7
Tamo gulbe ti unu qaji aqa pailyo
1 O ijo Tamo Koba Qotei, e ino areq di ulieqnum deqa ni na e aqaryaibe. Ni degyqam di tamo e teteibeqnub qaji naŋgi na e moiyotbqa yoqnib keresaiinjrqas.
2 Tamo uge naŋgi dena e ugeugeibqa laqnub. Laion a tamo aqa jejamu pupoiyeteqnu dego kere. E aqaryaibqajqa tamo bei sosai deqa ni na e osim aqaryaibime.
3 O ijo Tamo Koba Qotei, e kumbra uge bei yonum kiyo e tamo bei ugeugeiyonum kiyo
4 e ijo was gisaŋyosim anjam uge aqa jejamuq di qametonum kiyo e ijo jeu tamo laŋa ugetonum kiyo degamqa
5 ni na ijo jeu tamo naŋgi minjrimqa naŋgi e teteibosib ojebe. Ojsib e siŋga na sosisib ugeugeibosib moiyotbebe.
6 O Tamo Koba Qotei, ijo jeu tamo naŋgi na e qoto itbeqnub deqa ni tigelosim naŋgi qa minjiŋ oqim naŋgi ŋolawotnjre. O ijo Qotei, ni tigelosim e aqaryaibosim naŋgo une qa naŋgi peginjre.
7 Ni laŋ qureq dia ino awo jaram kobaq di awoosim sawa bei bei qaji naŋgi endegsi minjre, “Niŋgi bosib ijo areq di korooiy.” O Abu Qotei, naŋgi babqa ni na naŋgi taqatnjre.
8 O Tamo Koba Qotei, e qalie, ni na sawa bei bei qaji naŋgo une qa naŋgi peginjreqnum. Ariya e kumbra tiŋtiŋ ti kumbra bole ti dauryeqnum deqa ni na e endegsi merbe, “Ni une saiqoji unum.”
9 O Abu Qotei, ni tulaŋ tiŋtiŋ unum. Ni na tamo uŋgasari naŋgo areqalo ti naŋgo are miligi ti tenemteqnum. Deqa ni na tamo uge naŋgo kumbra uge kalil torei kobotime. Osim olo tamo bole tiŋtiŋ naŋgi siŋgilatnjre.
10 Qotei a ijo taqato tamo. A dumu bul unu. A na tamo uŋgasari naŋgo are miligiq di une saiqoji unub qaji naŋgi padalaib deqa aqaryainjreqnu.
11 Qotei a anjam pegiyo tamo bolequja. A bati gaigai tamo uŋgasari kumbra uge yeqnub qaji naŋgi qa minjiŋ oqeteqnu.
12 Tamo uge naŋgi are bulyqasai di Qotei na aqa serie ñomyosim aqa aŋ dego titosim qoto qa tigelqas.
13 A na aqa qoto qa iŋgi iŋgi gereiyqo. A na qaja ŋamyuwo ti di dego gereiyqo. Qaja dena a na tamo uge naŋgi ñumim moreŋqab.
14 Niŋgi tamo uge naŋgi unjriy. Naŋgi kumbra uge dauryqajqa are qaloqnsib une gargekoba yoqnqajqa arearetnjreqnaqa gisaŋ anjam mare mare laqnub.
15 Naŋgi na tamo qudei naŋgi ojqajqa deqa sub bogeqnub. Ariya naŋgi segi ululoŋosib sub di miligiq aiqab.
16 Naŋgo une dena kamba olo naŋgi ugetnjrqas. Naŋgi tamo qalo qaji unub deqa naŋgo kumbra dena olo puluosim naŋgi ugeugeinjrqas.
17 Qotei Goge Koba a tulaŋ tiŋtiŋ unu. Deqa e na Tamo Koba Qotei a biŋiyoqnsiy a qa louoqnsiy aqa ñam soqtoqnqai.