Dónbeenì páaníi fĩnle vũahṹ Tesaloniikisa ɲun níi 1

Ho ɲun níi vũahṹ na ó o Poole túara nɔn ho

Tesaloniiki

kèrètĩ́ɛwa kuure yi

Vũahṹ túaró ɲúhṹ

Ho vũahṹ mu na kà yi, ó o Poole bĩnía lá a Ɲúhṹso ɓuenló bìo wee zéení yahó. Lé bìo ɓa nùpua ɓúi hĩ́a wee bío wéréwéré le o ɓuara vó. Á mu dó le zã́níi ɓa kèrètĩ́ɛwa kuure yi. Ɓa wee bío le o Yeesu pã́ le mí máa fé mí. O Poole bía le sã́ni ò o Yeesu bĩní ɓuen, ó o nì-sũmúi ɓúi á à hĩ́ní ì kã́aní ɓa nùpua, á ɓa à sánsá le Dónbeenì. Ɓa ɓúi wee leéka le bìo ó o Ɲúhṹso ɓuenló wã́a sùaráa kà síi, á mí ì kɛɛní máa wé è sá dɛ̀ɛ, á ɓa ninzàwa wé è díiní. Ó o Poole pã́ mu, ò o bía bìo kà nɔn ɓa yi: «Yìa yí wi ò o wé sá dɛ̀ɛ, á ɓànso ɓɛ̀n mún yí ko ò o wé dí.»

O túara ho nín-yání vũahṹ á pĩina bìo yɛn bṹn mɔ́n ó o ɓɛ̀n túara hìa kà.

1 Mu lé warɛ́n, o Poole là a Silivɛ̃n là a Timɔtee á wee túa ho vũahṹ na kà á à na minɛ́n Tesaloniiki kèrètĩ́ɛwa kuure yi, minɛ́n na bìo sã̀ wàn Maá Dónbeenì là a Ɲúhṹso Yeesu *Krista yi. 2 Le o Maá Dónbeenì là a Ɲúhṹso Yeesu *Krista wé mí sãamu làa mia, à na ho hɛ́ɛrà mia.

O Ɲúhṹso Yeesu ɓueé fĩ̀ le cítíi

3 Wàn zàwa lè wàn hĩ́nni kèrètĩ́ɛwa, wa ko wa wé dé le Dónbeenì bárákà fɛ́ɛɛ mi bìo yi. Mu térénna à wa wé mu, lé bìo mi sĩadéró le Dónbeenì yi wee va lè mí yahó làa sòobɛ́ɛ, á le waminì na mi nì-kéní kéní wa làa mín á wee dé wán. 4 Lé bṹn nɔn wa wee khòonínáa waten ɓa kèrètĩ́ɛwa kuio tĩ́ahṹ bìo mi tà fárá dĩ̀n sese bìo yi, làa bìo ɓa nùpua ɲina mia á wee beé mi lò à mi pá tà dó mi sĩa o Yeesu *Krista yi.

5 Mu wee zéení le le Dónbeenì cítíi fĩ̀ló térénna. Lé bṹn ǹ na ká mi ì koń lè le Dónbeenì bá-zàmu, bìo mi lò wee be bìo yi. 6 Bìo térénna lé bìo le Dónbeenì á à wé. Bìa wee beé mi lò á le è beé lò. 7 Minɛ́n na lò wee be á le Dónbeenì khíi na hã vũńnà yi làa wɛn pã̀ahṹ na ó o Ɲúhṹso Yeesu khíi yòó lé ho wáayi lè mí wáayi tonkarowà na pànká wi á ɓueé lií zéení míten. 8 O ò ɓuen ho dɔ̃hṹ na yèkèyèkè yi, á ɓueé beé bìa yí wi ɓa zũń le Dónbeenì lò, á yí máa bè wa Ɲúhṹso Yeesu bín-tente yi. 9 Lònbee na ɲii mía lé dìo á à yí ɓa. Le Dónbeenì á à ɲa ɓa à ɓa á khɛ̀n lerɛ́n lè mí dàńló na cùkú wi yi. 10 Nɔ̀nzoǹ na o ò lé á à ɓuen yi, á bìa bìo sã̀ a yi á à dé ho cùkú wo yi. Bìa dó mí sĩa o yi á à mi a, á à zã̀maka a bìo yi. Minɛ́n mún ǹ kɛń ɓa tĩ́ahṹ, lé bìo mi tà le bíonì na wa buera nɔn mia bìo.

11 Lé bṹn nɔn wa wee fìo fɛ́ɛɛ mi bìo yi. Wa wee fìo le Dónbeenì yi le le wé à mi koń lè ho veró na le von làa mia. Wa wee fìo le le Dónbeenì dàńló pànká yi, à mu tentemu na mi wee leéka wéró lè mi sĩadéró le Dónbeenì yi à le Dónbeenì tií ɲii. 12 Ká mu wó làa bṹn, á wa Ɲúhṹso Yeesu yèni á à yí ho cùkú mi bìo yi, á minɛ́n mún ǹ yí ho cùkú o bìo yi. Bṹn lé wàn Dónbeenì là a Ɲúhṹso Yeesu Krista sãamu.