11
Yɛse gↄ̃na kpalablea
1 Yɛse miↄna a vlãpa a zĩ́nau, a gↄ̃na a bↄ, i nɛ'i.
2 Dii Nisĩna aↄ kuwà,
a aà gba ↄ̃nↄ ń wɛzɛ̃o,
a aà gba gbãa ń lɛdaama zɛ́o,
a aà gba dↄ̃a, i to aàↄ Dii vĩa vĩ.
3 Vĩakɛa Diiɛ a aà kã́si.
A yã́gↄ̃gↄ̃ gbɛ̃́ↄnɛ lá wɛ́ lɛ́ ewao,
a yãkɛkɛnɛ́ lá àlɛ mawao.
4 A yã́kpalɛkɛ taasideↄnɛ a zɛ́wa,
a dṹnia wɛ̃nadeↄ yãnakpámá.
Aà yã́ a dṹnia gbɛ̃́ↄ gbɛ̃ lán gowa,
a vãikɛnaↄ dɛdɛ ń a lɛ́'ĩanao.
5 A yã́zɛde kuluka báa ũ,
a náai dↄ a pi asana ũ.
6 Àwalɛwana aↄ ku sãnu ń sãnɛo,
gbɛaana a wúlɛ kↄ̃ saɛ ń bleo.
Gáaena ń nↄ̀ↄmusuo aa pↄble sãnu,
nɛ́fɛ̃nɛna mɛ́ a dↄaanɛ́.
7 Zuda ń wàio aaↄ dɛ kↄ̃gbɛ̃ↄ ũ,
an nɛ́ↄ wúlɛ gudoũ.
Nↄ̀ↄkusi a sɛ̃ ble lán zuwa.
8 Nɛ́ yↄ̃mina a kↄ̃̀ↄ'o kyã́ ɛlɛ,
nɛ́ kɛ̃a a ↄgɛ̃ píligonazi.
9 Pↄ́ pↄ́ ì ń kɛ'ĩa ge pↄ́ pↄ́ ì ń dɛ
aↄ ku Dii gbɛ̀sĩsĩ pↄ́ a kua adoawao,
asa Dii dↄ̃a a li dṹniaaɛ,
lá í ì dagua ísiaiwa.
10 Zĩbeezĩ Yɛse zĩ́na aↄ dɛ gudↄkↄ̃ɛkĩi ũ buiↄnɛ. Wa aà kĩ́i wɛɛlɛ mɛ́ aà kúkĩi aↄ gawi vĩ.
11 Zĩbeezĩ Dii a ɛa ↄbↄ a gɛ̃n plaade, i a gbɛ̃́ kↄ̃na pↄ́ gↄ̃̀ↄ bo. Aa bↄ Asili ń Egipio ń Etiopio ń Elaũo ń Babilonio ń Amatao ń ísia gũgũnaↄ.
12 A gudↄkↄ̃ɛkĩi dilɛ buiↄnɛ,
i Isaili zĩ̀zↄↄ kãaa.
A Yuda pↄ́ fãaaapiↄ sɛ́lɛ
za dṹnia gola síiↄ̃ↄwa.
13 Ɛflaiũ buiↄ zaańgu a midɛ,
aaↄ za Yudaↄgu lↄo.
Yudaↄ íbɛlɛ a láa,
aa íbɛlɛsɛ ń Ɛflaiũ buiↄ lↄo.
14 Aa lɛ́lɛ Filitɛ̃ↄ bùsuwa bɛ'aɛ,
aa gukpɛdeↄ pↄ́ↄ naaa sãnu.
Aa ↄtↄ̃ Ɛdↄũↄ ń Mↄabuↄwa,
mɛ́ Amↄniↄ misiilɛnɛ́.
15 Dii a to Egipi ísialɛ gↄ̃ gii,
a ↄmalɛ Uflatai ń a lɛ́'ĩan wãao,
i gↄ̃nakɛ̃ lɛɛ sopla,
wi buawà ń kyaleo kpaa.
16 A zɛda bↄ a guu a gbɛ̃́ kↄ̃na pↄ́ gↄ̃̀ Asiliↄnɛ,
lá a kɛ̀ Isailiↄnɛ gↄↄ pↄ́ aa bↄ̀ Egipiwa.