13
Dii pↄpaa a gbɛ̃́ↄzi
Kɛ́ Ɛflaiũ buiↄ yã'ò, wà lùalua,
aamɛ gbãa Isailiↄ guu.
Ɔ̃ aa tàaekɛ̀ Baali yã́ musu,
a yã́i an kpala a gai.
An duunkɛa lɛ́ dɛdɛɛ sa,
aalɛ ã́nusu kása ńzĩaɛ tã́aↄ ũ.
An ↄzĩkɛnaↄ mɛ́ lɛ́ ń diipiↄpi ń ↄ̃nↄ lɛ́u.
Wì ń yã'o wì mɛ,
aaì sa'o ń gbɛ̃nazĩnao,
aaì lɛ́pɛpɛ zugaae taaↄwa.
A yã́i tò aa gↄ̃̀ lán suakpaa kↄↄwa,
lán kↄↄkↄↄ fíi pↄ́ ì gɛ̃zɛawa,
lán ése ṹa pↄ́ zàa ì sɛ́lɛwa,
lán súɛlɛ pↄ́ ì bↄ fɛnɛntiuwa.
Mámɛmaa Dii á Lua pↄ́ á bↄ́lɛ Egipi.
Ásu àↄ diie dↄ̃o, ma bàasio.
Suabanae kuo, sema mapi.
Mámɛ ma á gwá guwaiwaiu,
ma ↄlìaázi bùsu guwãadeu.
Kɛ́ ma á dã́dãkɛ̀, a kã.
Kɛ́ a kã á làa, a ázĩa sɛ̀ lɛsĩ,
ↄ̃ ma yã́ sã̀águ.
Too! Má kusiwá lán nↄ̀ↄmusuwaɛ,
mí á dã́dã zɛ́u lán gbɛaanawa.
Má mlɛ̃wá lán wài pↄ́ wà a nɛ́ sɛ̀lɛwaɛ,
mí á kùa goaa mà á só lán nↄ̀ↄkusiwa,
má á taitai lán maiwa.
Á Isailiↄ, á kaalɛɛ,
kɛ́ a bↄ mapi á Dↄnlɛde kpɛ yã́i.
10 Á kía pↄ́ ì á suaba ku máɛ sa?
Á wɛ̃́lɛ dↄaana pↄ́ á ònɛ́
aa kía kpáɛ́ↄ* ku má ni?
11 Ma kía kpàɛ́ ń pↄkũmao,
ↄ̃ ma aà sìwá ń pↄfɛ̃o.
12 Ɛflaiũ buiↄ yãvãiↄ dilɛa,
wà ń duuna kà láu.
13 Aa dɛ lán nɛ́ sↄũwa a igↄↄ,
nↄwãwã mↄ̀, ↄ̃ nɛ́pi gì bↄi.
14 Má ń bↄ bɛda gbãaue?
Má ń sí gawae?
Ga, n sɛwɛ kúmáɛ?
Bɛda, n gbɛ̃kaalɛbↄ sↄ̃ bɛ?§
Má ń wɛgwao.
15 Baa tó Ɛflaiũ buiↄ kↄ̃̀ ń gbɛ̃́ↄ guu,
ĩ́an wãa a bↄ guwaiwaiu à sumáɛ.
Nibↄna a giigaga,
lↄ̀ↄ'i a ba,
wa lɛ́lɛ ń làasiↄwaɛ,
wi ń pↄ́ bɛɛɛdeↄ sɛ́lɛ.
* 13:10 1Sam 8.5-6 13:11 1Sam 10.17-24 13:11 1Sam 15.26 § 13:14 1Kln 15.55