquja agiende. Tamo Koba Qotei a na Saion qure qaji tamo bei qariŋyim bosim Israel naŋgi eleŋeme. Israel naŋgi Qotei aqa segi tamo uŋgasari unub deqa a na naŋgi aqaryainjrimqa naŋgi olo boleabqa naŋgi tulaŋ areboleboleinjreme. Od, Jekop aqa leŋ naŋgi are tulaŋ boledamuinjreme. Ijo areqalo kobaquja agide.