Bibeli Luayãtaalá Isaia 12

12

Dii sáaukpaa

1 Zĩbeezĩ á o à mɛ:

Wa n sáaukɛ̀ Dii!

Baa kɛ́ n pↄ pàwázi, n pↄ wèewá,

ↄ̃ n wá nↄ̀sɛ nìniwɛ̃ɛ.

2 Lua mɛ́ wá Suabana ũ,

wáↄ aà náai vĩɛ, vĩa a wá kũo.

Dii mɛ́ wá gbãa ũ, aà táasi wi lɛ́,

ↄ̃mɛ wá suabà.*

3 Á ítↄ ń pↄnao suaba nibↄnaↄi.

4 Zĩbeezĩ á o à mɛ:

À Dii sáaukpa à aà sísi,

à to buiↄ aà yãkɛaↄ dↄ̃.

À onɛ́ Dii mɛ́ tↄbↄ̀ ado.

5 À lɛsi Diiɛ, asa à tidↄ̀ńlaɛ,

à to dṹnia gbɛ̃́pii yã́pi dↄ̃.

6 Siↄnadeↄ, à wiilɛ à gulakɛ,

Isailiↄ Lua pↄ́ a kua adoa zↄ̃ↄ,

mɛ́ a kú á guu.

* 12:2 Bↄa 15.2, Soũ 118.14