99
Qotei a Mandor Koba unu
1 Tamo Koba Qotei a Mandor unu. A aqa awo jaram kobaq di awesonaqa laŋ aŋgro naŋgi na awo jaram di ambletejunub. O tamo uŋgasari sawa sawa kalilq di unub qaji, niŋgi Qotei qa ulaugetosib ginda gindaŋiy. Mandam a dego reŋgiŋeme.
2 Saion qureq dia Tamo Koba Qotei a ñam koba ti sosiqa tamo uŋgasari sawa sawa kalilq di unub qaji naŋgi taqatnjreqnu.
3 Qotei a tulaŋ getento koba unu. Deqa Qotei, ni marimqa tamo uŋgasari naŋgi ino ñam koba biŋiyosib ino ñam soqtosib ni qa ulaebe.
4 O Mandor siŋgila ti unum qaji, ni kumbra bole qa tulaŋ arearetmeqnu. Iga Israel tamo uŋgasari unum. Ni kumbra tiŋtiŋ na iga taqatgoqnsim kumbra bole na iga pegigeqnum.
5 Gago Tamo Koba Qotei a tulaŋ getento koba unu. Deqa tamo uŋgasari, niŋgi Qotei aqa ñam soqtosib aqa siŋga atqajqa sawaq dia louoqniy.
6 Moses Aron wo naŋgi aiyel Tamo Koba Qotei aqa atra tamo soqneb. Samuel a dego Israel tamo uŋgasari naŋgi koba na Qotei aqa ñam metoqneb. Yeqnabqa Qotei a naŋgo pailyo quoqnej.
7 Qotei a laŋbi miligiq di sosiqa aqa dal anjam Moses Aron wo naŋgi aiyel enjrnaqa naŋgi dal anjam di dauryoqneb.
8 O gago Tamo Koba Qotei, bati deqa ni ino segi tamo uŋgasari naŋgo kumbra uge qa naŋgi kambatnjroqnem. Ariya ni olo naŋgo pailyo quoqnsim naŋgo une kobotetnjroqnem.
9 Gago Tamo Koba Qotei a tulaŋ getento koba unu. Deqa iga aqa ñam soqtosim Saion mana goge dia louoqnqom. Mana di aqa segi mana.