98
Qotei a tamo uŋgasari kalil naŋgo Mandor Koba unu
1 Tamo Koba Qotei a maŋwa bole bole babteqnu deqa niŋgi lou bunuj na a qa louoqniy. Aqa siŋgila kobaquja na ti aqa segi kumbra bole na ti a qoto buŋyeqnu.
2 Tamo Koba Qotei a jeu tamo naŋgo baŋq na Israel naŋgi eleŋeqnu. A na aqa wau di ubtoqnsiqa sawa bei bei qaji naŋgi osornjreqnu. A na aqa kumbra tiŋtiŋ dego naŋgi osornjreqnu.
3 A aqa qalaqalaiyo kumbra ti aqa anjam bole ti deqa are qaloqnsiqa Israel naŋgi qa duleqnu. Deqa a naŋgi uratnjrosaieqnu. Gago Qotei a qoto buŋyoqnsiqa jeu tamo naŋgo baŋq na iga eleŋeqnu. Aqa kumbra di sawa bei bei qaji kalil naŋgi uneqnub.
4 O tamo uŋgasari mandamq endi unub qaji, niŋgi leleŋ na ti arebolebole na ti lou tigeltoqnsib Tamo Koba aqa ñam soqtoqniy.
5 Od, niŋgi gombiŋ na lou bolequja yoqnsib Tamo Koba Qotei aqa ñam soqtoqniy.
6 Qotei a Mandor unu. A Tamo Koba Qotei. Deqa niŋgi gul anjamoqnsib yumba qamoqnsib leleŋoqnsib Qotei qa areboleboleiŋgeme.
7 O yuwal ti qe kalil inoq di unub qaji ti mandam ti tamo uŋgasari kalil inoq di unub qaji ti, niŋgi Qotei qa louoqniy.
8 O ya kokba, niŋgi baŋ qaloqniy. O mana, niŋgi areboleboleiŋgim Qotei aqa ŋamgalaq di louoqniy.
9 Tamo Koba Qotei a bosim sawa bei bei qaji naŋgi peginjrqas. Od, a kumbra tiŋtiŋ na tamo uŋgasari kalil mandamq endi unub qaji naŋgi peginjrqas. A anjam bole dauryosim naŋgi peginjrqas.