Bibeli Luayãtaalá Ezekiɛli 30

30

Wɛ̃nakɛa Egipiↄnɛ

1 Dii yã'òmɛɛ à mɛ̀: 2 Gbɛ̃nazĩn nɛ́, ãnabikɛkɛ ǹ mɛ

ma Dii Lua ma mɛ̀

wiipɛ ǹ mɛ, agya! A gↄↄ kà!

3 Asa gↄↄpi kà kãi,

Dii gↄↄpi kãikũ̀.

Guduuduu gↄↄɛ!

Buiↄ yã'egↄↄɛ!

4 Wa mↄ lɛ́lɛ Egipiↄwa ń fɛ̃ndao,

sↄ̃ i kɛ̃ Etiopiↄgu.

Tó wà gbɛ̃́ↄ dɛ̀dɛ Egipi,

wa aà àizɛɛↄ sɛ́lɛ,

wi aà gbãa'ekĩi gboo.

5 Etiopiↄ ń Putiↄ gagańnↄ sãnu zĩu

ń Ludiↄ ń Laalubuↄ píi ń Libiiↄ

ń bùsude pↄ́ aa lɛdoũkɛ̀ńnↄↄ.

6 Ma Dii ma mɛ̀

gbɛ̃́ pↄ́ ì Egipi gba gbãaↄ lɛ́lɛ,

gbãa pↄ́ Egipiↄ ì ĩ́anadãò kↄ a ɛ́.

Wa gaga zĩ guu za Midoli e Asuã,

ma Dii Lua mámɛ má ò.

7 An bùsuↄ gↄ̃ bɛzia ũ dɛ bùsu píia,

an wɛ̃́lɛ ↄ̃̀ↄkpaa aↄ dɛ wɛ̃́lɛ píia.

8 Tó ma tɛsↄ̃̀ Egipiwa,

an dↄnlɛdeↄ kɛ kɛ́lɛkɛlɛ ḿpiiɛ,

aaiↄ dↄ̃ kɛ́ mámɛmaa Dii.

9 Gↄↄ bee má zĩnaↄ gbaɛ ń gó'ilɛnaↄ,

aai gili gɛ̃ Etiopi pↄ́ kálɛa dↄdↄaↄgu.

Sↄ̃ a kɛ̃́ńgu Egipi yã'egↄↄ.

Gↄↄpi lɛ́ mↄɛ fá!

10 Ma Dii Lua ma mɛ̀

má tó Babɛli kí Nɛbukanɛza

Egipi zĩgↄ̃ dasiↄ míↄnzↄ̃.

11 Má mↄaànↄ ń aà zĩgↄ̃ↄ,

bui pãsĩpiↄ i Egipi dúuzↄ̃.

Aa ń fɛ̃ndaↄ wo Egipiↄzi,

aai to bùsu pa ń gɛↄ.

12 Má tó a swaↄ í ba,

mí bùsupi na gbɛ̃vãipiↄnɛ ń ↄzĩ.

Má tó bui zĩ̀loↄ bùsupi ↄ̃̀ↄkpa

ń pↄ́ pↄ́ kú a guuↄ.

Ma Dii mámɛ má ò.

13 Ma Dii Lua ma mɛ̀

má tã́aↄ midɛ,

mí Mɛfisi dii pãpiↄ míↄnzↄ̃.

Kíae aↄ ku Egipi lↄo,

má tó vĩa Egipiↄ kũ ḿpiiɛ.

14 Má tó Egipi gɛↄmidↄkĩi oi gↄ̃ bɛzia ũɛ,

mí tɛsↄ̃ Zoãwa,

mí yã́kpalɛkɛ ń Tɛbɛsio.

15 Má pↄkũmabↄbↄ

Egipi wɛ̃́lɛ bĩ́ide Pelusiwa,

mí Tɛbɛsi gbɛ̃́ dasipiↄ tↄ̀lↄzↄ̃.

16 Má tɛsↄ̃ Egipiwa,

Pelusi i luukpa,

wi Tɛbɛsi bĩ́i gboo,

Mɛfisi i loo fãanɛ.

17 Ɛliↄpↄli ń Bubasio ɛ̀waasoↄ gaga zĩ guuɛ,

wi tá ń wɛ̃́lɛpideↄ zĩ̀zↄↄ ũ.

18 Tó ma Egipiↄ zuu bↄlɛ gbɛ̃́ↄnɛ,

má ń gbãa pↄ́ aaì ĩ́anadãò kↄ'ɛ.

Gu a si Tapanɛsi fãanɛ,

lou guduuduu i daa,

wi a zↄ̃ɛwiadeↄ kṹkũ zĩ̀zↄↄ ũ,

wi táńnↄ.

19 Màa má yã́kpalɛkɛ ń Egipiↄ,

aaiↄ dↄ̃ kɛ́ mámɛmaa Dii.

20 Wá kua zĩ̀zↄↄ ũ wɛ̃̀ kuɛdode, a mↄ sɛ̃́ia gↄↄ soplade zĩ́ Dii yã'òmɛɛ à mɛ̀:

21 Gbɛ̃nazĩn nɛ́, ma Egipiↄ kí Falaↄ̃ↄ gã̀sĩ ɛ̀,

ↄ̃ wi dↄ à gbã̀gbão,

wi zwãa yewà à gbãakũ̀,

kɛ́ à e fɛ̃nda kũo.

22 A yã́i tò ma Dii Lua ma mɛ̀

má ɛa fɛlɛ ń Egipiↄ kí Falaↄ̃ↄoɛ,

mí aà gã̀sĩ ɛ́'ɛ pla píi,

a gbãa ń a gyãeo,

fɛ̃nda i piliwà à lɛ́lɛ.

23 Má Egipiↄ fãaa buiↄ guu,

mí ń fã́ndaiada bùsu ń bùsuo.

24 Má Babɛli kía gba gbãa,

mí a fɛ̃nda naɛ̀ a ↄzĩ,

mí Falaↄ̃ↄ gã̀sĩ ɛ́'ɛ,

i oi'oikɛ Babɛli kíapi aɛ

lán gbɛ̃́ pↄ́ lɛ́ gawa.

25 Ma Babɛli kía gba gbãa,

Falaↄ̃ↄ ↄ i gↄ̃ dↄ̀lↄlↄ.

Tó ma a fɛ̃nda nà Babɛli kíaɛ a ↄzĩ,

mɛ́ a sɛ dↄ Egipiↄ bùsua,

aaↄ dↄ̃ sa kɛ́ mámɛmaa Dii.

26 Má Egipiↄ fãaa buiↄ guu,

mí ń fã́ndaiada bùsu ń bùsuo,

aaiↄ dↄ̃ kɛ́ mámɛmaa Dii.