Bibeli Luayãtaalá Ezekiɛli 29

Ãnabikɛkɛa Egipiↄ yã́ musu

(Isa 19.1-25, Zel 46.2-26)

1 Wá kua zĩ̀zↄↄ ũ wɛ̃̀ kwide, a mↄ kwide gↄↄ kuɛplade zĩ́ Dii yã'òmɛɛ à mɛ̀: 2 Gbɛ̃nazĩn nɛ́, wɛbiibii Egipiↄ kí Falaↄ̃ↄwa, ní ãnabikɛkɛ aà yã́ musu ń Egipi bùsuo. 3 Oɛ̀ ǹ mɛ ma Dii Lua ma mɛ̀:

Egipiↄ kí Falaↄ̃ↄ, má fɛlɛnnↄ,

n kwãsa pↄ́ ń wúlɛa Niili ↄnaↄ guu,

ni mɛ Niiliá n pↄ́ɛ,

ḿmɛ n n pↄ́ kɛ̀ nzĩawa.

4 Má kokoaↄ kanɛ n gbàou,

mí tó n swa kpↄↄ mↄ kpa n tɛɛↄwa.

Má n gálɛ mà n bↄ n swa'ↄnapiↄu

ń n swa kpↄ pↄ́ kpà n tɛɛↄwaↄ sãnu,

5 mí n to gbáau,

mpi ń n swa kpↄpiↄ píi.

N gɛ̀ a gↄ̃ wúlɛ sĩ̀sĩa,

gbɛ̃e a n wáↄ kãaa à sɛ́lɛo.

Má n kpa wàiↄ ń bãↄwa ń pↄblea ũɛ,

6 Egipiↄ i dↄ̃ kɛ́ mámɛmaa Dii.

N gↄ̃ Isailiↄnɛ fee lípana ũ yãa.*

7 Kɛ́ aa gbãa'èma aa n kũ,

n wiwi ń ↄu, ↄ̃ an gãu gbòo.

Kɛ́ aa sↄ̃kpàlɛnzi, n ɛ'ɛ,

ↄ̃ an wó bↄ̀ↄũ.

8 A yã́i tò ma Dii Lua ma mɛ̀

má tó wà mↄ́ zĩkainnↄ,

mí n gbɛ̃́ↄ ń n pↄtuoↄ míↄnzↄ̃.

9 Egipi a gↄ̃ bɛzia gii ũɛ,

a gbɛ̃́ↄ iↄ dↄ̃ kɛ́ mámɛmaa Dii.

Kɛ́ n mɛ̀ Niiliá n pↄ́ɛ, ḿmɛ ń kɛ̀,

10 a yã́i tò má fɛlɛnnↄ ń n swaↄ.

Má tó Egipi bùsu gↄ̃ da wàuu

bɛzia gii ũ za Midoli ń Asuão

e à gɛ pɛ Etiopi bùsu zↄ̃lɛwa.

11 Gbɛ̃nazĩna ge pↄtuo gbɛ a pɛ́lɛ weo,

pↄe a pãao,

gbɛ̃e aↄ ku weo e wɛ̃̀ bla.

12 Má tó Egipi bùsu gↄ̃ bɛzia ũ

dɛ bùsu pↄ́ ↄ̃̀ↄkpà yãaↄla,

a wɛ̃́lɛↄ i gↄ̃ bɛziaↄ ũ

dɛ wɛ̃́lɛ pↄ́ wà ń dúuzↄ̃̀ yãaↄla.

Má Egipiↄ fãaa buiↄ guuɛ,

má ń fã́ndaiada bùsu ń bùsuoɛ,

an wɛ̃́lɛↄ i gↄ̃ bɛziaↄ ũ e wɛ̃̀ bla.

13 Ń beeo ma Dii Lua ma mɛ̀, wɛ̃̀ blapi gbɛa má Egipiↄ bↄlɛ bui pↄ́ aa fãaauↄ guuɛ, mí ń kãaa, 14 mí suńnↄ ń buibↄkĩi Egipi bùsu gɛↄmidↄkĩi oi. Wekĩi an kpala a gↄ̃u kpɛɛ, 15 a gↄ̃ kpɛɛ dɛ kpala píia, aa e ńzĩa sɛ lɛsĩ dɛ buiↄla lↄo. Má ń laoɛ, aa e kible buiↄwa lↄo. 16 Aaↄ dɛ Isailiↄ gbãa'ekĩi ũ lↄo, Isailiↄ i dↄ̃ sa ń zɛa ń Egipiↄá duunaɛ, aaiↄ dↄ̃ kɛ́ mámɛmaa Dii Lua.

17 Wá zↄblea wɛ̃̀ baasↄo ń plaode guu, a mↄ sɛ̃́ia gↄↄ sɛ̃́ia zĩ́ Dii yã'òmɛɛ à mɛ̀: 18 Gbɛ̃nazĩn nɛ́, Babɛli kí Nɛbukanɛza ń a zĩgↄ̃ↄ zĩ̀ gbãa kà ń Tiideↄ. Ɔ̃ aso ń baade mikã ń ń gãuo wòlo, aàpi ń a zĩgↄ̃piↄ aai ài'e zĩ pↄ́ aa kà ń Tiideↄ yã́ musuo. 19 Ayãmɛto ma Dii Lua ma mɛ̀, má Egipi na Babɛli kí Nɛbukanɛzaɛ a ↄzĩɛ, i Egipipi àizɛɛↄ naaa, i a pↄ́ↄ sɛ́lɛ a zĩgↄ̃piↄnɛ ń asea ũ. 20 Ma Egipi kpàwà kↄai pↄ́ a kɛ̀ asea ũɛ, asa mámɛ aa zĩpi kàmɛɛ. Ma Dii Lua mámɛ má ò.

21 Gↄↄ bee má Isailiↄ gba gbãa, mí n gba lɛ́ ǹ yã'o ń guu, aaiↄ dↄ̃ kɛ́ mámɛmaa Dii.