15
Kumbra Qotei a tulaŋ areareteqnu qaji
O Tamo Koba Qotei, yai naŋgi ino atra tal miligiq di sqa kere? Yai naŋgi ino segi getento mana goge dia awoqa kere? Mana di aqa ñam Saion.
Tamo une saiqoji sosiqa gaigai kumbra bole yeqnu qaji a qujai ino atra tal miligiq di sqa kere. Od, tamo aqa are miligiq na anjam bole mareqnu qaji a qujai ino segi getento mana goge dia awoqa kere. Tamo dena tamo qudei naŋgo ñam ugetosaieqnu. A na aqa kadoi naŋgi ugeugeinjrosaieqnu. A na tamo qudei naŋgi misiliŋnjrosaieqnu. Tamo dena tamo uŋgasari Qotei na qoreinjreqnu qaji naŋgi tulaŋ uratnjreqnu. Ariya a na tamo uŋgasari Tamo Koba Qotei aqa sorgomq di unub qaji naŋgo ñam soqtetnjreqnu. A gaigai aqa segi anjam a nami marej qaji di dauryeqnu. Aqa kumbra dena a gulbe kobaquja oqas di uŋgum. A aqa anjam di uratqasai. A na tamo qudei naŋgi silali enjrimqa naŋgi a kamba silali yqajqa batiamqa a silali di segi yainjrqas. A silali aqa oto turtosim yainjrqasai. Tamo qudei naŋgi a silali yqa osib walawalaiyosib minjqab, “Ni na awai endi osim tamo bole bei aqa jejamuq di anjam uge laŋa qame.” Naŋgi a degsib minjqab di a naŋgo anjam dauryqasai. Tamo kumbra bole deqaji yeqnub qaji naŋgi siŋgila na tigelesqab. Deqa gulbe bei na naŋgi yala gotraŋnjrqa keresai.